Yonzəminə Həşi tulu və pemey
Yonzəminə Həşi tulu və pemey
Yonzəminə Həşi tulu və pemey
Bə İraği səfə kardə və bənə Kazimeyn,Samirra,Ncəfə iyən Kərbəlo şəhronədə bıə bə peyğombəri(s) əhli-beyti(ə) ziyorəton nışə kamə insonon pəydu kardey bəbe.əyo yolə şəxson hıtən ki,bəmə çokonə jimon kardey çəmışon omutə.ə şəxsiyyəton ki,bənə dəvəşə həşi bə milləton qaməti iyən həyot baxş kardedə.Samirra şəhr çı İraği çoqlə mığəddəsə şəhronku qıləyniye.ım şəhr çı Bəğdadi şimoli 124 kilometriyədə və Dəclə ru şərği hissədə ğərolış qətə.Hicri-Ğəməri 221-ə sori harun-ərrəşidi zoə Muhəmməd əlmutəsim Billah poytaxtış çı Bəğadadiku bə Samirra şəhri intiğalış karde,ovıştınışe və de tobə Hicri-Ğəməri 256-ə sori ijən poyutaxt bə bəğdadi şəhri mıntəğil be.əbbosi həşt qılə xəlifəon bın şəhrədə xilofət və hukmronətişon kardə.Samirra şəhr si sori mıddətədə əbbosiyon poytaxt be və mıddətədə ziyodə inkişofış karde və bın şəhrədə ziyodə məçit,saray və istirohəti məkonon soxtey bıə.Samirra şəhr ımruj bə Şiyə dıqlə İmomon(ə) yəni bə İmom Hadi(ə) iyən İmom Həsən Əskəri(ə) pokə mərğəd və məğbərədə vucudi səbəbi xoto.çı dınyo şiəyon dığğət mərkəzədəy.ım buğö`ə və ziyorətqo ki,çı ımrujnə Samirra şəhri ğəlbi təşkil doydə,çın dıqlə İmomon(ə) jimoni devronədə çəvon jimon kardə kə be ki,çəvon şəhodəti bəpeştə əvon əyo dəfn kardey bıən.İmom Rıza(ə) hamyedə:”har qıləy imom ıştə duston iyən tərəfdoron qiyədə qıləy əhd-peymonış heste və bə ım əhdi bəfo kardey,deçəvon ğəbon ziyorət kardey vositə mumkine.və əkəs ki,de sovğ və şovği bəçəvon ziyorəti və deçəvon fəziləti təsdığ kardey bəçəvon ğəbon səmt bışo,ğıyoməti ruji İmomon(ə) əvoni şəfoət bəkardeyn”...
Imruj çı Samirra şəhri ağa və ərbob yəni İmom Həsən Əskəri(ə) vilodəti ruji sorəqardışədə ziyodə insonon bın ziyorətqoədə cəm beydən ta boştə daxili və ğəlbi ğəmqinəti iyən noxəşətiyon şiforo tələbkon və ıştə bədəni səlomətəti iyən dıli pokəti çı aləmon pərvərdıqoriku bıpyişone ta bəvon ətoko.ım çı ziyorət iyən təvəssıli xosyəte ki,bə qıləy zayiri oroməti iyən şoyvonəti baxş kardedə və çəy botıni çı mırdolətiyonku pok və musəffo kardedə.....
Hicri-Ğəməri 232-ə sori Rəbiyyus-Sani həştminə ruji İmom Həsən Əskəri(ə) Mədinə şəhrədə bə dınyo çəşış oj karde.İmom Həsən Əskəri(ə) çı İmom Hadi(ə) fərzənde ki,təğribən şəş sor çı mısılmonon İmoməti məsuliyyətış bəştə ehdəş peqəte.harçənd ə həzrət 28 sinnədə de əbbosi zolımkorə xəlifə vositə bə şəhodəti məğam rəse,əmmop çı İoslomi maarifi pevolo kardey koyədə muhimmə rolış ifo karde.
