Osmoniyə surəon-198
Osmoniyə surəon-198
Əvon de unsiyyəti pur bıə məclisədən və şoyvonəti kardedən.çı vəhışti əhli uns məclisədə əvon dimbədim bəsə taxtonsə nıştən və çəvon sima və çehrədə şoyvonəti və xoşholəti vey barzə noxtədəyki,de hiççi əy mığoyisə kardey nibəbe.həyğətədə,çı vəhışti əhli muhimmə ləzzətonku qıləyni çəvon bəico cəm bıə məclisone.
Hejo ıştə cıvonəti tərovəti oqətə nevcıvonon çəvon qırdo qardedən və çəvon xıdmətədən.ın reçinə nevcıvonon de kuzə və ğədəhon və pok və təhurə şərovon çəvon ətrofədə qardedən və əvoni sirov kardedən.əmmo,nəinki,odəmi ağl iyən huşi bardə və məst kardə şərov.vəhışti əhl əy peşomeyədə nə çəvon sə bədəje və nə əvon məsto-xumor bəbeyn.çın neməton dəvomədə hamyedə:” və miyvəonku ki,harçi bıvıjnon və pərəndə qujdi har nevi ki,meylışon bıbu”.
Peşo,bə co neməti yəni bə pok iyən reçinə jimoni həmroon işorə kardedə bə hamyedə:”bənə mirvari sədəfədə punhon bıə dıjdə çəş iyən reçinə huriyon(çəvon ixtiyorədən)”.
Çın neməton zikri bəpeştə hamyedə:”qırd ımon çəvon kardə loyığinə koon mığobilədə(doə bıə) qıləy mıkofate”.
“Əyo nə qıləy hədərə sıxan bəməseyn və nə qıləy qınoə(sıxan)”. əyo harçi heste lutf, reçinəti, mətonət və pokətiku iborəte.ayə dəvomədə hamyedə:”(əyo)ğərəz səlom və dorudi co qıləy sıxan ni”. əyo de məhəbbət,səfo iyən dustəti pur bıə məclison mevcude,əvon əyo fəğət səlom və dorud bəməseyn.Xıdovəndi,məlayikon iyən vəhışti əhli bə iyənde doə səlom və dorud.
Vağiyə mıborəkə surə 27-ə ayəku jəqoşə,”Əshabi-Yəmini” yəni rostə dasti odəmon de ğəşənqə iborəton elon kardedə.qıləy hərəbaxtə cəmyət ki,bə ilahi imtovonədə səbarz bıey xoto,çəvon nameye-əmal bəçəvon rostə dasti doey bəbe.əvon həm de neməton pur bıə vəhıştədə bıey xoto, xoşholin və şoyvonəti kardedən.həlbəttə,əvon dərəcə cəhəto çı “əssabuğuniku” yəni navəjən və navədə şıə kəsonku saru və beyjin.
Seminə dastə ki,əvon “Əshabu-Şimol” yaan ki,çəpə dasti odəmonin.əkəson ki,çəvon nameye-əmal bəçəvon çəpə dasti doey bəbe.əvon çı sutunə vo iyən tatə ovi miyonon və qıləy ğəliz iyən suyə duyəvilə soğnədən.qıləy soğnə ki,nə sardətiş heste və nə orombaxşe.
Vağiyə mıborəkə surə 45 ta 48-ə ayəon çı əshabe-şimoli bə ın yavə tale giriftorəti dəlili,seqlə çiyədə xulasə kardedə:iminə dəlil ıme ki,əvon çın dınyo bənav vey məğrur bin və ilahi neməton dılədə yol bıəbin və ıştə jimoni de eyşo-işrəti dəvordınedəbin.dıminə dəlil ıme ki,əvon bə yolə qınoon isror kardedəbin və əvoni əncom doydəbin.və seminə dəlil həm ım be ki,əvon ğıyoməti ruji inkor kardedəbin və bə həşə jeydəbin.əvon jıqo votedəbin:”aya qıləy zəmon ki,mardimon,tul iyən astə bimon,ijən sənibəton bəyji və rost kardey bəbemon? Aya çəmə dədə-bobon həm bəyji kardey bəbeyn?”.
Vağiyə mıborəkə surə 49 iyən 50-ə ayəon jıqo hamyedə:”vuji:nəyinki,fəğət şımə və şımə yolon, bəlkəm) qırd navkonəyon iyən oməkəson mıəyyənə ruji və`dəqoyədə cəm kardey bəbeyn”.......
Vağiyə mıborəkə surə 63-ə ayəku jəqoşə çı miad və ğıyoməti ruji dəlili bəyonədə bə xorəki maddon donə və tumi,bə ov iyən otəşi işorə kardedə ki,ımon bo bəşəri jimoniro seqlə muhim və əsosinə çiyonku bə hisob omeydən.sıftədə jıqo hamyedə:” aya harçi ki,kaştedon,mılohizə kardedon? (vindedon?)Aya əy şımə perosneydon ya əmə əy (perosneydəmon)”.
Oşkoye ki,çı insoni ko fəğət əvoni kaşteye.əmmo həmonə beməy və donon perosney ko,fəğət bə Xıdo məxsuse.alimon votedən ki,çı qıləy rəsəy bina xə soxtemonədə oko doey bıə qıləy təşkilot,çı qıləy çandə qılə zəvod və fabrikəş bıə qıləy sənaye şəhri təşkiloti əndozədəy.vey heyrətin iyən mırəkkəbe.
Xıdovənde-Xalığ çı qıləy donə və tumi dılədə qıləy vey qədə bəyjiyə huceyrə ofəyəşe ki,qıləy munbit və çokə şərayitədə ğərol qətə zəmonədə.sıftədə hejo çə həmonə xorəki məhsuli ıştən dıləku istifodə kardedə,tişi jeydə və rişə beğandə.peşo,de qıləy əcibə surəti çı zəminiku təğziyə bedə və ğida seydə və çə həmonə rəsəy dılədə bənə qıləy dıjdə labaratoriyə aparaton fəoliyyət nışon doydə və de ın tərtibi çəy miçə,şox və xıçəon iyən huşə bə əməl omeydə.nəticədə qahi vaxti iqlə tumiku çandə həzo tum perəseydə.”ehanə bıpyimone əy(hi) teğ və hışkə aləf bəkardemon ki,bə heyrət dəbəşiyon”.
