İlahi rəhbəron-212

İlahi rəhbəron-212

İslomi əziz-qramiyə  peyğombər(s) bo duyə Məhdəviyyəti iddio kardə kəson və milləti bə inhirofi dıço bıey vəy qəteyro hamyeşe:”Ğayim çımı avlodikuye.çəy nom çımı nome və çəy zohiri sima çımı zohiri sima və çehrəy”.peşo ə həzrət ıştə sıxanon dəvomədə çı muhimmə nuktəonku bəhs kardedə və hamyedə: ”hakəs bəy tabe bıbu iyən pemando,jıqo bızın bəmı pemandə və hakəs çəy mığobilədə bımando və bəy itoət nıko,jıqıo bızın bəçımı ələyh beşə.və hakəs əy bə həşə bıjəno iyən inkorko,jıqo bızın çımı risolət və missiyəş inkor kardə”.

Həzrəte peyğombəri(s) kəlməonədə dığğət kardəninə nuktə ıme ki,ə həzrət hamyedə:Xıdo ğıyoməti ruji bərpo bıey bənav həzrət Məhdi(əc) ğıyomi şuaədə şırkamizə nizamon bandəçəti siyosəti çı miyoniku bəbarde.ım həmonə vədəy ki,Xıdovənde-Xalığ Nuri mıborəkə surə 55-ə şərifə ayədə çəyku bəhs kardedə və hamyedə: Xıdovəndi bə imon vardə iyən ləyoğətinə əməl bə vırə rosnə kəson vədəş doə ki,ğəti iyən yəğinə surətədə əvoni canişin iyən xəlifə ğərol bədoe.çoko ki,əkəson ki,çəvon bənav mevcud bin çəvon bənav bıə ğovmon canişin bin.(peşo) qıləy din iyən ayin ki,boəvon pəsəndidəş kardə ğoym iyıən bərpoko və şırkamizə hakiyyətonku hiç qıləy tarsi beşək bə əmniyyət və oroməti təbdil bəkarde.(bə zəmon)fəğət mıni pərəstışkon.və hiç qıləy çi bomı şərik ğərol nıqəton və hakəs çəy bəpeştə kufrko,(diniku)xaric bıə”.

Həyğətədə de həzrəte Muhəmmədi(s) vardə əslə islomi tohidyə nizomi bərpo kardey,dınyo qırd məkononədə çı şırki məzhəronku həni hiç qıləy əsər-əlomət və nışonə nibəmande və de qırd  zolımkorə hukuməton rınə dəparçıniyey həmmə bəşəriyyət çı sıtəmkorə ğudrəton sultəku ozod bəbeyn və ozodi məfhum kulliyə formədə bə həyğət bərəse.jıqo qıləy dəvəşə devroni bərpo kardey fəğət bə mısılmınon məxsus ni,bəlkəm qırd osmoniyə dinon tərəfdoron həm jıqo qıləy rujiqori çəş kardedən və çəy intizorədən və oruzu kardedən ki,çanədə rə həm bıbu çəvon peyğombəron zuhurko və çı osmoniku saru booy.İslomi əzizə peyğombər(s) çın həyğətonku qıləy pardəş peqətə və hamyedə:”Məhdi çımı nəslikuye. bə zəmon ki,xurucko,Məryəmi zoə İsa(ə) bəy (de İlahi əmri) komək kardero osmoniku nozil bəbe və əy ıştəsə bənav bəqəte və çə həzrəti peştədə nımoj bəvote..