Osmoniyə surəon-197

Osmoniyə surəon-197

Vağiyə mıborəkə surə Kərimə-Ğıroni penco şəşminə surəy,Məkkədə nozil bıə və 96 qılə ayəku iborəte.

Qıləy zəmon ki,vağiyə(dıjdə ğıyoməti) bə əməl booy,ki,çəy bə əməl omeyədə(hiçvaxti) qıləy du ni. (həmonə vağeyə) idastə saru bəvarde və (idastə həm) bəpe bəbarde.bə zəmon ki,zəmin de şiddəti bəlarze və bandon vırto-volo bəbeyn və bənə pərokəndə bıə ğubari bəbe.(1-6)

Ğıyoməti vağeyə bərpo bıə zəmonədə əv jıqo bə əməl bome iyən zohir və oşko bəbe ki,hiçkəs əy inkor kardey nibəzıne.çıro ki,çəy bənav bıə hodisəon anədə dıjd iyən şiddətin bəbe ki,bəçəy şiddəti xoto,bandon həmmə bəyənde bəqıneyn və volo bəbeyn və bənə ğobari pərokəndə bəbeyn.ayəon ın nuktə bəyod dənoydən ki,ğıyoməti ruji nəinki,qırd kayinat əvəz bəbe,bəlkəm insonon insonon həm əvəz bəbeyn və çəvonku idastə saru və iqrup həm bəpe bəşeyn.zolım iyən təkəbbırinə fərdon suğut bəkardey,beyji bəşeyn və coqləyni dastə ki,muminə məzlumon iyən salehə bandəon çı iftixori ğalə barzə məğamədə bəbeyn.çəvonku idastə çı cəhəndımi nığılə vırədə bəbeyn və coqlə dastə həm vəhışti əla illiyun və barzə vırədə bəbeyn......

Dıjdə ğıyoməti vağiyə bə əməl omey bəyoni bəpeştə,həmonə ruji bə milləti holon formə işorə kardedə və əvoni bə se dastə təğsım kardedə.joqo ki,hamyedə:”şımə (insonon həmonə ruji) seqlə dastə bəbiyon”.

Iminə dastə yəmin ya rostəvıjə dastəy ki,əvon baxtəvər iyən xoşholin.əvon əkəsonin ki,çəvon naməye-əmal bəçəvon rostə dasti doey bəbe.ğıyoməti ruji ın ko bo mumin,çokə ko soybon iyən baxtəvərə insonon rəmz iyən nışonə bəbe.əvon çanədə hərəbaxt və xoşbəxtə insononin. Çəvon səodət iyən hərəbaxtəti qıləy həddo-əndozəş ni.

Peşo  bə dıminə qrupi işorə kardedə və hamyedə:coqləyni dastə əshabi-şimal yəni çəpə dastən.əvon şəği iyən bədbəxtonin.bədbəxt iyən siyuə bəxtə fərdon ki,çəvon əməli dəftəron bəçəvon çəpə dasti doey bəbe və ım həm çəvon curm iyən cinoyəton rəmz və nışonəy ki,əvonış jıqo bədbəxt kardəşe.həyğətədə,ayə çəvon oxonə dərəcədə bıə şəğovət və siyuə bədbəxtəti bə təsvir kəşedə.

Nəhoyətən,iminə dastə jıqo vəsf kardedə:”navəjənon,navəjənon.əvon Xıdovəndi dərqoyədə mığərrəbonin.de neməti pur bıə boğonədə(vırəşon heste)(11-13-ə ayəon).

Əvon əkəsonin ki,nəinki,imonədə çı cokəsonku bənavin və navədə şedən,bəlkəm xeyə əməl və insoni sıfət və əxloğədə həm bəsə cokənsə bənavin.əvon bo milləti usvə və ulqun.bə həmonə dəlili xoto,əvon çı Xıdovəndi dərqoyədə mığərrəb və nezə şəxsonkuon.həmonə Vağiyə mıborəkə surə 15 de tosə 26-ə ayə bo mığərrbin hozzı kardə bıə vəhışti nemətonku sıxan votedə.ə neməton ki,bə insoni dıl nıştedə və rufi oj kardedə.joqo ki,hamyedə:

“(De cəvahiraton)dərostə bıə və ğeymətinə taxton sape.qıləy holədə ki,de iyande dimbədim, təkyəşon doə.(15-16-ə ayəon).

Barzə məğami soybon de neməti pur bıə vəhışti boğonədə vırəşon heste və çı vəhışti maddi iyən mənəvi nemətonku bəhrə bardedən.