Osmoniyə surəon-181
Osmoniyə surəon-181
İbreym(ə) çı mehmonon vəzyət iyən holonku sərəse ki,əvon fəğət boçəy fərzəndi mıjdəvoni doey xoto omə nıbin.ğasbu həm çəvon təfroti forməku dərəse ki,çəvon qıləy muhimmə koşon heste.əve,”əy (İbreym(ə)-i) voteşe:ha çı (Xıdo) vığndəyon ha! şımə məmuriyyət(vəzifə)çiçe?voteşone:bəmə bə mucrimə (qınokorə) ğovmi səmt vığandə bıəmon”.(31-32-ə ayəon).
Əvon bə Lut(ə)-i ğovmi işorə kardedəbin ki,bə şırk iyən fəsodi aludə bıəbin.əmmo çəvon həmməysə dıjdə qıno,həmcinsbozəti iyən homoseksualzim be ki,ım ıştən qıləy vey yavə və bə xoş nıomə ko be.firiştəon ıştə sıxanon dəvomədə bə İbreym(ə)-i voteşone ki,çəmə vəzifə ıme ki,əmə çə həmonə yavə ko soyb bıə ğovmi sape sığon nozil bəkardemon və əvoni de ın sığon vositə vırto-volo və həlok bəkardemon.həmonə sığon ıştı pərvərdıqori tərəfiku bo isrofkorə fərdon muzim qətə bıə.
Çəy bəpeştə ayəon hamyedə:əmə çı Liut(ə) ğovmi jimon kardə qırd şəhəronədə bıə muminon,bəlo nozil bıey bənav xaric kardemone.əmmo,qırd bə diyoronədə ğərəz qıləy xıyzoni co imoninə şəxs pəydu nıkardemone.demiyən,fəğət çı Lut(ə)-i xıyzoni nicot pəydu kardeşe ki,çəy jimoni həm həm çı qınokor və xətokoronku be.
Çə fosidə camaati şəhron ,de qıləy vironəkə buməlarzə vositə,pevuşkıney və vırto-volo be. peşo, osmoniku sığon voye və çəvonku həni hiç qıləy əsər-əlomət nımande ta bo vəomə milləton qıləy ibrəti dərs bıbu.çın macəra oxoyədə hamyedə:”və əyo bo dardnokə əzobiku tarsəkəson qıləy nışonə iyən ibrət nomone”.
Bə har qıləy insoni zehni rəsə sıvol ıme ki,əmə boçi ofəyə bıəmon və çəmə bə ın dınyo omey məğsəd və hədəfə çiçiku iborəte?
Zariyati mıborəkə surə 56-ə ayə bə çın sıvoli cəvobədə hamyedə:”mı cıno-ins ofəyəme ki,fəğət mıni pərəstışkon”.
Bə ın ayə əsos,qırd əmə bo aləmon pərvərdıqor bıə Xıdovəndi ibodət kardero ofəyə bıəmon. Isət pərvərdıqore-aləmi ibodət kardeyku mənzur və məğsəd çiçe?
Ubudiyyət və ibodət çı pokə zoti soyb bıə pərvərdıqore-aləmi mığobilədə ıştə muti və təslim bıey oxonə dərəcə nışon doeye.ubudiyyət,çı bəşəri xılğəti oxonə hədəfe ki,Xıdovəndi bəçəy vusal iyən rəsey xoto, əvış imtovon ğərolış doə və bəy qıləy aqahəti iyən elmış baxş kardə.xılğəti əsl,həyğətədə qıləy əzim və dıjdə təkamuli ğədəme.yəni qıləy çi hiççiku bə vucud vardey iyən hiççiku mumkin kardey.çın ğədəmi bəpeştə,çı təkamuli coqlə mərhələ və etapon bino bedə ki,dini təlim iyən proqramon həmonə bın cəhətədən.
Xıdovənde-Aləm qıləy feyz icod kardə və nemət ofəyə çeşməy ki,qırd məxloğat çəy himoyə sayədə,çı nəğsiku bə kəmol rosnedə.çən,çəmə ibodət iyən bandəçəti boçəmə tərbiyə iyən təkamuli xoto bıə qıləy klas və dərsi vırəye.de qıləy co iborəti Xıdo bandəon bəpe çı həmmə kəmolaton mənbə bıə Xıdovəndi bızınon və ıştəni deçəy kəmolaton dərısto ta Xıdovəndi həmonə sıfətonku çəy vucudədə cilvə pəyduko. çıro ki,bə Xıdo dərqo ğurb iyən bəy nez bıey,fəğəd deçəy sıfəton ıştəni dəroste mumkine.çən,Xıdo ubudiyyət yəni insoni ıştəni deçəy əxloğ iyən sıfəton dərsoteye və ım çı insoni kəmoli həmməysə barzə noxtə və pik hədde.
