İlahi rəhbəron-11

İlahi rəhbəron-11

Xıdo-Rəsul(s)-i iminə təblıği siyosət  rəsmi dəvət nıbə holədə tohidi nəşr kardey be.mıslmonə sirə ənıvışton senzə sornə Besətışon bə qıləy se sornə və da sornə devrəçon şomil kardə.sıftənə se sornə besəti umdə xısusiyyət ım be ki,Muhəmməd(s) ıştə dəvətış fəğət akmə vırə oşkoş karde.əv  fəğət çı şırk iyən bıtpərəstəti ayiniku co bıə və bəçəy səmt omə kəsonış cəzb karde.ım şəxson çı şırkiku co bıə və bə tohidi ayini tərəf dim qordınə şəxson bin və əvon çoko ki,Xıdo-Rəsul(s)-i nıbuvvəti xəbəşon məse,rəyrə bə ə həzrəti tərəf dastpoçə bin.əvon aşığonə formaədə bə ə həzrəti dəvəti imonışon varde və mısılmon bin.

De peyğombəri(s)-i Besətiku se sor dəvardey,Xıdo-Rəsul(s) əmrış se ta ıştə dəvəti oşkoko və de şırki aludə bıə əğedəon mıborizə bobo.bın mıddətədə millətiku de tosə çıl nəfəri dini-islomışon ğəbul kardəbe və çəvon çandə nəfər həm ıştə toyfə və ğəbilə miyono de islomi təblıği koy məşğul bin.Xıdo-Rəsul(s) iminə qəm və ğədəmədə  ıştə nezə odəmonış cəm karde ta çəvon koy oxo həxədə bəvon çəşnavi bıdo. çoko ki,Xıdovənde-Aləm Kərimə-Ğıronədə bə ə həzrəti jıqo hamyedə:”bəştə nezə odəmon tars bıdə. bətı pemandə har qıləy mumini mığobilədə ıştə kəşon ojkə.və ehanə əvon bətı isyonkon,vuji:mı şımə koonku bezom(bə diyərom)və bə zumand,mehribonə Xıdo təvəkkulkə”.(Şuəra -214-218).çın ayə nozil bıey bədiqə peyğombəri(s) ıştə ğovmi yolonku çılı penc nəfərış bo mehmonətiro dəvətış karde və bə ğərol ome ki,bın mehmonəti zəmonədə ıştə yolə sırri boəvon bıvoto ki,bın dəvəti zəmonədə ğərəz Əli(ə) hiçki bə ə həzrəti imonış nıvarde.

Təbiiye ki,bə zəmon bə tohidi ayini dəvət kardey iyən şırk və bıtpərəstəti nizomi bəyənde jıey,vey saxtə ko be.bə həmonə cəhəti xoto,hejo çə sıftəku ın məsələ ruşin be ki,i dastə de ə həzrəti mıxolifət və bəy istehzoşon karde.əmmo,Xıdovənde-Xalığ çı peyğombəri(s)-iku  tələbış karde ki,çı deşmınon ədədi vey bıey iyən çəvon istehzoku nıtarso və ıştə dəvəti ələni və oşkoko.Hicri mıborəkə surə 94-95-ə şərifə ayəonədə jıqo handedəmon:”oşko,bətı əmr bıə çiyon bəyonkə və çı mışrikonku dim bıqrodon(bəvon etıno məkə). əmə çı istehzoəkəyon şərri ıştıku dəf(bərtərəf)bəkardemon”.

De ın tərtibi peyğombəri(s) ıştə umumi dəvətış bino karde və ın dəfə de barzəvo Səfa bandı-ku kəno ıştə vohidə Xıdo pərəstış kardey ayinış elon  karde.ə həzrət de qıləy təsirin iyən tədbironə şivə,millətış bə islomə dini səmt dəvətış karde və hamyeşe:”Ğulu La ilahə......-bıvotənən ğərəz vohidə Xıdo co qıləy mə`bud ni ta nicot pəydukon”.