Osmoniyə surəon-189
Osmoniyə surəon-189
Ğəməri mıborəkə surə dıminə ayədə hamyedə:” və havaxti (əvon)çəmə nışonə iyən mecuzəon bıvindon, dim qırdıneydən və votedən:ım qıləy dayimiyə sehre”.
Ayə bə ın nuktə işorə kardedə ki,mışrikon çandə kər çı peyğombər(s)-iku mecuzəon vindəşonbe və “Şəğğul-Ğəmər” həm çəvonku qıləyni be.əvon çı peyğombər(s)-i qırd mecuzəon sehr hisob kardedəbin və əy qıləy dayimi surətədə bıə sehr zıneydəbin. Harçənd,ın behton və iftiro bo həxı mığobilədə təslim nıbey xoto qıləy bəhonəku co çi nıbe.
Ğəməri mıborəkə surə 3-ə ayədə bə mışrik iyən mıxolifon ın yavə mıxolifəti nəticə iyən dəlili işorə kardedə və hamyedə:əvon təkzib kardeşone və bəştə həvaye-nəfsi pemandin və qıləy ko qıləy (oxonə) vırə və ğərolqoş heste”.
De peyğombər(s)-i iyən de ə həzrəti mecuzəon mıxolifət kardə,həmçinin ğıyoməti bə həşə jıə mışrikon mıxolifəti sərçeşmə,çəvon bəştə həvaye-nəfsi tabe bıey be.həmçinin çəvon inodkorəti,bə ğanuni nıpemandey,ləzzət pərəstəti və həmçinin de yavə qınon məşğul bıey,bımi mane bedə be ta əvon çı peyğombər(s)-i həxə dəvəti ğəbulkon və bə ə həzrəti əmron pemandon.çıro ki,ın dəvəti ğəbul kardey ıştən qıləy mə`suliyyət icod kardedə.
Ğəməri mıborəkə surə 6-ə ayəku de tosə 8-ə ayə bə ğıyoməti ruji qırd insonon əməlon hisobi rəsey ko işorə kardedə və hamyedə:”çən,çəvonku dim bıqordon(və) qıləy ruji(bə yod dənə) ki,dəvətəkə milləti bə qıləy təhlukəninə ko səmt dəvət kardedə.əvon qıləy holədə ki,ıştə çəşon (çı vəhşəti şiddətiku)saru eğandəşe .bənə pevolo bıə vaştənə çı ğəbonku xaric bəbeyn”.(7-8).
Ğıyoməti səhnə anədə hovlnok iyən vəhşətnok bəbe ki,bə ın səhnə təmşoəkəyon bəy tov vardey əzınin. liza,əvon ıştə çəşon çə səhnəku pebəqəteyn və zəmini ebərəxeyn.bə pərokəndə iyən pevolo bıə vaştənə və melon təşbih kardey həm bəçəy xotoye ki,bə ziyodə pərəndəon əks ki,kollektiv formadə beyədə,əvon de qıləy məxsusə nəzm iyən tərtibi hərəkət kardedən,əmmo vaştənəon hiç qıləy nəzm iyən tərtibışon ni və əvon bəyənde qıniyə formadə iyən behədəf bə həmmə vıron pevolo bedən.bəle ın beəxbə kuyədılon həmonə ruji jıqo bə vəhşəti dıço bəbeyn ki,bənə məsto-xumor bıə kəson bın tərəf-bə tərəf bəşeyn və bə iyənde pebəkkueyn.jıqo bızın ki,əvon behuşin və sədəşon ağl ni.
Peşonə ayədə hamyedə: əvon çın dəvəti bəpeştə ğəbonku xaric bıə zəmonədə,bə tarsi şiddəti xoto, deçəvon gərdəonon dıroz bıə holədə rəyrə bə də`vətəkə səmt bəşeyn.bə həmonə ruji saxtə hodisəon xoto bıə vəhşət,çə kofiron qırd vucudi dəbəqəte və bəvoteyn:”ımruj qıləy saxt iyən dardnokə ruje”.
Ğəməri mıborəkə surə bə Xıdo dini təkzibəkəyon bəhonə iyən inodkorətiyon çəşnavi doydə ta əvon bənə Nuh(ə),Lut(ə),Ad iyən Səmud ğovmon və həmçinin Ali-Fironiku ibrət peqəton ki,çı mışrik iyən mucrimon ağıbət bə cəhəndımi nığılə vırə eqıniye iyən sərnəqun bıeye.
Ğəməri mıborəkə surə 9-ə ayəku jəqoşə,xulosəvari surətədə bə çın ğovmon sərquzəşti işorə kardedə və bə yod dənoydə ki,çəvon har qıləyni ıştə inkor iyən inodkorəti nəticə və ağıbətışon vinde və bəştə cəzo rəsin.Nuh(ə)-i ğovm həm min cumlə çın ğovmonku be.çoko ki,Nuh(ə) ıştə ğovmi hidoyət bıeyku mə`yus iyən noumu be və ilahi dərqoyku koməkış tələb karde.joqo ki,hamyedə:”Nuhi ıştə pərvərdıqorış vanq je ki, (bə ın tuğyongərə ğovmi)mı məğlub bim.çən,bəmı koməkkə!”.
