Osmoniyə surəon-214

Osmoniyə surəon-214

Cumə mıborəkə surə 8-ə ayədə çın bəhsi dəvomədə hamyedə:”(Ha pəyğombər ha!)bıvot:”şımə çəyku fərol kardə maq,hukmən deşmə vindemon bəkarde.peşo,bə niyon iyən oşko zınəkəsi səmt oqordıney bəbiyon.çən,əv şıməni şımə bə vırə rosnə çiyonku aqah bəkarde”.

Insonon bo maqiku vitey iyən fərol kardey xoto,nəxşə və planon kəşeydən.əmmo,çəvon qırd ım planon foydəş ni və oxoyədə maq iyən mardey bə qırd insonon soyəx omeydə.zira,maqi ğanun çın aləmi həmməysə vey umumi və kulliyə ğanune.ilahi yolə ənbiya və peyğombəron və həmçinin bəçəy dərqo nez bıə mələkon həmmə bəmardeyn və fəğət zotış pok bıə Xıdovənd bın dınyoədə baği bəmande.ilahi ədolətinə məhkəmədə iştirok kardey iyən bə əməlon hisobi rəsey həm çın aləmi ğanunonkuye.liza,bə maqi bəpeştə bıə tarsi bə oxo rosney həmməysə çokə ro, çı qıno iyən mırdolə çiyonku insoni ıştə əməlon pok kardey iyən dıli şışteye.zira,hakəs ki,hisob-kitobış pok bıbu,vəyo şıeyku hiç qıləy tarsış nibəbe.

Cumə mıborəkə surə oxonə ayəonədə bə haftə həmməysə dıjdə ibodi-siyosi qırdbemoni yəni bə cımə nımoji işorə kardedə və bə islomi muhimmə ın fərizə işorə kardedə ki,bo imoni rəğ-rişəon zumandətiro veyə təsirış heste.

Cumə mıborəkə surə 9-ə ayədə Kərimə-Ğıron bə həmmə mısılmınon xitob kardə holədə hamyedə:”Ha imon vardə kəson ha! şımə bə Cımə nımoji vanq kardey beyədə,çən,bə Xıdo zikri səmt tadibəsə bıbənən və bıdə-bıstəni vabıdənən ki,ım boşmə vey çoke,ehanə bızınon”....

Cımə nımoji harçi bənav kollektiv surətədə bıə qıləy dıjdə ibodəte.ın ibodət bo qıləy insoni rufi təltif kardey iyən ıştə dıli çı məsiyyət və qınoku pok kardey xoto,umumi ibodəton təsiri ıştədə ehtivo kardedə.sosyal iyən siyosi nəzəku həm,haftəynə qıləy dıjdə konqrese ki,Həcci hasornə konqresi bəpeştə,həmməysə dıjdə islomi konqres bə hisob omeydə.

 Cumə mıborəkə surə 10-ə ayədə hamyedə:”Nımoj bə oxo rəsey bədiqə,zəmini dimisə pevolo bıbənən və Xıdo fəzliku tələbkənən və Xıdo ziyod zikrkənən,ğasbu ki,nicot pəydukənən”.

Kərimə-Ğıronədə ilahi fəzl,bə mıxtəlifə maddi iyən mənəvi mevzuon şomil bedə.harçənd,ilahi lutf benəhoyəte,əmmo bəpe inson boçəy bə dast vardero cəhdko.həlbəttə,kəsbo-ko iyən ticorəti ko bəpe de Xıdo zikri bəico bıbu və çəyku ğafil nımando.liza,Kərimə-Ğıron təkid kardedə ki,Xıdo vey ziyod zikrkənən və bə yod dənənən.Xıdo dayimi zikr kardey,çı ğəfləti rəğ-rişə sutuneydə və insoni çı perəxey iyən nicot pəydu kardey royədə ğərol doydə.....

Soron qıləyni Mədinədə bıə məxloğ bə hışkəsori iyən vəşyanəti dıço bıbəin və çı molon ğeymət bəpe rost bıəbe.Cımə ruji peyğombər(s) de Cımə nımoji xutbəon handey ko məşğul be.bın zəmon Şamiku qıləy kərvon ome ki,deştə xorəki məhsulonış vardəbe.bə adəti əsos bo kərvoni daxil bıey elon kardey xoto,təbl jıey bedəbe.Mədinə millət de ın sər-sədo məsey,dərəsin ki, kərvon omə rəsə və əvon de surəti bə vıjori səmt hrəkətışon karde.bın zəmon mısılmınon ki,bo nımoji fərizə bə vırə rosnero bə məçit cəm bıəbin,boştə ehtiyocon təmin kardero bə vıjori tərəf dastpoçə bin və cımə nımoji xutbəon handə peyğombər(s)-şon coyli haşte.fəğət i hissə kamə insonon məçitədə de peyğombər(s)-i mandin.

Cumə mıborəkə surə oxonə ayədə əkəson ki,Cımə nımoji xutbəon zəmonədə yali iyən coyli haştə və bə vıjori səmt vitəkəson mızəmmət kardedə və hamyedə:”bə ticorət iyən sətasponey vindeyədə,pərokəndə bıə,bəçəy səmt şıə və tıni səpoysə(xutbə handə holədə) vadoəkəson vuji: Xıdovəndi palu bıə çiyon,çı sətasponey iyən bıdə-bıstənisə vey çoke və Xıdovənd həmməysə çokə ruziədəy”.

Im qıləy holədə ki,ilahi mıkofot və bərəkot ki,cımə nımojiyədə mevcude və əvon peyğombər(s)-i moyizəon məseydən və mənəvi ruşd pəydu kardedən və ım de co hiççi mığoyisə kardənin ni. ehanə şımə çəyku tarseydon ki, şımə ruzi bəkam bəbe,bızınən ki,Xıdovənde-Aləm həmməysə çokə ruzi dokəse....