Osmoniyə surəon-191

Osmoniyə surəon-191

Ərrəhmani mıborəkə surə Kərimə-Ğıroni penco pencminə mıborəkə surəy və 78 qılə ayəku iborəte.ın surə kulliyə formadə Xıdovəndi bəştə bandəon əto kardə maddi iyən mənəvi neməton bəyon kardedə ki,insonon çı ilahi neməton dılədə ğərğ bıən.bə həmonə dəlili xoto,de “Ərrəhman” nomi ki,ilahi hevujə rəhməti bəyon kardedə,bino bıə.

Ərrəhmani mıborəkə surə ayəon çımiku iborətin:xılğəti dıjdə neməton,təlim iyən tərbiyə,hisob iyən mizon,insoni rufi iyən cismoni xorəkon və çəy rifohi vositəon,ins və cıni xılğət,osmon iyən zəminədə Xıdovəndi ayə və nışonəon.bənə boğ,çeşməon,miyvəon,ğəşənq iyən bəfodoroə  jimoni həmroon və çandə nev oləton bıə vəhışti neməton,mucrim iyən qınokoron sərnıvışt və tale və çəvon dardnokə cəzoonku i ğısmət.

Bın surədə vəhışti neməton jıqo ali iyən bəpeə dərəcədə vəsf bıə ki,çı muminon dılon bə umu iyən şoyvonəti ğərğ bedə və ğəm iyən ğussə çəvonku bardedə.

“Fəbi əyyi alayi rəbbikuma tukəzziban”-(çən,ıştə pərvərdıqori kon qılə neməti bə həşə jeydon?)- ayə tikror kardey,kırtə fosilədə vardey,bə ın surə qıləy ğəşənq və cəzbəkə ahənqış baxş kardə və çun deçəy ğəşənqə mehtəvo və məzmuni umuj qıniyə,qıləy valehəkə cozibəş heste.islomi əzizə peyğombər(s) qıləy hədisədə hamyedə:”bo har qıləy çi qıləy ərus(vəyu)heste və Ğıroni ərus(vəyu həm) Ərrəhmani surəy”......

“Rəhmonə Xıdo.Ğıronış omute.insonış ofəye və bəy bəyonış omute”.(1-4)

Ərrəhman Xıdovəndi nome.”Əllah” kəlmə bəpeştə Xıdovəndi nomon miyono hevujə surətədə bıə nom Ərrəhmane.zira,Xıdovəndi dıqlə nev nomış heste.qıləyni (rəhməte-amm) yəni umumi rəhmət və coqləyni rəhməte xas yəni məxsusə rəhmət.Rəhmoni nom bə umumi rəhməti qıləy işorəy ki,bə həmməkəsi şomil bedə və Rəhimi nom bə məxsusə rəhməti işorəy ki,ım fəğət bə imoni əhl iyən itoətəkəyon şomil bedə.

Mislış nıbə Kərimə-Ğıroni neməit zikri bəpeştə,peşonə ayə bə insoni neməti işorə kardedə və hamyedə:insonış ofəye.

Bərosti insoni xılğət çı hestemoni aləmi  nığılə kompleks qıləy mislış nıbə neməte.inson ıştə pərvərdıqori rububiyyəti jiyədə,jıqo çı kəmoli mərhələ və etaponku dəvardedə ki,bə xılğəti aləmi mevcud bıə həmməysə şərofətinə məğami rəseydə.

Kərimə-Ğıroni bəpeştə insoni nomi zikr kardey,dığğə t kardənine.çıro ki,Ğıron iyən inson har qıləyni çın dıjd iyən hovujə aləmiku qıləy nusxəy.

Peşonə ayə çı insoni xılğəti bəpeştə bə həmməysə muhimmə nemətonku qıləyni işorə kardedə və hamyedə:”bəy bəyonış omute”.bəyoni çı insoni jimoni ozavziye iyən təkamulədə və tərəğği iyən mədəniyyəton bə əməl omeyədə qıləy fovğəladə rolış mevcude.ehanə ın dıjdə nemət bıənəbe,inson hiçvaxti ıştə elmon iyən təcrubəon de hostonə formə bə omə nəslon rosney nıəzni və bə insoni elm,din,əxloğ iyən sivilizasiyə boyis nıəbi.