Osmoniyə surəon-188

Osmoniyə surəon-188

Ğəməri mıborəkə surə Məkkədə nozil bıə 55 qılə ayəku iborəte.surə nom həm çın surə iminə ayəku peqətey bıə.

“Ğıyomət nez be və ovşım (iyandeyku) poə be”.

Çın surə iminə ayədə  dıqlə muhimmə hodisəonku sıxan bə miyon vardedə.qıləyni çı ğıyoməti ruji nez bıey ki,de hestemoni aləmədə dıjdə hodisəon bə ico bəbe və bo axırəti jimoni qıləy vəsəy.coqləyni hodisə “Şəğğul-Ğəmər”-i yəni (ovşımi poə bəey) hodisəy ki,ım həm çı Xıdovəndi ğudrəti dəlilonkuye və çı peyğombər(s)-i dəvəti rostəti nışon doydə.

Həmonə şəvi Ovşım çordə şəvnə be.bə məşhurə rəvoyəton əsos,mışrikonku idastə Xıdo-Rəsul(s)-i palu omin və voteşone:ha Muhəmməd ha!har qıləy pəyğombər boştə nıbuvvət iyən peyğombərəti xoto, qıləy mecuzəşon vardə və tı həm boştə iddion isbotiro,boəmə qıləy mecuzə biyə.ehanə tı ,həyğətən çı Xıdo peyğombərişbu  və qıləy məğamı hestebu,tı boy ovşımi bomə dı poəkə.həzrəte peyğombər(s) bə Xıdovəndi dərqo dimış qəte və Xıdovəndiku tələbış karde ki,ovşımi boəy dı poəko.ğəflətən ovşım bə dı nimə poə be.peyğombər(s) boçımi xoto,şukri səcdəş bə vırə rosne və de ə həzrəti bə ico bıə əshob həm ın koşon karde.peşo ovşım ijən bəştə iminə vəzyəti oqarde və bə iyande dəçıke.mışrikon voteşone ki,ha  Muhəmməd(s) ha! çəmə mısofir iyən səyohətəkəyon çı Yəmən iyən Şamiku oqardeyədə,əmə çəvonku sıvol bəkardemon ta hələ bunim ayə əvon həmonə məmləkətonədə beyədə ın mənzərəşon mışohidə kardəşone ya ne?əgər əvon bıvoton ki,əmə ın hodisəmon vində,bəvədə əmə yəğın bəkardemon ki,ım ko çı aləmon pərvərdıqor bıə Xıdovəndi tərəfikuye və ehanə əvion bıvoton ki,əmə həmonə sərzəminonədə jıqo qıləy çi yəni ovşımi bə doə vırə poə bıey mışohidə kardəmon ni,bəvədə ruşin bəbe ki,ıştı kardə ın əməl ğərəz sehro-codu co qıləy çi ni.çəvon votə mısofir iyən səyohətəkəyon çı co məmləkətonku oqardeyədə və bə Məkkə şəhri rəseyədə,əvon həm çı ovşımi bə dı nimə poə bıey təsdığ kardeşone. əmmo,de qırd ın təsdığon əvon ijən imon nıvardeşone və çı inkor kardə kəsonku bin.

Ğəməri mıborəkə surə dıminə ayədə hamyedə:” və havaxti (əvon)çəmə nışonə iyən mecuzəon bıvindon, dim qırdıneydən və votedən:ım qıləy dayimiyə sehre”.

Ayə bə ın nuktə işorə kardedə ki,mışrikon çandə kər çı peyğombər(s)-iku mecuzəon vindəşonbe və “Şəğğul-Ğəmər” həm çəvonku qıləyni be.əvon çı peyğombər(s)-i qırd mecuzəon sehr hisob kardedəbin və əy qıləy dayimi surətədə bıə sehr zıneydəbin. Harçənd,ın behton və iftiro bo həxı mığobilədə təslim nıbey xoto qıləy bəhonəku co çi nıbe.

Ğəməri mıborəkə surə 3-ə ayədə bə mışrik iyən mıxolifon ın yavə mıxolifəti nəticə iyən dəlili işorə kardedə və hamyedə:əvon təkzib kardeşone və bəştə həvaye-nəfsi pemandin və qıləy ko qıləy (oxonə) vırə və ğərolqoş heste”.

De peyğombər(s)-i iyən de ə həzrəti mecuzəon mıxolifət kardə,həmçinin ğıyoməti bə həşə jıə  mışrikon mıxolifəti sərçeşmə,çəvon bəştə həvaye-nəfsi tabe bıey be.həmçinin çəvon inodkorəti,bə ğanuni nıpemandey,ləzzət pərəstəti və həmçinin de yavə qınon məşğul bıey,bımi mane bedə be ta əvon çı peyğombər(s)-i həxə dəvəti ğəbulkon və bə ə həzrəti əmron pemandon.çıro ki,ın dəvəti ğəbul kardey ıştən qıləy mə`suliyyət icod kardedə..