Osmoniyə surəon-180
Osmoniyə surəon-180
“Və zəmini sape bo yəğıni əhli(tohidi)nışonəon heste”.
Zariyati mıborəkə surə 20-ə ayəku jəqoşə,bə Xıdovəndi zəmini dimisə iyən insoni ıştən vucudədə bıə çandə qılə nımunə nışonəon işorə kardedə və bərosti Xıdovəndi zəmini dimisə elm iyən ğudrəti nışonəon ziyode.
Zəmini həcm iyən əndozə,çəy de həşi bıə fosilə,çəy ıştə qırdo qardey,zəmini çı həşi qırdo qardey və cozibə iyən dafiyə ğıvvon ki,bə çın təzahur iyən fenomenon təzahuri xoto bə vucud omeydən,komilə surətədə de iyande həmahənq,bərobər və mutəadilin.ın koon jıqo dəğiğ və ağımandə formadə tənzim bıə ki,bo zəmini dimisə jimoniro zəminə hozzı kardedə.qıləy holədə ki,ehanə çın fəsl iyən hərəkətonku tikəy əvəz bıbu,zəminədə bo jimoniro bıə şəaryit çı miyoniku bəşe.beşək,ımon həmmə Xıdovəndi dıjdə ayəonku bə hisob omeydə.
Zəmini təşkil doə maddə və bo insoni bəyji oqəteyro zəminədə hozzı bıə mənbəon iyən ehtiyoton har qıləyni, Xıdovənde-Aləmi tədbiri nışonəonkuye.bandon,dəşton,cənqəlon,dıyoon,ruon iyən çeşməon har qıləyni bo insoni zəmini dimisə jimon kardey və bəştə jimoni dəvom doeyro, qıləy təsirinə rol ifo kardedən.həmçinin,rəsəyonku çandə həzo nev,həşəraton və heyvonon ki,çəvon har qıləyni əcibə xıslətoşon heste,çı xılğəti ofəyə Xıdovənde-Xalıği əzəməti coqlə ayəonkuye....
Zariyati mıborəkə surə 21-ə ayədə bə insoni işorə kardedə və hamyedə:”şımə vucudədə(həm nışonəon heste)aya fik-fam kardedəniyon?”.
əcibə çi ıme ki,inson deştə qırd istedod, huş iyən fərosəti,sıftədə qıləy berjin iyən noçizə çi bıə,əmmo çoko çı inə rəhım və lvədə ğərol qəteydə,de surəti ruşd karde,ozavziyedə və qıləy kırtə mıddətədə bə qıləy komilə insoni peqardedə.
Insoni bədəmi həmməysə qədə əczo bıə huceyrəon,odəmi bə heyrət vardə qıləy bina və soxtemonışon heste ki,bə alimon votey əsos,bəvədə çı qıləy sənaye şəhri əndozədə təşkilot mevcude.
Qıləy bioloqiyə sahədə ko kardə alim voteydə:ın dıjdə şəhr yəni huceyrəon de çandə həzo fabrikə,lulə və torbə şəbəkəon,komandə mərkəzi,ziyodə cihozon və bə jimoni lozım bıə mıxtəlifə koon,qıləy əcib-ğəribə şəhre.ehanə qıləy təsisat və cihoz soxteyımon bıpyo ki,bənə ımi koon bıvindəmon,bəpe qıləy hevujə zəminımon bıbu ki,qırd ın mırəkkəbə bina,texnika və cihozon ıştədə vırə bıqəto ta əmə bo jıqo qıləy proqrami hozzı bıbəmon.odəmi dığğəti cəlb kardə çi ıme ki,vekon,sipyə çiqəri məxsusən çandə kilometr dırozi bıə nozık iyən sırafə rəğon və hətto kapilyaron ki,de çəşi vindey bedəni və çı insoni bədəmi çandə milyard huceyrəon təğziyə və ğida bəçəvon ehdəy.həmçinin bənə vindey,məsey və sayirə mıxtəlifə hisson qırd ımon çı pərvərdıqore-aləmi nışonə və ayəonkuye.
Həmməysə muhimmə qıləyni həm,həyot iyən jimoni muəmmay ki,çəy sırron de tobə ısət məlum və zıney bıəni.iyoe ki,inson be ixtiyorə formadə deştə zıvoni Xıdovəndi təsbih kardedə və bəy həmd votedə və çəy qırd ım əzəmətinə ğudrəti mığobilədə sə təzim kardedə.
