Osmoniyə surəon-223

Osmoniyə surəon-223

Təhrimi mıborəkə surə sıftənə ayəon peyğombər(s)-i mıdofiyə kardedə və həmonə dıqlə jeni mızəmmət kardedə və bəvon çəşnavi iyən xəbərdorəti doydə ki, peyğombər(s)-i jimoni həmro bıey,bə vəhışti daxil bıey ya bə cəhəndımi şıey mane nibəbe.çoko ki,çı Nuh(ə) iyən Lut(ə)-i jenon ki,bəştə jimoni həmroonışon xəyonət kardəbe və oxoyədə bə cəhəndımi otəşi dıço bin.

İslomi peyğombəri(s) buzurquvarə şəxsiyyət cahanşumule ki,çə həzrəti mıborəkə vucud bə qırd islomi camiyə iyən bəşəriyyəti aləmi şomile.binobərin ehanə kəy daxilədə bəçəy ələyh hiyləon bıbu və harçənd həm qədə iyən noçiz bıbu,çəy səpe de hostonəti dəvardey nibəbe.

 Təhrimi mıborəkə surə iminə ayədə Xıdovənde-Aləm boştə peyğombər(s)-i heysiyyəti hifz kardeyro bə ə həzrəti xitob kardə holədə hamyedə:”ha pəyğombər ha! çıro Xıdo bətı həlol kardə çi ıştə jimoni həmroon rizoyəti cəlb kardey xoto,bəştə hərom kardedəş?”.

Ayə dəvomədə bə yod dənoydə ki,hiç kəsi həxış ni Xıdo həloli hərom iyən Xıdo həromi həlolko. çıro ki,fəğət əv ğanun noey həxış heste....

Təhrimi mıborəkə surə 5-ə ayədə bə peyğombər(s)-i jimoni həmroon xitob kardə və çəşnavi doydə ki,şımə təsəvvır nokon peyğombər(s) hiçvaxti əvoni təloğ nibədoe və həmçinin təsəvvır nıkon ki,ehanə əvoni təloğ bıdo şıməku vey çokə jimoni həmroon şımə əvəzi şımə vırədə ğərol nibəqəte.bın ayədə Kərimə-Ğıron bo çokə jimoni həmroon şəş qılə sıfətış hisob kardə: mısılmon,mumin.təvazukor,tobəkor,abid iyən hicrətəkə jimoni həmroon.

In xısusiyyəton jimoni həmroon vıjniyə zəmonədə bo qırd mısılmınon qıləy meyar bıey bəzıne. Təhrimi mıborəkə surə 6-ə ayədə xıyzonon əhəmiyyəti barədə qırd insonon bımi dığğət kardey tələb kardedə ki,bəpe ıştə nəsl iyən xıyzoni mığobilədə məsuliyyət hisskon və çəvon ideoloji, mənəvi, fərhənqi,əxloği iyən iştimayi ruşd iyən ozavziyedə ıştə dasto omə çiyon əncomkon.ayə hamyedə:”ha imon vardə kəson ha! ıştəni iyən ıştə xıyzoni çəy ezım insonon iyən sığon bıə otəşiku bə diyərokənən,oqətənən”.

Əmr be məruf iyən nəhy əz munkəri əsl və prinsip,qıləy umumi vəzifəy ki,həmmə mısılmınon bə iyande nisbətədə hesteşone.əmmo,çın ayəku çok-çoki oko doey bedə ki,insoni ıştə xıyzon iyən fərzəndon mığobilədə sanqinə məsuliyyətışon mevcude və har qıləy mısılmoni vəzifə ıme ki, boştə fərzəndi təlim-tərbiyə kardero bəpe cəhdko,əvoni çı qınonku oqəto,əvoni bə çokətiyon səmt dəvətko və fəğət deçəvon cismi xorəki iyən təğziyə ğane nıbu.

Əmə zınedəmon ki,ictimo xıyzonon nomo bıə qədə vohid iyn təşkilotonku iborəte.çən,havaxti ım qədə vohidon isloh bıbu,kulli camiyə solim iyən səlomətə roy dəbəvarde.ın məsuliyyət iminə dərəcədə çı xıyzoni yolon yəni pı-mo ehdədəy.məxsusən çəmə əsrədə ki,fəsodi zərəlinə ləpəon vey zumand iyən təhlukənine,bə har qıləy imoninə şəxsi lozıme ki,ağılmandə formaədə qınoku bə diyəro mandey,ıştəni de islomi ədəb iyən əxloği dərostnon və ıştəni hozzı kardey dıjdə məsuliyyəti kəno ıştə kə-bə,xıyzon iyən nezə odəmon həxədə fikko və əvoni ilahi məfhumon təlimi iyən insoni əxloği şua jiyədə çı qıno,yavəti iyən fəsodiku oqəto.

Rəvoyətədə omə:ın ayə nozil beyədə peyğombər(s)-i əshobonku qıləyni çə həzrətiku dəparseşe:əmə çokonə ıştəni cəhəndımi otəşiku oqətəmon.ə həzrəti hamyeşe:”əvoni əmr be məruf iyən nəhy əz munkəri dəvətkə,ehanə ıştıku ğəbulışon karde,tı əvonı çı cəhəndımi otəşiku mıhofizə kardə və əgər ğəbul nıkon,ıştı vəzifə fəğət voteye”........

Tobə kardey iyən qınonku bə Xıdo səmt oqarde,qıləy mevzuye ki,Təhrimi mıborəkə surə 8-ə ayədə çəyku bəhs bıə və bo nicotiro de iminə ğədəmi nomi zikr bıə.həyği iyən xolisə tobə ki,çəy muhərrik iyən stimul Xıdo fərmone və çəy roziyəti kəsb kardeye.ın ayə həyğətədə çı cəhəndımi otəşiku perəxey və nicot pəydu kardey roy nışon doydə və hamyedə:”ha imon vardə kəson ha! bə Xıdo tərəf tobəkən,qıləy xolisə tobə”.