Oxonə Munci(Nicotədə) milodi ruj

Oxonə Munci(Nicotədə) milodi ruj

Aya bəşəri qıləy ayəndə iyən vəoməş heste? ım qıləy sıvole ki,Britaniyəvıjə filosof Bertrand Rassel ıştə kitobədə çımiko bəhs kardedə və bəvədə de bəşəri iştimayi təkamuli prosesi koy məşğul bedə.əv çı bəşəri ehtımoli vəoməku de veyə nomuəti sehbət kardedə.Rasseli prizmakuımrujnə texnoloqiyə haruj inkişof kardə əsrədə ki,harçənd ım qıləy dıjdə mecuzəy,əmmo həyğətədə çı bəşəri çand həzo sornə mədəniyyət və sıvilizasiyə ciddiyə formadə təhdid kardedə.çı elm iyən bovəon miyono icod bıə fosilə,ım əsrış bə bəşəriyyəti torıxi həmməysə iztirobinə əsrış təbdil kardə.Rassel ıştə kitobi oxonə fəslədə nıvıştedə:”az qıləy toykiyə ləzədə de nıvıştey məşğulim və zınedənim bəşəri irğ anədə dəvom bəvarde ki, çımı nıvıştəyon mıntəşir bəbe və ya intişor iyən pevolo bıə holədə,handey bəbe ya ne”?. Bə ın nəzəriyyə əks,ilahi dinon jıqo hisob kardedən ki,çı bəşəri vəomə ağılmandə roy dəvardedə və dınyo bə çokətiyon iyən fəziləton səmt hərəkət kardedə.həlbəttə,veyə şəxson hestin ki,bə ın cərəyoni tov vardey zıneydənin və inhirof iyən fəsodi vey pevolo kardedən.əmmo,oxoyədə qıləy şəxs zuhur bəkarde ki,çı bəşəriyyəti aləmi munci iyən xiloskore və əv,bə bəşəri qırd renc iyən dardon məlhəm bənoe.... Imruj çı aləmi və`də doə bıə Munci iyən xiloskori vilodəti sorəqardışi ruje.qıləy ruj ki,niməye-şəbani həşi dame və deştə damey bo qırd insonon çı həyğiyə həşi pemey mıjdəvoniş bə ərməğon vardeşe.Hicri-Ğəməri 255-ə sori Şəbanə manqi ponzəminə ruji,qıləy pokə tifli-məsum deştə vilodəti,dınyoş iyən hestemoni aləmış bə nur ğərğ kardeşe. Milod muborək..... Çandə soron be ki,hestemoni aləm jıqo qıləy şəxsi omey intizori kəşedəbe.qıləy hırdən ki,həmonə ruji bə dınyo ərsə poş noe,çı imoməti xıyzoni çəş iyən ço və çın mığəddəsə roy dəvoməkə be.çəy nom de Xıdo-Rəsuli(s) həmnom və kunyəş həm eyni be.çəy pı məsum iyən moş həm qıləy pok və iffətinə xanım be.çə həzrəti pı nom çı şıəyon yonzəminə rəhbər İmom Həsən Əskəri(ə) və inə nom həm Nərcis(ə) be. Bə həzrəti Bəğiyyətullah nomışon noə.zira,çəy vucud de feyzi pure və ilahi yolə zəxirəy ki,bo dınyoədə zılo-sıtəmi rınə bırniyero iyən ədoləti bərpo kardero,oqətey bıə. Ğayim həm çə həzrəti ləğəbonkuye.ə həzrət bo həx iyən ədoləti bərpo kardero ğıyom bəkarde.Əv “Məhdiye-Movuud” və bə qırd dınyo nicot baxş bəkarde..... Torıxi dırozi de dınyo etat-petaton,ruşin bedə ki,həmmə insonon bə ın dıjd və bə heyrət vardə təzahuri nisbtədə,qıləy mənəvi iyən ğəlbiyə ehtiyocışon hiss kardə.çun,torıx çı idtidoku de tosə ısət və ımrujnə rujiku de tobə çə əbədiyə həşi pemey,de zılmo-fəsodi umuj qıniyə.bə zılmo-əzobi məruz mandə qırd kəson,de torıx iyən bəşəri ın yolə xiloskori vilodəti zikr kardey,ıştə dılonədə umu və şoyvonəti bə vucud vardedən.məxsusən ki,həmmə din iyən məzhəbon etığodışon heste ki,qıləy Munci iyən Xıdo zumandə dast,torıxi qıləy zəmonədə zuhur bəkarde,bome və mecuzəvi formədə bəşəri çı zılm iyən nohəxətiku pebəroxne.əmmo,bın mıştərəkə nəzədə çı şiəyon de islomi və ğeyri-islomi fırğəon miyono bıə həmməysə muhimmə tafut və farğ,ıme ki,əvon ım əziz və yolə şəxsiyyəti zıneydən və çə həzrəti nom iyən vilodəti torıxiku xəbədon.əvon zıneydən ki,çə hzərəti əzizə pı iyən mo nomışon çiçe və çəy bə dınyo omey torıxi ğəbul kardedən.bə həmonə dəlili xoto,şiəyon ıştə etığdoədə vey mehkəm mandən və çəy intizor iyən təvəssılon vey bəyji,vey həyəconin, vey mənodor iyən harcəhətine..... Rəvoyətədə omə ki,və`də doə bıə Məhdi(ə) de qıləy xoş surət iyən reçinə merdi sima zohir bəbe.çə həzrəti təvili iyən çəkut oj və nuroni bəbe.Əv,ilahi oxonə peyğombər bıə həzrəte Muhəmməd(s)-i olət iyən əmmomə bəştə tan bəkarde.peyğombər(s) bəy “Əhli-Beyti Tavusi” nomış noə.Əv,çı qırd çokətiyon usarə və eparzıniyə bıə şirəy və Xıdovəndi tərəfiku bo milləti hidoyətiro omə omə qırd peyğombəron ovəynəy.