İlahi rəhbəron-214

İlahi rəhbəron-214

Həzrəte Fatimə(S) bəştə fərzəndi Huseyni(ə) hamyeşe:”tı çımı dovnəku bə vucudi ərsə po noe,Xıdo-Rəsul(s) çımı palu ome və tınış bəştə vanqo peqəteşe.peşo hamyeşe:”ha Fatimə ha! Bızın ki,əv çı nəv qılə imomi pıəy və çəy nəsliku saleh və ləyoğətinə imomon bə vucud bome ki,çəvon oxonə qıləyni Ğayime”.

İmom Həsən(ə) həm ki,çı nıbuvvəti xıyzonədə tərbiyəş vindəbe,perəsəbe,bəsə həmonə mevzusə təkid kardedə və hamyedə:”Xıdo-Rəsuli(s) bəpeştə İlahi vıjniyə İmomon(ə) donzə nəfərin ki,çımı boə Huseyni(ə) nəslikuon və çın umməti Məhdi çəvonkuye”....

Huseyn ibn Əli(ə) həzrəte Məhdi(əc) zəmoni təhəvvulot və xısləton  və çə həzrəti zəmonədə çı milləti jimoni etat-petaton barədə hamyedə:”Xıdo deçımı fərzəndi vucudi bərəkəti ki,həxədə Ğayime,mardə zəmini bəyji bəkarde və həxə dini bəsə qırd dinonsə səbarz bəkarde.harçənd ım ko bə mışrikon xoş həm nıvo”.peşo həzrət bəştə sıxanon dəvom doydə və hamyedə6”Məhdi i mıddət çı nəzəonku punhon bəbe və ğeybəti devronədə idastə çı diniku xaric bəbeyn.əmmo coqlə qrupon ki,(dinşınos və nığılə fikəkən) sabit ğədəm bəmandeyn və (çı deşmınon tərəfiku) əvon bə əzob-əziyəton məruz bəmandeyn,bəvon sə-sıxan kardey bəbe və bəvon votey bəbe:əgər şımə əğedə həyğətebu və şımə rost votedon ki,şımə qıləy imomi ğıyomi çəş kardedon və çəy zuhuri intizorədə manəyon,çən bəmə bıvotən ki,əv keynə bome?. peşo İmom Huseyni(ə) çın dastə barədə jıqo hamyedə:”hakəs ğeybəti devronədə bə deşmınon tərəfiku bıə əzob-əziyyəton tov biyo və ıştə əğedədə sabitğədəm bımandon,bənə əkəsiye ki,Xıdo-Rəsuli(s) vədə de şımşi canqış kardə və Xıdo royədə cihodış kardə”....

Torıxi dırozi həmişə çı insonon perəsey və fırsiye mevzu mevcud bıə və həmonə ğaydə İmom Zəmon(ə) ğeybəti devronədə həm təkror bəbe.Kərimə-Ğıron həm Mayidə mıborəkə surə 54-ə şərifə ayədə bın barədə sıxan voteydə və hamyedə:”ha imon vardə kəson ha!şıməku har qıləyni ıştə diniku oqardo,(və bə İslomi peşt bıqordıno)Xıdovənd  rəyrə coqlə dastə çəvon əvəzi icod bəkarde ki,əvonış piyedə və əvon həm bə Xıdo aşığin və çı muminon vədə təvozukor və çı kofiron mığobilədə ğəddor və zumandin. dayima Xıdo royədə cihod kardedən və çı hiç qıləy mızəmmətəkə  sə-sıxaniku(ki,bəvon məsxərə kardedən) qıləy tarsışon ni.ım dıjd(və barzə xsıləton) de İlahi fəzli bəvon doey bəbe və Xıdovənd Hevujəkə,Əzıne”...

Kali dıjdə mıfəssır və təfsirəvonon çın ayə nozil bıey şə`n və səbəbi çı həzrəte İmom Məhdi(əc) tərəfdoron zıneydən ki,çə həzrəti ğeybəti devronədə bəştə etığodi usul və məbno deştə jimoni qırd etat-petaton və de mədəni,iştimoyi,siyosi iyən ixtisodi behronon bə ico ijən sabit ğədəm mandedən və zuhuri zəmonədə həm bənə İslomi peyğombəri(s) zəmoni de həzrəte İmom Məhdi(əc) imomət və rəhbərəti  və de aqah iyən rostəvıjə muminon bə ico bə şırk.zılm,kufr,nifoğ iyən bə dınyo zolımkor və imperiyalistə ğudrəton zidd mıborizə bəbardeyn və səhnədə hozzı bəbeyn və de oxonə ğələbə və səbarzəti çı cihodiku obəqardeyn...