İlahi rəhbəron-5
İlahi rəhbəron-5
Əbdul-Mutəllıbi hırdən penc sori mıddətədə “Bəni Sə`di” ğəbilə miyono jimonış dəvordıne və kifoyət ğədərədə ozavziye.i mıddət səhro jimoni bədiqə Muhəmməd(s) bə Məkkə oqarde və ıştə inə Amənə benəhoyətə məhəbbətiku bəhrəş barde.
Muhəmməd(s) ıştə hırdənəti devronış kəfşənonədə de pəsəvonəti dəvordıneşe və peşo həm de tosə qıləy mıddəti ım koş dəvom doe.həyğətədə,ilahi ənbiya və peyğombəron əksəriyyət,bə nıbuvvət və peyğombərəti rəsey bənav ıştə umri ibaxşışon de çuponəti iyən pəsəvonəti dəvordınəşone.əvon çandə mıddət kəfşənonədə de heyvonon tərbiyə və perosney koy məşğul bıən ta çı insonon tərbiyə royədə səbrin bıbon və qırd şiddətinə hodisə və məşəğğətinə holon boəvon hoston bıbu.i tərəfo həm Məkkə fosidə camiyəku bə diyəro mandey və osmoni reçinə səyfəon və astovəon vəzyəti mutoliyə kardey,bo Muhəmməd(s)-i qıləy fırsətış bə varde ta ə həzrət çı xılğəti razo-sırron həxədə ziyodə fik-fam və təfəkkurko....
Muhəmməd(s) ıştə nevcıvonəti zəmonədə deştə məxsusə xısləton,ıştə həm sinn və həmsornə hırdənonku farğ kardedəbe.bın sinnədə bıə addi fərdon,çı cımbəcuşəti iyən bə rədəvardə nəfsi şəhvət və həvaye-nəfsi giriftor beydən,cıvonə Muhəmməd(s) de pokəti,rostəvıjəti məşhur be və hejo təfəkkur kardedəbe,qıləy vuğarış hestebe və qıləy barzə şərofətış hestebe.bo həzrəte Muhəmməd(s)-i bəvə omə hodisəonku qıləyni ki,ə həzrət de xoşəti bə yod dəoydəbe,çə həzrəti bo məzlumon iyən sıtəm vində kəson mıdofiyə məğsədi qıləy sazişədə iştirok be ki,islomi torxədə de “həlful-fuzul” nomi məşhure.
Ğureyşi ğəbilə uzvon qahi zəmon bə xariciyon ya Məkkədə qıləy xıyzon iyən əşirəş nıbə kəson sıtəm kardedəbin.min cumlə qıləy ruj Yəməniku iqlə merd ıştə məhsulonış bo həvatero bə Məkkəş barde.ikəsi şəy molonış hıriye,əmmo çəy məbləğış pərdaxtış nıkarde və nıdoeşe.əve çəvon miyono mıbohisə və dave eqıniye.həmonə məhsuli həvatəkəsi çəş bə Kəbə kəy kəno nıştə Ğureyşi peqıniye. Çəy nolə və zikməvulə rost be və fəryodi tələbi qıləy şerış hande.çın macəra bədiqə Ğuireyşi kali toyfəon qırd bin və bə iyande sıxanışon doe ki,çı məzlumon həxı zolımonku bıstənon.peşo Ğureyşi əyon-əşrafi qıləyni kəyədə cəm bin. əvon de iyande əhd-peymonışon baste və ğəssəmışon harde ki,de iyande i və mıttəfiğ bıbon və çanədə ki,mevcud bıə imklonaton icozə doydə, məzlumon həzon çı zolımonku bıstənon.ım qıləy əhd-peymon və saziş be ki,Muhəmməd(s) ıştə cıvonəti zəmonədə həmonə sazişədə iştirokış karde və ım həmonə rujonədə çı ərəbon miyono hıəmməysə vey şərofətin və və vey yolə əhd-peymon be....
Muhəmməd(s) –i jimon bımi qıləy ruşinə şoydətiye ki,çokonə ə həzrət həmonə nosolim iyən dətosniyə bıə muhitədə nəyinki,ıştə pokə dovnəş çı qırd yavə çiyon iyən qınoonku oqətışe,bəlkəmçoko-çoki qıləy ovandəiş pəydu karde ki,bə qırd fəziləton rioyətko və çı inhirof iyən qınonku bə diyəro bımando.joqo ki,bə ə həzrəti Muhəmmədəmin ləğbışon noəbe və həmmə kəs bə ə həzrəti etıbo və etımod kardedəbe. bə ın mevzu coqləyni şoydəti,qıləy dıjdə torıxi hodisəy ki,çə həzrəti besəti bənav Məkkə sərzəminədə bə əməl ome.joqo ki,Məkkə yolon bə fik omin ki,Xıdo kə hevujkon.bəçəy xoto,əvon kali vırəşon xərob karde ta omin rəsin bə Həcərul-Əsvədi ki,dini nəzəku vey mığəddəs və ehtırom kardənin be.iyo çı çoqlə dıjdə ğəbilə miyono ixtilof eqıniye.
