Osmoniyə surəon-194

Osmoniyə surəon-194

Ərrəhmoni mıborəkə surə 14 və 15-ə ayəonədə ilahi  co dıjdə ğudrəti nışonəon izoh doydə və bə inso-cıni xılğəti işorə kardə holədə hamyedə:”insonış bənə soğəli  bıə giliku ofəyəşe”.

Kərimə-Ğıron mıxtəlifə surəonədə de mıxtəlifə təbiron çı insoni xılğəti məbdə barədə sıxan votedə və nışon doydə ki,inson sıftədə tul və xokə bıə,peşo de ovi umuj qıniyə və bə gili formə dəşə. çən,peşo bənə yavə bu doə (lehmə)gili formə omə.peşo  qıləy dəçoknəti holış pəydu kardə və peşo bənə hışk bıə tuli formə dəşə.

Beşək,ın təbiron ın həyğəti bəyon kardedə ki,insoni bə vucud omey sərçeşmə,qıləy be erj iyən beçizə maddə və materiyə bıə.əmmo,Əzəmətinə Xıdovəndi jıqo qıləy be erjə maddəku jıqo qıləy məxloğış soxte və hozzış karde ki,çı aləmi qırd məxloğti əşrəf və barzə qıləy be.ım həm bə ın məno işorəy ki,çı insoni həyğiyə erj və ğeymət çəy həmonə ilahi rufədə təşkilış pəydu kardə.

Ərrəhmoni mıborəkə surə 15-ə ayədə çı cıni xılğəti barədə jıqo hamyuedə:”və cınış çı şoləvər bıə otəşiku ofəyəşe”.insoni məbdə və xılğət çı tuliku bıə holədə,çı cıni xılğət vo iyən otəşe və çı xılğəti məbdə jıqo dıcurnəti çı insonon de cınon miyono bıə ziyodə tafut və fərğon sərçəşməy.

Ərrəhmoni mıborəkə surə 17-ə ayədə bə həşi peme iyən ğurub kardey işorə kardedə və hamyedə:”Əv,çı dıqlə məşrığ iyən dıqlə məğrıbi pərvərdıqore”.

Dırıste ki,həşi sori ərzədə haruj iqlə noxtəku pemedə və  iqlə noxtədə həm ğurub kardedə,eşedə və sori rujon mığdorədə məşrığ iyən məğrıbış heste,əmmo bə həşi şimol iyən cənub ğutbi dığğət kardeyədə həyğətədə,həşi dıqlə məşrığ iyən dıqlə məğrıbi bıey mışohidə bəkardemon və əmandəni çə dıqlə miyone. Im nizom ki,çı sori de ziyodə bərəkəti pur bıə ço fəsli bə  əməl omey məbdəy,ımi bəyon kardedə ki,çı zəmin,həşi iyən ovşımi qıləy dəğiğə nizom və bə nəzmi əsos qıləy xılğətış mevcude.

De ın ko əloğədor Məarici mıborəkə surə 40-ə ayədə omə:”bə məğrıb iyən məşrığon rəbbi ğəssəm bıbu....”.bın ayədə ki,bə məçrığon iyən məğrıbon ğəssəm hardey bıə,çı həşi sori ərzədə qırd məşrığ iyən məğrıbon,nəzədə qətey bıə.qıləy holədə ki,Ərrəhmoni mıborəkə surə 17-ə ayə fəğət bə həşi peme iyən nıştey pebemoni və eşey ğovsi işorə kardedə......  

Ərrəhmoni mıborəkə surə 26-ə ayədə çı insoni fani bıey bəçəy yod dənoydə və hamyedə:”hakəs ki,zəmini dimisəy fani bəbe və fəğət əzəmətinə zotı soyb və əziz bıə ıştı pərvərdıqor baği bəmande.(26-27-ə ayəon).mıfəssır və təfsirəvonon nəzəku fəno iyən məhf bıey,iyo mıtləğə fəno mənoədə ni,bəlkəm bə bəğa və dayimi həyoti qıləy qədə bə mənoədəy.qıləy dəvardəcoye ki,bə əbədiyə jimoni rəseyro bəpe çəyo dəvardo. Ayə həyğətədə bə insoni yod ımi vardedə ki,dınyo bəğa və andəco ni,inson məbodə bəy dıl dəvasto və çı Xıdovəndi royku bımando!.

Ərrəhmoni mıborəkə surə 27-ə ayədə bə Xıdovəndi cəmol iyən cəlol sıfəton işorə kardedə.zotış pok bıə Xıdovənd bənə elm,ğudrət iyən həyoti bıə subutiyyə sıfəton bənə harcurnə ayb iyən noxsani bıə səlbiyyyə sıfəton.fəğət Xıdovənde-Xalığ çı  jıqo sıfəton soybe və bın aləmədə  dayima baği iyən bərğərole və əmandəni mevcudaton həmmə fani və mıvəğğətiye.