Osmoniyə surəon-190

Osmoniyə surəon-190

Ğəməri mıborəkə surə 9-ə ayəku jəqoşə,xulosəvari surətədə bə çın ğovmon sərquzəşti işorə kardedə  və bə yod dənoydə ki,çəvon har qıləyni ıştə inkor iyən inodkorəti nəticə və ağıbətışon vinde və bəştə cəzo rəsin.Nuh(ə)-i ğovm həm min cumlə çın ğovmonku be.çoko ki,Nuh(ə) ıştə ğovmi hidoyət bıeyku mə`yus iyən noumu be və ilahi dərqoyku koməkış tələb karde.joqo ki,hamyedə:”Nuhi ıştə pərvərdıqorış vanq je ki, (bə ın tuğyongərə ğovmi)mı məğlub bim.çən,bəmı koməkkə!”.

Peşo Xıdovənde-Aləm çı Nuh(ə)-i həxədə bəştə məxsusə inoyət iyən lutfi işorə kardedə və hamyedə:ın kəşti çəmə çəşi vədə ləpəon sinəş poə karde və çəmə nəzorət iyən muhafizə jiyədə bəştə hərkəti dəvom doydəbe.de ın tərtibi Nuh(ə) iyən çəy yaro-yavəron perəxin və nicotışon pəydu karde və əmandəni dıəyoədə ğərğ bin,eşin.

Ayə dəvomədə çın dıjdə macəraku qıləy nəticə qətə holədə hamyedə:”əmə ın dastonımon bo ibrətiro çı umməton miyono baği haştemone.aya ikəs heste ki,pand iyən ibrət bıqəto?”.

Nuh(ə)-i dastoni bəpeştə,Ğəməri mıborəkə surə ayəon bə Ad,Səmud iyən Lut(ə)-i ğovmon sərquzəşti i hissə işorə kardedə.peşo bə Ali-fironi və bəçəvon məgh bıey hodisə qıləy titrvari surətədə işorə kardedə. odəmi dığğəti cəlbəkə çi ıme ki,çın ğovmonku ibrətamizə sərquzəşton bəyoni bəpeştə,əksərən bo ziyodə təsiri noey xoto,qıləy cumləş vardə.joqo ki,hamyedə:”əmə Ğıronımon bo təzəkkuriro(pand qətey) hoston kardemone.çən,aya pand qətəkəs heste?.

Ğəməri mıborəkə surə oxonə ayəonədə,Xıdovənde-Aləm  bə imon vardə iyən inkor kardə kəson ağıbəti işorə kardedə və hamyedə:”mucrim iyən qınokoron zəlolət iyən otəşi şuləonədən.qıləy ruj ki,dim bə otəşi səmt şıkırney bəbeyn.(və bəvon votey bəbe:)cəhəndımi otəşi bıçaştənən.əmə harçimon çəy əndozədə ofəyəmone və çəmə fərmon iqlə əmrisə vey ni,bənə çəşi bəyənde jıeye.əmə bənə şımə bıə kəson həlok kardemone.çən,aya qıləy pand qətəkəs mevcud ni? Və har qıləy əncom doəşone,çəvon (əməlon) nomədə səbt(nıvıştə)bıə.və har qılə qədə iyən dıjdə ko nıvıştə bıə”.

Kərimə-Ğıron çı kofir iyən zolımon ağıbəti zikri bəpeştə,bə pərhizkoron xoşholəkə sərnıvışt və tale kırtə işorə kardedə və hamyedə:”yəğınən,pərhizkoron boğon iyən(ruon)kənoədən.sıdği məğamədə)həxə məclisədə) zumandə hukmdorə huzurədə bəbeyn”.(54-55)

Bın ayəonədə pərhizkoron məğami qıləy vey çokə formədə vəsf kardedə.çəvon məğami dıqlə xısusiyyətış heste.qıləyni ıme ki,çəvon məğam sıdğe,həxə məclisədən və əyo əvon hiçvaxti qıləy botıl və hədərə sıxan nibəməseyn və həmonə vırə de həxı pure.Xıdovəndi çı vəhışti hli həxədə bıə və`dəon real bəbe və bə həyğət bərəse.

Coqləyni xısusiyyət ıme ki,əvon Xıdovəndi civar və ğurbədə bəbeyn.qıləy Xıdo ki,muğtədir,zumadn iyən ğadire və çəy hakimiyyəti jiyədə harcurnə neməton mevcude.bə həmonə dəlili xoto,ıştə əzizə mehmonon ğəbul kardey koyədə hiççiku bəkam nibəhaşte və boəvon harçi hozzı bəkarde.

Ğəməri mıborəkə surə oxonə bın dıqlə ayədə dığğət kardəninə çi ıme ki,iyo çı vəhışti əhli nemət və mıkafatonku sıxan şedə.iminə nemət maddiyə neməton ki.əyo bə vəhışti əhli hevujə boğon iyən ruon cari bedə və peşo bə qıləy dıjdə mə`nəvi neməti işorə kardedə ki,ım həm çı zumand və muğtədirə Xıdovəndi dərqo və huzurədə məğam pəydu kardeye.ım bəçəy xotoye ki,insonış mərhələ bə mərhələş hozzı kardə,çəy rufış bo pərero hozzış kardə və bəyış qıləy məxsusə həyəconış baxş kardə.ın ayəon həyğiyə muminon Xıdovəndi rəhməti dərqoyədə bə oroməti iyən xatırcəməti ğərğ bıeyku xəbə doydə.