Osmoniyə surəon-202

Osmoniyə surəon-202

Hədidi mıborəkə surə 11-ə şərifə ayə milləti bə infoğ kardey tərəf tərğib iyən təşviğ kardedə:”Kiye ki,bə Xıdo çokə ğarz bıdo ta Xıdovənd əy boəy dı bərobərko və boəy ğeymətinə mıkofot heste”.

Bə pərvərdıqori ğarz doeyku mənzur iyən məğsəd,çəy royədə harcurə infoğ iyən baxş kardeye.ayəon infoğəkəyon de ğıyoməti ruji kərimə əcri mıjdəvoni doydə.qıləy ruj ki,imoninə merd iyən jenon çəvon nur çəvon və iyən rostə səmtədə de surəti hərəkət bəkarde.ğıyoməti ruj ki,çı insonon əğayid iyən əməlon təcəssım pəydu bəkarde və imon nur iyən ruşinəti surətədə cilvə pəydu bəkarde və kufr ki,mıtləğə formadə toykiyətiye, zılməti formaədə məlum bəbe.bın zəmon məlayikon muminon de çəvon (doon)jiku ruon cari bıə vəhışti boğon bəşorət bədoon və həlbəttə,ın dıjdə nicot pəydu kardeye.

Əmmo,mınofiğon ki,çı cəholət iyən nifoği toykiyətədə giriftorin,fəryod bəjəneyn və bo nuri kəsb kardero,bə muminon iltimos iyən lovə bəkardeyn.çəvon cəvobədə bəvon votey bəbe:bə dumo oqardənən və(dınyoədə) bo nuri bınəvənən.yəni ım vırə nuri kəsb kardə vırə ni və bəpe şımə əy dəvardə dınyoku de imon iyən salehə əməli vositə bə daston vardəbe.əmmo,ısət həni diye.bın zəmon çəvon miyono qıləy divo hayil bəbe ki,çəyhəm qıləy bəş heste ki,çəy dılə rəhməte və çəy bi və xaric əzobe.mınofiğon əvoni sədo bəjəneyn və bəvoteyn: bəqəm əmə deşmə nibimon? əmə deşmə bə ivrə jimon kardedəbimon və şımə kəno bimon.ısət çiç be ki,şımə çəməku co biyon və bə ilahi rəhməti şomil biyon və əmə jıqo bə əzobi giriftor bimon?əvon cəvobədə bəvoteyn: bəle, əmə bəico bimon,əmmo məktəb,əğedə iyən əməli cəhətoşemə deçəmə miyono qıləy dırozə fosilə mevcud be və şımə çı həxıku bə diyəro biyon.

Əvon dəvomədə əlovə bəkardeyn:şımə ıştənon bədaston dənoe və hejo çı peyğombəri(s) maqi iyən islomi rınə bırniye çəş kardedəbiyon.şımə miad iyən peyğombəri(s) dəvəti həxətiyədə şəkk kardedəbiyon və hejo bə dıroz iyən diyəroə oruzuon giriftor bedəbiyon.bın vəzyətədə maqi şımənış dəqəte və şımə kofir bıə holədə çı dınyoku şiyon.şəyton həm şıməş Xıdovəndi mığobilədə bə dastış dənoe.ımon şımə roonış deçəmə roon coş karde və şımə bə qıləy əbədiyə həlokət eqıniyon..

Hədidi mıborəkə surə 25-ə şərifə ayə peyğombəron vığandey hədəfi jıqo bəyon kardedə:”Əmə ıştə rəsulon de ruşinə mecuzə iyən dəlilon vığandemone və deəvon(osmoniyə)kitobon və mizon(pamuye vositə) nozil kardemone ta millət bə ədoləti ğıyomkon və oson nozil kardemone ki,bəvədə qıləy zumandə ğıvvə iyən bo milləti mənfəəton heste ta Xıdovənd bızıno kom kəs bəy iyən bəçəy rəsuli niyonədə komək kardedə.həyğətən,Xıdovənd ğəvi iyən məğlub bıənin ni”.

Kitobiku mənzur və məğsəd həmonə osmoniyə kitobone.mizon,vəzn kardey iyən pamuye vasistəy ki,deəy çı əməlon insonon pamuye bəbe və əv ilahi ğanun iyən hukome ki,çı çok iyən bevəcə çiyon pamuye meyare.

Ilahi yolə merdon yəni peyğombəron vığandey hədəf,ədoləti icro kardeye və hədəf həm ıme ki,milət ıştən ədoləti bərpo və icrokon.muhim ıme ki,millət jıqo hozzı bıbu ki,əvon ıştən ədoləti icrokon və ın roy deştə ıştən lınqi dəvardonn bışon.

De ın holi qıləy camiyədə çanədə çı milləti əxloği iyən etığodi səth və səviyə bəpe bışo,ijən fərdon pəydu kardey bəbe ki, tuğyongərəti kardedən və və bə ədoləti icro bıey ko mane bedən.liza,ayə dəvomədə hamyedə:”əmə osonımon enovne ki, bəvədə zumandə ğıvvə və həmçinin bo milləti mənfəəton heste”.

Bəle,ənbiya iyən pəyğombəron bo ədoləti icro kardey xoto,bə zəmon bəştə nəhayi iyən oxonə hədəfi rəseydən ki,çəvon dastədə çı osoni icraiyyə zəmonətış mevcud bıbu.ehanə oson bıənəbe,bo bəşəri jimon vey saxt və çətin əbi və çun osoni çı bəşəri jimonədə qıləy əsliyə rolış heste,Xıdovənde-Xalığ əy hoston iyən ziyodə şikilədə çəy ixtiyorədə ğərol doydə.