Ğərbədə insonə həxon

Ğərbədə insonə həxon

Bın rujonədə dınyoədə ziyodə sədo kardə xəbonku qıləyni,Dınyo Beynəlxalğ Məhkəmə  bə İroni çı Amerkə İbıə Ştaton barədə  bıə şikoyəti doə ray be.bə Hollandiyə Haağə şəhrədə bıə Beynəlxalğ Məhkəmə  hakimon bekardə muhimmə ğəroli əsos,əvon çı Amerkə İbıə Ştaton İroni molon qətey xoto bıə İroni şikoyəti həxədə çı Amerkə vəkilon etırozon ki,ğeydışon kardəbe çın məhkəmə səlohiyyətış ni bə ın ko bırəso,rəddışon kardə.

İroni Amerkə İbıə Ştatonku şikoyəti pərvəndə dəvardə əvəsori bə Dınyo Beynəlxalğ Məhkəmə vığandey be.bın dosyədə  İron çı Amerkəku  bə 1334-ə Həşi sori (1955-ə Milodi sori) bə çın dıqlə kişvəri yəni Tehron-Vaşinqtoni miyono imzo kardə bıə bə “dustəti” mığovilə rioyət nıkardey iyən bə İroni zidd ijən sənibəton sanksiyaon tətbiğ kardey xoto,bə Beynəlxal Məhkəmə şikoyətış kardə.bın pərvəndədə İroni rəsmi şəxson çın məhkəmə hakimonku tələbışon kardə ta təcili bə Amerkə tərəfiku bekardə bıə sankisiyon ləğvi ayid ray bıdon.zira,ın sanksiyon bə “əvəzış beşey nıbə” zərəlo-ziyonon boyis bedə...

Amerkə prezdent Donald Tramp dəvardə milodi sori mayə manqədə çı Amerkə iyən penc qılə kişvəri de İroni bastə bıə PAtomi Mıştərəkə Fəoliyyəti Planiku xaric bıeyış elon kardeşe.Tramp ın szişış de Amerkə torıxədə həmməysə yavə sazişonku qıləyni nomi ğeydış kardəbe.Tramp de  Atomi Mıştərəkə Fəoliyyəti Planiku xaric bıey bə ico bə İroni ələyh tojə sanksiyaonış həm noşe ki,ım sanksiyaon de həmonə ğeyd bıə sazışi imzo kardey ləğv bıəbe.çın sanksiyon iminə baxş 2018-ə milodi sori mayə manqi 6-iku bə icro noey be və peşonə manqonədə həm İroni nati ixracaati məhdud kardey ayid sanksiyonış bekarde ki,ım həm icro bıə holədəy.

Avropə İbemon çı Amerkə bın zikr bıə sazışiku xaric bıey və sankisyon ijən sənibəton bə İroni zidd oqordıney bəpeştə,elonış karde ki,çı Vaşinqtoni ın sanksiyaon tətbiğ kardey koyədə deəy bə ico hərəkət nibəkarde. Demiyən Avropə şirkəton veyni bə Avropə İttifoği doə təzminon rəğmən,əmmo ijən İronədə ıştə fəoliyyətınışon bə oxo rosne və çiyo beşin.zira,Trampi təhdiış karde ki,de İroni mıomilə kardə kəson həyğətədə de Amerkə mıomilə fırsəti çı dasto doey mənoədə bəbe.

İron İslom Respublikə çı Amerkə tərəfiku sanksiyon ijən oqordıney,bə İroni de Amerkə miyono 1955-ə milodi sori avqustə manqi 15-ədə bastə bıə mığovilə zidd zıneydə.Amerkə çın bəhs bıə şikoyəti bədiqə,elonış karde ki,de İroni imzo kardey bıə çın mığoviləku xaric bedə.....

De ın şikoyəti əloğədor Beynəlxalğ Haağə Məhkəmə 2018-ə milodi sori oktyabrə manqədə bə İroni zidd Amerkə tərəfiku oqordıney bıə sanksiyon barədə qıləy mıvəğğəti əmrış bekarde və bə humanistə prinsipon əsos, Amerkəku tələbış karde ki,dəmon,medikal ləvazimaton,xorəki maddəon,kaştemoni məhsulon, ğeyri-hərbi sərnişin təyyorəon  təchizoton və texniki xıdməton zəminə bo İroni hozzıko...

İroni çı Amerkəku coqləyni şikoyət çı İron İslom Respublikə 2 milyard erjədə bıə puli de Amerkə vositə blok kardey məsələ be.bə pərvəndə və dosye ko rəsey həm,oktyabrə manqədə bino be. İbıə Ştaton Məhkəmə de bənə İroni bomba noey koonədə dastış bıey bıə puçə ittihomon,çı İroni blok bıə nati bəroməonku təğribən dı milyard dollarış de bə həmonə bomba tıpemonon hodisəonədə ğıboni bıəkəson ayləon doey iddio peqətey hukmış sadir kardəbe.

Nəhoyətən,ım Beynəlxalğ Haağə Məhkəmə çı İroni bə Amerkə İbıə Əyoləton zidd bıə şikoyəti dosye barədə oxonə ray,bəhmən manqi 24-ə çoşanbə ruji elon be.