Osmoniyə surəon-195

Osmoniyə surəon-195

Ərrəhmoni mıborəkə surə 26-ə ayədə çı insoni fani bıey bəçəy yod dənoydə və hamyedə:”hakəs ki,zəmini dimisəy fani bəbe və fəğət əzəmətinə zotı soyb və əziz bıə ıştı pərvərdıqor baği bəmande.(26-27-ə ayəon).mıfəssır və təfsirəvonon nəzəku fəno iyən məhf bıey,iyo mıtləğə fəno mənoədə ni,bəlkəm bə bəğa və dayimi həyoti qıləy qədə bə mənoədəy.qıləy dəvardəcoye ki,bə əbədiyə jimoni rəseyro bəpe çəyo dəvardo. Ayə həyğətədə bə insoni yod ımi vardedə ki,dınyo bəğa və mandəco ni,inson məbodə bəy dıl dəvasto və çı Xıdovəndi royku bımando!.

Ərrəhmoni mıborəkə surə 27-ə ayədə bə Xıdovəndi cəmol iyən cəlol sıfəton işorə kardedə.zotış pok bıə Xıdovənd bənə elm,ğudrət iyən həyoti bıə subutiyyə sıfəton bənə harcurnə ayb iyən noxsani bıə səlbiyyyə sıfəton.fəğət Xıdovənde-Xalığ çı  jıqo sıfəton soybe və bın aləmədə  dayima baği iyən bərğərole və əmandəni mevcudaton həmmə fani və mıvəğğətiye.

Ərrəhmoni mıborəkə surə 31-ə şərifə ayə bəpeştə çı ğıyoməti mıhosibə iyən çı miadi kali xısusiyyəton barədə sıxan votedə ki,bo mucrim iyən qınokoron eyni holədə təhdid bıə holədə,bo muminon perosney vositə və bəçəvon aqahəti,oğoəti iyən dıliqaməti boyis bıbu.ğıyoməti ruji Xıdovənde-Aləm çı inso-cıni qırd əməl,sıxan iyən niyyəton təhğığ bəbe və bəçəvon hisobi dəğiğə formadə rəsey bəbe və bəçəvon kardə əməlon mınosib,bəvon mıkofat iyən cəzo təyin bəbe.həlbəttə,bə ın məsələ çəmə ın dınyo jimonədə bıə bovə,bəçəmə jimonədə bıə nemətonku bəhrə bardey təsir kardedə......

Bın surədə bə ğıyoməti ruji ayid bıə məcmuəvari ayəonku çok-çoki oşko və ruşin bedə ki,həmonə ruji aləmi ısətnə nizom iyən sistem kulliyə formadə bəyənde bəqıniye və dınyo qırd vıronədə hovlnok və dəhşətinə hodisəon bə əməl bome.astovəon,planeton,zəmin iyən osmon əvəz bəbe və təsəvvır kardey nıbə məsələon bəvə bome.çoko ki,37-ə ayədə hamyedə:”bə zəmon ki,osmon poə be və bənə sıə kardə bıə sısıncinə ruəni bəbe”.

Ğıyoməti səhnədə jıqo hovlnok və tarsnokə hodisəon elon kardey,bə həmmə kəsi yəni bə mumin iyən qınokoron qıləy xəbərdorətiye və həmçinin Xıdovəndi tərəfiku qıləy lutfe.liza,çəy bədiqə tikror kardedə ki, ”çən,ıştə pərvərdıqori kom neməton inkor kardedon?”.

Bın ruji mucrim iyən qınokoron çəvon sima və çehrəku zıney bəbeyn və ın bın mənoədəy ki,çı inson fik iyən əməlon çəy ıştə çehrədə mıəyyən və oşko bəbe.peşo mucrimon de oxonə zılləti yəni çəvon səy mu və xaçonku qətey bəbe və bə cəhəndımi səmt şodey bəbe.ım qıləy cəhəndıme ki,hejo cinoyətkoron əy bə həşə jeydən  iyən inkor kardedən.həyğətədə,ğıyoməti,vəhışt iyən cəhəndımi inkor kardə və bəy bovə nıkardey çı insoni bə cəhəndım şıey amile.əvon çı otəş iyən tat və sustunə ovi miyono hərkətədə bəbeyn.

Ərrəhmoni mıborəkə surə 46-ə şərifə ayə bə vəhışti əhli soyəx şedə və mislışon nıbə iyən şovğənqizə nemətonku ibaxşi aşmardedə ta de cəhəndımi əhli dardnok və şiddətinə cəzoon mığoyisədə har qıləyni ruşin bedə.”və bo hakəsi ki,ıştə pərvərdıqori məğamiku bıtarso,dıqlə(vəhışti)boğon heste”.

Beşəkkədə formadə Xıdovəndi çandə qılə vəhışti ıştə salehə bandəon ixtiyorədə ğərol bədoe ki,əyo şıe-omey heste.peşo ın dıqlə vəhışti jıqo vəsf kardedə:ə dıqlə vəhışti boği çandə nev nemət və de şoxə pur bıə doonış heste və tərovətine.bə dıqlə vəhıştədə dıqlə çeşmə cariye.peşo bə vəhışti miyvəon işorə kardedə və hamyedə:”bə dıqlə boğədə har miyvəonku dıqlə nev mevcude”.

Vəhışti miyvəon komilən nevbəneve və har qıləyni bəsə yəndesə veyçok və cəlbəkəy.ım qıləy holədəy ki, vəhışti əhli astərış avşımiku bıə xolçəon sape təkyə bəkarde.