Şiyə torıxi yolə alimon-1

Şiyə torıxi yolə alimon-1

İmom Zəmon(ə)-I ğeybəti bəpeştə həzo dısa sor torıxi dırozi təşəyyu və şiyə aləmədə çandə həzo dıjdə fəğih və alimon ozavziyən ki,deştə elmi nuri ilahi hidoyətışon ruşin oqətəşone.çəvon har qıləy sərquzəşt məsənine.

Islomi fəhənq iyən mədəniyyətədə dini alimon qıləy vey barzə məğamışon heste.islomi əzizə peyğombər dınyo ofəyə Xıdo oxonə rəsul həzrəte Muhəmməd(s) alimonış çı zəmini ço,peyğombəron canişin iyən ıştə varisonış elon kardə.islomə din Xıdo oxonə dine ki,çəy bəpeştə həni hiç qıləy peyğombər vığandə bıəni.çıro ki,inson bə kəmol iyən ruşdi qıləy mərhələ rəsə be ki,kardey əzıni ıştə əbədiyə hərəbaxtəti komilə bərnomə de xatəm və oxonə vığandə bıə peyğombəri vositə əy ğəbulko və bənə qıləy boho ğeymətinə irsi hifzko oqəto.oxonə peyğombər ki,Xıdovəndi bandəonku qıləyni be ki,bın fani dınyoədə bənə co insonon I mıddət jimoni bəpeştə bə axırəti dınyo hərəkətko.əmo,islomi təlimon bəpe de tobə bəşəri jimoni oxonə ruji bın zəmini kurədə bəyji bımando.peyğombər(s)-I xıyzoni donzə qılə nurani iyən məsumə imomon(ə) dı əsr islomi zuhuri bəpeştə bıə huzur və iştirok,boyis be ki,islomi nuyə toğə con bıqəto və çı hodisəon tufoniku və çı nifoğ iyən inhirofon xərobəkə iyən vironəkə oveyz və seylabiku ıştə coni solim oqəto.əmmo,bəşəriyyəti aləmi bo ilahi oxonə  dini oqəteyro,ilahi komilə insoniyyəti nımunə yəni donzə imomon ıştə coniku dəvardin.

De Xıdovəndi irodə donzəminə İmom(ə) milləti çəşonku ğayibe ta nəinki,fəğət insonon,bəlkəm dınyo xılğət çəy misliş nıbə vucudi pənohədə sabit bımando və çə həzrəti əzizə con çı nomərdon zərəliku əmonədə bımando.bə rəvoyəton əsos Vəliyyi-Əmr(ə)-I ğeybəti dəlil ilahi sırronkuye ki,çı zuhuru bədiqə oşko bəbe.əmmo,demi ijən bo umum milləti dərk və famero bıə dəlilon  rəvoyətədə nəğl bıə.min cumlə milləti imtovon kardey,insoni hərəbaxtətiyədə ğeyri ilahi hukuməton ocizəti oşko bıey,insonon perosney bo aləmi dayim mandeyro feyzi vositə bıə imomi hifz kardey və oqətey,dınyo ilahi ədolətinə hukuməti bərpo kardeyro hozzı bıey və sayirə.əmmo,qıləy zəmon ki,məsumə İmomon(ə) ki,ğeybəti pardə peştonon,ciddi cəhd kardə,pərhizkorə alimon,dini təblığ kardey,ilahi təlimon təbyin və milləti hidoyəti vəzifə bəştə ehdə peqəteydən ki,bə rəvoyəton əsos,çəvon Xıdovəndi palu Bəni-israyli peyğombəronku həm bəpeyin.

Alimi erj iyən əzəmət iyən çəy mənzilət,mevğıyyət iyən ğədri barədə ım vəse ki,Məcidə-Ğıron elmi soybon Xıdo iyən çəy mələkon bəpeştə de şoydon nomi boştə vahidəti elon kardedə.Xıdovənde-Aləm Kərimə-Ğıronədə joqo hamyedə:”Xıdo qıləy holədə ki,ədoləti bərpoəkəy,şoydəti kardedə ki,ğərəz əv hiç qıləy mə`bud ni və firiştəon iyən elm soybon həm şoydəti kardedən ki,sıvoy əv hiç qıləy mə`bud ni”(Ali-İmran-18).bın ayədə elm soybon ki,tohidi şərbətışon çaştə və çəvon dıl de imoni nuri mınəvvəre,Xıdo iyən çəy məlayikon bəpeştə ğərolış qətə.

İmom Hadi(ə) hamyedə:”ehanə çəmə Ğayimi bəpeştə çı alimon vucud bıənəbe ki,bə Xıdovəndi tərəf səlo jeydən və bə deçəy vucudi hidoyətə pəydu kardedən və de ilahi huccət (və dəlilon) çəy dini mıdofiyə kardedən və Xıdo ocizə bandəon iblis iyən çəy tərəfdoron toriku ozod kardedən,beşək,qırd millət Xıdo diniku oəqardin”.