Osmoniyə surəon-218

Osmoniyə surəon-218

In ayə bə Xıdovəndi seqlə mərhələdə tərsim bıə benəhoyətə elmi işorə kardedə:sıftədə çəy elmi bə osmonon iyən zəmini qırd mevcudati,peşo çəy elmi bə insoni həmmə əməlon iyən bəçəy oşko və punhon kardə çiyon rəsey və seminə etap və mərhələdə çəy elmi insoni botın və niyyət,con və ğəlbədə dəvardə çiyonku xəbədo bıey bəyon kardedə.

Beşək,bə ın həyğəti dığğət kardey,bo insoni isloh iyən perəsey xoto,veyə təsirış heste və əy bə xılğəti hədəf iyən kəmoli rəsey xoto hozzı kardedə.əmmo,çun çı bəşəri perəsey vositəonku qıləyni,bə navkonə ğovm iyən umməton tale və sərnıvışti dığğət kardeye,əve 5-ə ayədə bə insonon xitob kardə holədə hamyedə:”aya çımi bənav kofir bıə kəson xəbə bəşmə omə rəsəni?.çən,əvon ıştə koy oxoşon çaşte və boəvon qıləy dardnokə əzob (heste).

Bəlkəm həm çəmə insononku veyni çı kali bəlo vində iyən viron bıə şəhron kəno dəvardəmon və çə ğovmon kufr iyən tuğyongərəti nəticəmon seyr kardə.əvon bə ilahi peyğombəron təkzib kardey dəlili xoto,bə jıqo qıləy  yavə sərnıvışti dıço bıəbin.həmonə bə həşə jıə iyən inkor kardə kəson de məğrurəti iyən təkəbbıri votedəbin:”aya (bənə əmə)qıləy bəşəri dılış heste əməni hidoyətko?”.jıqo qıləy çi mumkin ni.bəçəy xoto əvon kofir bin və həxıku dimışon qordıne.qıləy holədə ki,Xıdovəndi bəçəvon imon iyən itoəti ehtiyociş ni.

Təğabuni mıborəkə surə 6-ə ayədə bə ın məzmuni işorə kardedə ki,ehanə qırd koinat həm kofir bıbon,bə aləmi pərvərdıqori hiç qıləy zərəl rosney nibəzıneyn.həyğətədə,çəmə bə mehribonə Xıdovəndi tərəfiku bıə qıləy təkamulbaxş kardə tərbiyəvi iyən təsirəkə bərnomə və proqrami ehtiyocimon heste.....

Təğabuni mıborəkə surə 7 iyən 8-ə ayəonədə bə ın nuktə işorə kardedə ki,kofiron fik kardedəbin ğıyoməti ruji bəyji iyən məhşur nibəbeyn.vuji:bə bəçımı pərvərdıqori ğəssəm ki,qırd şımə  ğıyoməti ruji məbus bəbiyon.peşo,şımə əməl kardə çiyon barədə,bəşmə xəbər bədoon və ın bo Xıdo hostone.ısət ki,jıləvoniye,bə Xıdo iyən bəçəy iyən bəçəy nozil kardə nuri(Ğıroni) imon biynən.

9-ə ayədə çı insonon məbus iyən məhşur bıey və çəvon ğıyoməti cəm bıə ruji hisob-kitob iyən cəzoku xəbə doydə.həmonə ruji dəboxtey,həsrət iyən peşmonəti ruje.həmonə ruji i iddə və dastə insonon bəbardeyn və bə əbədi hərəbaxtəti bərəse və iddə həm dəbəboxteyn,məğlub bəbeyn iyən zərəl vində kəsonku bəbeyn.bə ruji ruşin bəbe ki,kon kəson dınyo aləmədə ıştə ticorətonədə ziyonkor bəbe və dəbəboxte.

Ayə həmonə ruji bə muminon hol-əhvoli işorə kardedə.joqo ki,hamyedə:”(Bə yod dənə)ə ruji ki, Xıdovənd şıməni ictima(qırdbemoni)ruji cəm bəkarde.həmonə ruji dəboxtey iyən xəsorəti ruje və hakəs bə Xıdo imon biyon və salehə əməl əncom bıdon,çəvon yavəçiyon bəpuşne və əy bə çəvon (doon) jiku ruon cari bıə boğon varid bəkarde.vəyo əbədi bəmandeyn.ıme dıjdə nicot pəydu kardey”.....

Təğabuni mıborəkə surə 16-ə ayədə hamyedə:”çən,çanədə kardey zıneydon,Xıdovəndiku bıtarsənən və əy bıməsən iyən bəy pemandənən və infoğkənən(baxş) ki,boşımə vey çoke və ıştə nəfsi pəxılətiku əmonədə mandə kəson,çən,əvon həmonə nicot pəydu kardə kəsonin”.

Bın ayədə sıftədə bə qınoku ictinob kardey fərmoni doydə.çıro ki,təğva vey vaxti bə qınoku pərhiz kardey dəlolət kardedə.peşo,milləti bə Xıdo sıxani məsey iyən itoət kardey səmt vanq kardedə.çı itoəton miyono məxsusə formadə bə ilahi imtovonon həmməysə muhimmə qıləyni yəni bə infoği məsələ işorə və təkid kardedə.həlbəttə,çəvon mənfəət bəçəvon ıştəni obəqarde.