Osmoniyə surəon-193

Osmoniyə surəon-193

Ərrəhmoni mıborəkə surə 6-ə ayədə bə qırd mevcudaton min cumlə beməyon və doon Xıdovəndi mığobilədə təslim bıey işorə kardedə və hamyedə:”və rəsəy və do(boəy)səjdə kardedə”.

Çı bejəyon iyən doon səjdə kardey,çəvon çı insoni mənfəəton royədə və xılğəti ğanunon mığobilədə beğeyd iyən beşərtə təslim bıey mənoədəy.qıləy məsir və ro ki,Xıdo boəvon təyinış kardə və əvon həm bə hiç qıləy benəzməti ro nıdoə holədə bəştə roy dəvom doydən.ın ayə zimnədə  bə tohidi sırron işorə kardedə.çıro ki,har qıləy beməy donədə iyən livədə pərvərdıqore-aləmi əzəmət iyən elmi əicibə çiyon mışohidə bedə ki,deçəy əmri əvon zəminku xaric bedən,ruşd kardedən  və ozavziyedən.

Ərrəhmoni mıborəkə surə 7 iyən 9-ə ayəonədə hamyedə:”və osmonış  bərpo karde  və(bəvədə) mizon iyən ğanunış noe ta ıştə mizoniku nıdəvardon(və ədolətiku mınhərif nıbon) və vəzni bə ədoləti əsos bərpokənən və tavzoədə kam mənənən”.(7-9).

Ərrəhmoni mıborəkə surə 9-ə ayə dəvomədə ijən bə ədoləti məsələ təkyə kardə holədə hamyedə:”şımə vəzni bə ədoləti əsos bərpokənən və tavzoədə bəkam mənənən”.

Insoni jimonədə mizoni əhəmiyyət anədəy ki,ehanə çı mizoni həmonə qədə nımunə yəni tavzo çı bəşəri jimoniku beqətəmon,bəşər çı əşyaon mıbodilədə bə ziyodə giriftorəti və muşkilon dıço bəbe.

Bə ın ayəon dığğət kardə holədə ruşin bedə ki,çı mizoni vucud qırd hestemoni aləmədə ısət çı isnoni camiyə iyən sosyal rabitəonədə bıbu ya ko və ticorəti kəsb kardeyədə bıbu,ımon həmmə çı Xıdovəndi boho ğeymətinə nemətonkuon.

De ın tərtibi bın ayəonədə Xıdovəndi mizonış hestemoni aləmədə  ğərolış doe ta insonon bəvədə tuğyon nıkon və çı ədoləti royku benışon.həmçinin bə ədolət iyən vəzni məsələ de qıləy məxsusə formə işorə kardedə və çı insononku tələb kardedə ki,qıləy əşyo həvatə və məhsulon mubadiləon zəmonədə vəzniku bəkam nıkon.

 Ərrəhmoni mıborəkə surə 10-ə ayə bə zəmini soyəx omə və hamyedə:”Xıdovənde-Xalığ zəminış bo xəlayiği ğərolış doe”.ın zəmini kurə ki,iyo de ilahi neməti nomi zikr bıə və co ayəonədə əy de qofe nomi zikr kardedə.yəni bo qırd məxloğati qıləy xatırcəm iyən hozzıə ğərolqo,ısət çı cın bıbu ya ins və bo zəmini dimisə bıə qırd məxloğati.çəmə insonon veyni addiyə formadə çı zəmin iyən əyo bıə məxloğati oroməti dərk kardey zıneydənimon.əmmo,çoko ki,zəmin qədəy larzedə və həmmə çiyon bəyənde qıniyedə, bəvədə əmə insonon ın həyğəti dərk kardedəmon ki,çı zəmini oroməti və aşişəti çanədə bunim dıjdə neməte bıən.məxsusən əgər alimon çı zəmini ıştə iyən çı həşi qırdo qardey surəti barədə votə çiyon həxədə fikkəmon,de surəti qardə və hərəkət kardə zəmini oroməti əhəmiyyəti vey çok dərk bəkardemon.

Ərrəhmoni mıborəkə surə 11-ə ayədə bə coqlə neməti soyəx şedə.joqo ki,hamyedə:”ki,bəvədə  miyvəon və ğəmənəş bıə xımo boğon heste”.

In ayə bə çandə nev miyvəon və xımo boğon işorə kardedə.mumkine xımo nomi zikr kardey çəy bo bəşəri jimonədə bıə ziyodə foydə və əhəmiyyəti xoto bıbu.çı  xımo barədə bıə ın vəsv ki,sıftədə bənə məxfiyə ğəmənə forməy,peşo həmonə ğəmənə və poə və oj bedə və ıştə xımo xıçəon qıləy cəlbəkə tərzədə bə bi bekardedə.əve mumkine bəçəy odəmi bə heyrət dənoə reçinəti xoto yaan ki,həmonə ğəmənə və xolədə bıə mənfəəton xoto ın vəsfon iyo zikr bıə.

Ərrəhmoni mıborəkə surə 14 və 15-ə ayəonədə ilahi  co dıjdə ğudrəti nışonəon izoh doydə və bə inso-cıni xılğəti işorə kardə holədə hamyedə:”insonış bənə soğəli  bıə giliku ofəyəşe”.

Kərimə-Ğıron mıxtəlifə surəonədə de mıxtəlifə təbiron çı insoni xılğəti məbdə barədə sıxan votedə və nışon doydə ki,inson sıftədə tul və xokə bıə,peşo de ovi umuj qıniyə və bə gili formə dəşə. çən,peşo bənə yavə bu doə (lehmə)gili formə omə.peşo  qıləy dəçoknəti holış pəydu kardə və peşo bənə hışk bıə tuli formə dəşə.

Beşək,ın təbiron ın həyğəti bəyon kardedə ki,insoni bə vucud omey sərçeşmə,qıləy be erj iyən beçizə maddə və materiyə bıə.əmmo,Əzəmətinə Xıdovəndi jıqo qıləy be erjə maddəku jıqo qıləy məxloğış soxte və hozzış karde ki,çı aləmi qırd məxloğti əşrəf və barzə qıləy be.ım həm bə ın məno işorəy ki,çı insoni həyğiyə erj və ğeymət çəy həmonə ilahi rufədə təşkilış pəydu kardə.

Ərrəhmoni mıborəkə surə 15-ə ayədə çı cıni xılğəti barədə jıqo hamyuedə:”və cınış çı şoləvər bıə otəşiku ofəyəşe”.insoni məbdə və xılğət çı tuliku bıə holədə,çı cıni xılğət vo iyən otəşe və çı xılğəti məbdə jıqo dıcurnəti çı insonon de cınon miyono bıə ziyodə tafut və fərğon sərçəşməy.