Osmoniyə surəon-192

Osmoniyə surəon-192

Kərimə-Ğıroni bəpeştə insoni nomi zikr kardey,dığğət kardənine.çıro ki,Ğıron iyən inson har qıləyni çın dıjd iyən hovujə aləmiku qıləy nusxəy.

Peşonə ayə çı insoni xılğəti bəpeştə bə həmməysə muhimmə nemətonku qıləyni işorə kardedə və hamyedə:”bəy bəyonış omute”.bəyoni çı insoni jimoni ozavziye iyən təkamulədə və tərəğği iyən mədəniyyəton bə əməl omeyədə qıləy fovğəladə rolış mevcude.ehanə ın dıjdə nemət bıənəbe,inson hiçvaxti ıştə elmon iyən təcrubəon de hostonə formə bə omə nəslon rosney nıəzni və bə insoni elm, din, əxloğ iyən sivilizasiyə boyis nıəbi.

Peşonə ayə bə insoni yod Xıdovəndi bəy baxş kardə maddi iyən mə`nəvi neməton dənoydə və əy de ın neməton həyğiyə soybi oşno kardedə.joqo ki,hamyedə:”Həşi iyən ovşım de qıləy mıəyyənə hisobi hərəkət kardedən”.(ayə-5).

Həşi bo insoni iyən bo co coninə məxloğaton qıləy dıjdə neməte.çıro ki,həşi nur iyən çəy               hərorət nıbu, bo coninə məxloğati zəmini dimisə jimon kardey mumkin nibəbe.həşi nur iyən hərorət zəmini dimisə hərəkət kardə har qıləy bəyjiyə mevcudati əsliyə sərçeşməy və ilahi dıjdə nemətonku hisob bedən. bejəyon ruşd və ozavziye,xorəki maddəon hozzı bıey,voşi voye və vavazon qıniye,qırd ımon ilahi bərəkət və nemətonku bə hisob omeydə.

Ovşım həm deştə səhmi çı insoni jimonədə qıləy əhəmiyyətinə rol ifo kardedə.ovşım,bəşəvnəy toykiyətiyədə ço və çıroği rolisə əlovə,çəy cozibə ki,okeyanon ovi rostbe iyən okıriyedə bıə mənşəy,bo dıyoonədə jimoniri qıləy amil həm bə hisob omeydə.

Umumən osmoni kurəon sabitə hərəkət və de qıləy co təbiri,ovşımi çı zəmini qırdo qardey və zəmini ıştə iyən həşi ətrofədə hrəkət kardey ki,bə şəvı-ruji mınəzzəmə şikilədə bə əməl omey boyis bedə və çımi nəticədə sor, manq iyən mıxtəlifə fəslon bə əməl omeydə.ımon qırd bo insoni jimonədə qıləy nəzm bıey xoto,ilahi tərəfiku bıə nemətin və ehanə ımon dəğiğ iyən nəzminə şikilədə hərəkət nıkon,çı bəşəri jimon de problemon dimbədim bome.

Nəinki,fəğət çı osmoni planemt iyən kuron qıləy vey dəğiğ nizomışon heste,çəvon həcm və cozibə mığdor iyən çəvon iyande miyono fosilə həm,bə qıləy dəğiğ nəzm və hisobi əsose.beşək,çın koonku har qıləyni bə iyande bıqınon,həşi qalaktikadə dıjdə problemon icod bəkarde və çəy bəpeştə həm bəşəri jimoni nəzm həm bəyənde bəqıniye və boəy ziyodə muşkilon bə əməl bome.de qıləy co iborəti həşi qalaktikədə jıqo qıləy dəğiğ iyən nəzmə tərtib hakime ki,ımruj hətto vəomədə bın dıjdə kompleksədə bıə hodisəon ləzə və anon və dəyğəon proqnoz kardey bəbe.

Ərrəhmoni mıborəkə surə 6-ə ayədə bə qırd mevcudaton min cumlə beməyon və doon Xıdovəndi mığobilədə təslim bıey işorə kardedə və hamyedə:”və rəsəy və do(boəy)səjdə kardedə”.

Çı bejəyon iyən doon səjdə kardey,çəvon çı insoni mənfəəton royədə və xılğəti ğanunon mığobilədə beğeyd iyən beşərtə təslim bıey mənoədəy.qıləy məsir və ro ki,Xıdo boəvon təyinış kardə və əvon həm bə hiç qıləy benəzməti ro nıdoə holədə bəştə roy dəvom doydən.ın ayə zimnədə  bə tohidi sırron işorə kardedə.çıro ki,har qıləy beməy donədə iyən livədə pərvərdıqore-aləmi əzəmət iyən elmi əicibə çiyon mışohidə bedə ki,deçəy əmri əvon zəminku xaric bedən,ruşd kardedən  və ozavziyedən.

Ərrəhmoni mıborəkə surə 7 iyən 9-ə ayəonədə hamyedə:”və osmonış  bərpo karde  və(bəvədə) mizon iyən ğanunış noe ta ıştə mizoniku nıdəvardon(və ədolətiku mınhərif nıbon) və vəzni bə ədoləti əsos bərpokənən və tavzoədə kam mənənən”.(7-9)....