Osmoniyə surəon-213

Osmoniyə surəon-213

In ayə çı islomi peyğombər(s)i besəti iyən çə həzrəti  bo milləti hidoyətiro bıə bərnoməon hədəfi seqlə koyədə xulosə kardedə:ilahi ayəon tilovət,nəfsi təhzib iyən pok kardey və kitob iyən hikməti təlim.

Ayədə dığğət kardedə ki,peyğombər(s) omə ki,insonon həm elm iyən zıney zəminədə və həmən əxloğ iyən əməli sahədə perosno ta de ın dıqlə kəş-pəri vositə bə hərəbaxtəti osmoni səmt pərvozkon,bıpəron və ilahi roy və məsirədə hərəkətkon.

Peyğombər(s)-i zuhuri zəmonədə bıə yəhudiyon voteşone:ehanə Muhəmməd(s) bə risolət iyən peyğombərəti məbus bıəbu,çəy risolət bəmə şomil iyən ayid ni.Xıdovənde-Aləm bın surə de qıləy təmsili vardey,bəçəvon yod dənoydə ki,ehanə əvon ıştə osmoniyə kitobışon handəbe iyən bəy əməl kardəşonbe,həni ım sıxani nıəvotin.çıro ki,islomi peyğombər(s)-i zuhuri bəşorət əyo omə.joqo ki,hamyedə: “Tovrati şıkırnə kəson bə zəmon əvışon oko nıdoe.(çəy həxışon ədo nıkardeşone),bənə dırozə quşiye ki,kitobon şıkırnedən.(çəyku hiç qıləy bəhrə bardedənin).

Kərimə-Ğıron qıləy fəğət de Tovrati tilovət kardey ğane bıə məğrurə millət,çəy mehtəvo və məzmuni barədə fik-fam nıkardə və bəy əməl nıkardə heyvoni təşbih kardedə ki,beməxəti iyən nodonəti zərbul-misole.ım bın mənoədəy ki,bə osmoniyə kitobon malik bıey və əvoni həml kardey muhim ni,bəlkəm bəy əməl kardey muhim iyən foydənine.

Bə maqi dığğət  kardey Cumə surədə  bəhs bıə mevzuonku qıləyniye.Yəhudiyon ki,ıştəni qıləy vıjniyə bıə ummət zıneydəbin,qahi vaxti iddio kardedəbin ki,əvon çı Xıdo zoonin.qahi vaxti həm əvoni ıştəni bənə Xıdovəndi duston nışon doydəbin.Kərimə-Ğıron çəvon ım bedəlilə iddion mığobilədə hamyedə:”vuji:ım yəhudiyon əgər qımon kardodon ki,(fəğət)şımə çı Xıdo dustiyon, nəyinki, co millət,ehanə rost votedon çən,maqi oruzokənən”.

Ayədə bıə nuktə ıme ki,ehanə şımə rost votedon ki,şımə çı xıdo dustoniyon,çən,bə maq və mardey pişvoz beşənən ta bəştə məhbubi liğa iyən vindemoni səmt bışənən.çən,çıro anədə bə dınyo jimoni dəçıkəyopn iyən çı maqiku tarseydon?...

Cumə mıborəkə surə 7-ə ayədə bəçəvon çı maqiku bıə tars iyən vəhşəti işorə kardedə və hamyedə:”əmmo,əvon bə ıştə bənav vığandə çiyon səbəbi xoto,hiçvaxti maqi oruzo kardedənin və Xıdovənd sıtəmkoronku aqahe”.

Həyğətədə qıləy inson ki,maqiku tarsedə ya bə mardey bəpeştə bıə jimoni inonış ni və mardey ni bıey mənoədə bızıno yaan ki,ıştə əməli dəftəri jıqo siyo və toykiş kardə ki,ğıyoməti ruji bıə saxtə mıhkəməku tarsış heste.təbiiye ki,çı maqiku tarsi rəğ-rişə çı insonon ıştən yavə əmələdəy.

Cumə mıborəkə surə 8-ə ayədə çın bəhsi dəvomədə hamyedə:”(Ha pəyğombər ha!)bıvot:”şımə çəyku fərol kardə maq,hukmən deşmə vindemon bəkarde.peşo,bə niyon iyən oşko zınəkəsi səmt oqordıney bəbiyon.çən,əv şıməni şımə bə vırə rosnə çiyonku aqah bəkarde”.

Insonon bo maqiku vitey iyən fərol kardey xoto,nəxşə və planon kəşeydən.əmmo,çəvon qırd ım planon foydəş ni və oxoyədə maq iyən mardey bə qırd insonon soyəx omeydə.zira,maqi ğanun çın aləmi həmməysə vey umumi və kulliyə ğanune.ilahi yolə ənbiya və peyğombəron və həmçinin bəçəy dərqo nez bıə mələkon həmmə bəmardeyn və fəğət zotış pok bıə Xıdovənd bın dınyoədə baği bəmande.ilahi ədolətinə məhkəmədə iştirok kardey iyən bə əməlon hisobi rəsey həm çın aləmi ğanunonkuye.liza,bə maqi bəpeştə bıə tarsi bə oxo rosney həmməysə çokə ro, çı qıno iyən mırdolə çiyonku insoni ıştə əməlon pok kardey iyən dıli şışteye.zira,hakəs ki,hisob-kitobış pok bıbu,vəyo şıeyku hiç qıləy tarsış nibəbe....