Osmoniyə surəon-222

Osmoniyə surəon-222

Islom bə təloğ doə bıə jenon iyən bəçəvon həxon ayid bıə ğanunon tədvin iyən tərtibədə,qıləy məxsusə dığət iyən zərofət oko doydə.əv həm çımiku iborəte ki,ım osmoniyə din bo xıyzonon nizomi,jenon iyən boçəvon fərzəndon həxon qıləy məxsusə əhəmiyyət ğayile.iminə ğədəmədə çanədə ki,imkon heste çı təloği vəy qəteydə.əmmo,havaxti ko bə sıvi iyən qıləy dalani bırəso və ğərəz təloği həni co qıləy ro nımando,icozə doydəni ki,bın keşməkeş iyən mınoğişə zəmonədə bə jenon ya fərzəndon həxon hiç qıləy zərəl nırəso.hətto co bıeyku joqo bəpe bəhs bıbu ki, əksərən ijən sənibəton oqardey imkon mevcud bıbu və çı hırdənon həx-huğuğon nəzədə qətey bıbu.

Təloği surə 11-ə ayədə hamyedə:”qıləy peyğombər ki,Xıdo ruşinə ayəon bo şımə tilovət kardedə ta əvon imon biyon və salehə əməl əncom bıdo,çı zılmətonku bə nuri tərəf xaricko və hakəs bə Xıdo imon biyo iyən loyığə ko bə vırə bırısno,Xıdovənd əvoni bə boğon varid bəkarde ki,çəvon doon jiku ruon cari bəbe və əbədi əyo bəmandeyn.hukmən,Xıdovəndi boəy ruziş çok ğərol doə”.

Kərimə-Ğıroni nozil bıey iyən peyğombər(s)-i besəti hədəf ıme ki,de ilahi ayəon tilovəti imoni əhl və salehə əməli çı cəholət iyən kufri zılmətonku bə imoni nur və tohidi səmt xaric bekardeye. bımi həm dığğət kardey lozıme ki,”zulumat” cəm formədə omə və “nur” mufrəd və tək surətədə omə.zira,botıl,kufr iyən fəsodi roon çandə qılə iyən ziyode.əmmo,həxo ro fəğət iqləyniye......

Təloği surə oxonə ayə haft osmon iyən zəmini xılğətədə bə Xıdovənde-Aləmi ğudrəti iyən bə Xıdovəndi tədbiri işorə kardedə ki,ın əzəmətinə dınyo de Xıdovəndi fərmoni idorə bedə və çın xılğəti qıləy hədəfış heste və həkimonə formaədəy.oxoyədə hamyedə:”ımon həmmə bəçəy xotoye ki,bızınən Xıdovənd bə harçi ğadire və çəy elm har çi əhotə kardedə.de qıləy co iborəti inson bəpe dığğətko ki,Xıdovənd bəçəy qırd vucudi əhotəş heste və çəy həmmə əməlonku xəbədoe.

Təhrimi mıborəkə surə Kərimə-Ğıroni şesto şəşminə surəy,Mədinədə nozil bıə iyən 12 qılə ayəku iborəte.

Təhrimi mıborəkə surə sıftənə ayəon bə peyğombər(s)-i kali jimoni həmroon macəra ayid bıə ayəonion.çın surə co ayəon mevzu iyən məzmun çımiku iborəte:bə muminon dığğət kardey və bə xıyzoni təlim iyən tərbiyə koon təkid kardey,çı qınonku oqarde iyən tobə kardey,de kofir iyən mınofiğon cihod kardey,dıqlə saleh iyən nosalehə jenon həxədə bıə şərhe-hol və bə peyğombər(s)-i jimoni həmroon çəşnavi iyən xəbərdoərəti.

Təhrimi mıborəkə surə sıftənə ayəon ımi bəyon kardedə ki,Peyğombəre-Əkrəm(s) qıləy həlolə koş boştə hərom kardəbe və çəy səbəb iyən illət həm çə həzrəti kali  jimoni həmroon vırəş nıbə etırozin bin. Təhrimi mıborəkə surə ş`əni nuzul və enovney səbəbi həxədə omə ki, Peyğombər(s)-i jimoni həmroonku bəzi qıləyni nəyinki,deştə sıxanon bə həzrəti norohət kardedənbin,bəlkəm çı qıləy bəfodorə jeni muhimmə şərtonku qıləyni sırr oqətey məsələ rioyət kardedənıbin.həzrəte peyğombəri(s) jimoni həmroonku dıqləyni peyğombər(s)-i çəy bərməlo bıey nıpiyə mevzuşon ifşo karde və bəştə hədəfon rəsey xoto məkrinə planışon əncom doe.ım macəra peyğombər(s)-i pokə dıl iyən yolə rufış norohət karde və bəy reaksiyədə kali ləzzətonış bəştə hərom kardeşone.