Osmoniyə surəon-196

Osmoniyə surəon-196

Ərrəhmoni mıborəkə surə 46-ə şərifə ayə bə vəhışti əhli soyəx şedə və mislışon nıbə iyən şovğənqizə nemətonku ibaxşi aşmardedə ta de cəhəndımi əhli dardnok və şiddətinə cəzoon mığoyisədə har qıləyni ruşin bedə.”və bo hakəsi ki,ıştə pərvərdıqori məğamiku bıtarso,dıqlə(vəhışti)boğon heste”.

Beşəkkədə formadə Xıdovəndi çandə qılə vəhışti ıştə salehə bandəon ixtiyorədə ğərol bədoe ki,əyo şıe-omey heste.peşo ın dıqlə vəhışti jıqo vəsf kardedə:ə dıqlə vəhışti boği çandə nev nemət və de şoxə pur bıə doonış heste və tərovətine.bə dıqlə vəhıştədə dıqlə çeşmə cariye.peşo bə vəhışti miyvəon işorə kardedə və hamyedə:”bə dıqlə boğədə har miyvəonku dıqlə nev mevcude”.

Vəhışti miyvəon komilən nevbəneve və har qıləyni bəsə yəndesə veyçok və cəlbəkəy.ım qıləy holədəy ki, vəhışti əhli astərış avşımiku bıə xolçəon sape təkyə bəkarde.adətən  inson bə zəmon təkyə bəkarde ki, qıləy oromə muhitədə və vey barzə əmniyyətədə bəbeyn.ın təbir çı vəhışti əhli rufi iyən mənəvi cəhəto qıləy komilə əmniyyətədə bıeye.

Təbiiyi formadə axırətədə ilahi neməton qıləy çini ki,çəmə zıvon iyən sıxanonədə vırə bıqəto.ın vəsfon boçəy xotoye ki,ıştə dərki mığdorədə ilahi oxoş nıbə nemətonku i hissə dərkkəmon.

Vəhışti dıqlə boğonədə bıə rəsə miyvəon dastrəsədəy və boçəy çıniyero hiç qıləy zəhmət kəşey lozım ni. vəhıştədə ilahi coqlə nemətonku pokə jimoni həmroon mevcudətiye.joqo ki,hamyedə:”həmonə vəhışti ğəsronədə jenon heste ki,fəğət bəştə jimoni həmroon xıyə kardəşone.(fəğət bəvon aşığin) və çımi bənav hiç qıləy inso-cıni dast bəvon rəsəni(56-ə ayə)”.

Binobərin bəvon dast qıniyəni və əvon har nəzəku pokin.vəhışti jenon fəğət bəştə jimoni həmroon aşığin və fəğət bəvon dılışon dəvastə.ım həmməysə dıjdə qıləy imtiyoze ki,əvon fəğət ıştə jimoni həmroon həxədə fik kardedən və sıvoy əvon həni çı co hiçkəsi  barədə əndişədə nin.əvon bənə yağut iyən mərconin.Kərimə-Ğıron de ın təbiri bəçəvon lətofət iyən vəsf nıbə reçinəti işorə kardedə.

Ərrəhmoni mıborəkə surə 60-ə ayə ın  nuktə de ziyodə umu çəyku bəhs kardedə ki,:”bəqəm çı ehsoni mıkofot ğərəz ehson ni”?.aya ımon ki,dınyoədə çokişon kardə,ğərəz ilahi çokə mıkofati co çi çəş kardedən?.