Osmoniyə surəon-224

Osmoniyə surəon-224

Təhrimi mıborəkə surə 6-ə ayədə xıyzonon əhəmiyyəti barədə qırd insonon bımi dığğət kardey tələb kardedə ki,bəpe ıştə nəsl iyən xıyzoni mığobilədə məsuliyyət hisskon və çəvon ideoloji, mənəvi, fərhənqi,əxloği iyən iştimayi ruşd iyən ozavziyedə ıştə dasto omə çiyon əncomkon.ayə hamyedə:”ha imon vardə kəson ha! ıştəni iyən ıştə xıyzoni çəy ezım insonon iyən sığon bıə otəşiku bə diyərokənən,oqətənən”.

Rəvoyətədə omə:ın ayə nozil beyədə peyğombər(s)-i əshobonku qıləyni çə həzrətiku dəparseşe:əmə çokonə ıştəni cəhəndımi otəşiku oqətəmon.ə həzrəti hamyeşe:”əvoni əmr be məruf iyən nəhy əz munkəri dəvətkə,ehanə ıştıku ğəbulışon karde,tı əvonı çı cəhəndımi otəşiku mıhofizə kardə və əgər ğəbul nıkon,ıştı vəzifə fəğət voteye”.

Tobə kardey iyən qınonku bə Xıdo səmt oqarde,qıləy mevzuye ki,Təhrimi mıborəkə surə 8-ə ayədə çəyku bəhs bıə və bo nicotiro de iminə ğədəmi nomi zikr bıə.həyği iyən xolisə tobə ki,çəy muhərrik iyən stimul Xıdo fərmone və çəy roziyəti kəsb kardeye.ın ayə həyğətədə çı cəhəndımi otəşiku perəxey və nicot pəydu kardey roy nışon doydə və hamyedə:”ha imon vardə kəson ha! bə Xıdo tərəf tobəkən,qıləy xolisə tobə”.

İslomi peyğombər(s)-iku omə rəsə qıləy hədisədə handedəmon ki,Məaz ibn Cəbəl çı nəsuhə tobəkuş sıvol karde,çəy cəvonədə həzrəti hamyeşe:”yəni qıləy tobə kardə şəxs həni hiçvati bə qıno səmt nıoqardo.joqo ki,(duşə bıə)şıt həni hiç vaxti bə pışton oqardedəni”.ım lətifə təbir ımi nışon doydə ki,nəsuhə tobə jıqo insonədə qıləy inğılob icod kardedə ki,bə kardə qınon səmt həni ijən oqardey roy kulliyə surətədə bastedə.tobə bə qınon baxşeşi boyis bedə,qıləy fərdi imoni ziyod kardedə və imoni nur ğıyoməti ruji bo muminon ro oj bəkarde......

Təhrimi mıborəkə surə oxonə seqlə ayə mumin iyən kofirə jenonku ulqu nışon doydə.ın ayəon həyğətədə mə mıslmonə jenon,məxsusən bə peyğombər(s)-i jimoni həmroon çəşnavi doydə ki, ıştəni de muminə dastəon həmohənqkon,nəyinki,de ıştə roy qin kardə iyən xəyonətkorə  jenon.sıftədə çı dıqlə betəğvaninə jenon tale və sərnıvışti bəyon kardedə ki,çı Xıdo dıqlə yolə peyğombəron kədə jiyedəbin və de həmonə dıqlə peyğombəron deşmınon həmkorəti kardedəbin və çəvon kəon sırron bə deşmınon rosneydəbin.10-ə ayədə hamyedə:”Xıdovənd bo kofir bıə kəson Nuh iyən Luti jimoni həmroon misoli jeydə.ə dıqlə çəmə dıqlə salehə bandəon yolyəti jiyədə bin.əmmo,bə(həmonə)dıqlə xəyonət kardeşone və de ın dıqlə peyğombəri rabitə boəvon hiç qıləy foydəş nıbe və bəvon votey be:bə otəşi co daxil bıə kəson bə ico daxil bıbən”...

Peşo dıqlə imoninə jenonku misol jeydə ki,çəvonku iminə qılə Muzahimi kinə Asiyə be.əv çı Fironi jimoni həmro be ki,kufrədə bə qıləy dərəcə rəsəbe ki,ələni iyən oşkoə formadə fəryod jedəbe:mı şımə yolə pərvərdıqorim.əmmo,çoko ki,Asiyə Mosə(ə)-i çı sehrbozon mığobilədə bıə mecuzəş mışohidəş karde,çəy ğəlbi nığılə vırədə imoni nur ruşin be və həmonə ləzə iyən aniku bə Mosə(ə)-i imonış varde.deməkə ki,Fironi jimoni həmro sarayda jimon kardedəbe,dınyəvi qırd nemətonku ləzzət bardedəbe iyən çokə rifohinə jimonış hestebe və harçi oruzu kardeyədə bə dast vardedəbe.Asiyə hejo ıştə imoni məxfi kardedəbe.əmmo,çoko ki,firon çəy imoniku xəbədo be,çandə kərə əvış Xıdovəndi pərəstış kardeyku nəhyış karde,əmmo ın istiğamətinə jeni hiçvaxti bə fironi tələbon təslim nıbe.nəhoyətən,fironi əmrış karde ki,Asiyə dast-lınqi de mısmori bıduton və həşi sutunə şuon jiyədə ğərol bıdon və çəy sinə səpe həm qıləy dıjdə sığışon noe.ım imoninə jen ıştə umri oxonə ləzə iyən anədə bə Xıdovəndi jıqo dıvoş karde:”Xıdolim ha! bomı vəhıştədə ıştə civar və kənoyədə qıləy kə binakə və mıni firon iyən çəy əməlonku ozodkə və mıni çın zolımə ğovmiku nicot bıdə,peroxon”.....(Təhrim-11).