İlahi rəhbəron-210

İlahi rəhbəron-210

İslomi əziz-qramiyə peyğombəri(s) hamyəşe:”ikəs ki,sıbi zəmonədə haniku oğo be,(və bo islomi camiyə muşikoton bərətəf kardero) səy nıko,çı mısılmınon səfədə nibəbe.peyğombəri(s) hətto çı har qıləy mutəəhid iyən ıştə vəzifə zınə şəxsi vəzifə hevuj kardedə və hamyedə:”hakəs ki,çı har qıləy insoni (məzlumiyyəti) ısət (har qıləy zəmon iyən məkonədə həm bıbu) nıməso və bə həmonə(fəryod jıəkəsi) cəvob nıdo,əv mısılmon ni”.

Nisa mıborəkə surə 75-ə şərifə ayədə dığğət kardəninə nuktə ıme ki,ilahi kəlom de “mustəzəfi” kəlmə oko doey bə ın mevzu təkid kardedə ki,rostə İslomi ozodi baxş kardə fərhənq və mədəniyyətədə harçisə həm vey çı insonon insoniyyətiku bəhs kardedə və dınyo har qıləy kıncədə çı zolımkorə hukuməton təcavuzi jiyədə bıə və çı məzlumiyyət iyən koməki vanqi jıə har qıləy insoni məsə har qıləy şəxs  məsuliyyət hiss nıko və bəy cəvob nıdo,inev həmonə şəxs çı insoniyyətiku xaric bıə.əmmo çı Xıdo-Rəsuli(s) ro nışon doə kəlomədə məxsusə nuktə ıme ki,ə həzrət hamyedə:”ikəs ki,çı İslomi umməti muşkiloton həll kardey cəhətədə qəm və ğədəm nışıdo və bə dınyo məzlumon nido vanq və sədo nıdo,əv mısılmon ni.çunki,imkonış ni ikəs bə islomi məbno və usuli qıləy nığıl və rostə bovəş bıbu,əmmo çı sıtəmkoron zılmon və çı məzlumon fəryodi  mığobilədə betafut bımando və məsuliyyət hiss nıko.

Həzrət Əli(ə) ki,de Xıdo-Rəsuli(s) təbiri bə İslomi imon vardey deçəy qujd iyən xuni umu qıniyə və çımisə əlovə çə həzrəti de iftixori pur bıə dəvəşə devronədə dayima çı məzlumon,yətimon,sıtəm vində kəson və de məzlumiyyəti rozi nıbə kəson və de əy deşmın bıə kəson hami iyən himoyədor be və ıştə jimoni oxonə ləzonədə bəştə fərzəndon vəsiyyətədə joqo hamyedə:”de sıtəmkoron deşmın  iyən bə məzlumon komək bıbən.....

BİNOBƏRİN ehanə Xıdo-Rəsuli(s) hamyeedə:”çımı fərzənd Məhdi(əc) dınyo de zılmo-sıtəmi pur bıey bədiqə ğıyom bəkarde və dınyo de ədolət iyən dodi pur bəkarde və ım hiçvaxti bın mənoədə ni ki,har qıləy zəmon iyən əsrədə bıə zolımkorə hukuməton zılm iyən sıtəmon vədə orom və sakit bınışto,bəlkəm bəpe bəsə poysə bınışto və bo həzrəte İmom Məhdi(əc) zuhuriro mınosibə zəminə hozzıko.harçənd ijən mumkine çın işkol iyən irodiku bəhs kardey bəbe ki,ehanə əmə bəştə vəzifə hukmi əsos çı sıtəmkoron mığobilədə bımandəmon və çı məzlumon həx-huğuğon mıdofiyəkəmon və bo ədoləti icro kardeyro hərəkətkəmon,bın surətədə bo həzrəte İmom Məhdi(əc) zuhuri hədəfiro elon kardə bıə ideyalon bə həyğət bırəso və bın surətədə həni bə həzrəte İmom Məhdi(əc) zuhuri çı ehtiyociş hest?.çunki,həzrəte İmom Məhdi(əc) zuhur iyən ğıyom bəkarde ta ım mevzu royədə hərəkət bəkarde və ım məsələ real bəkarde və bə həyğət bərosne.yəni həm de zolımon mıborizə bəbarde və həmən ədoləti bərpo bəkarde......