İlahi rəhbəron-216

İlahi rəhbəron-216

Əbu Həmzə Somali İmom Məhəmməd Bağıri(ə) nəğl kardedə ki,ə həzrət hamyedə:””çəmə Ğayimi ğıyom ğəti koonkuye ki,Xıdovəndi əvış deştə məşiyyəti mığərrər kardəşe.çən,hakəs çımı votə çiyonədə şəkko, Xıdovəndi bəy kofir bıə holədə vindemon bəkarde.peşo hamyeşe:çımı pı-mo bəy fədo bıbu ki,demı həmnom iyən çımı haftminə fərzənde.Əv zəmini de dod-ədoləti pur bəkarde,çoko ki,de zılmo-sıtəmi pur bəbe.çən,hakəs çəy zuhuri zəmonədə bəy imon biyo,bənə əkəsiye ki,bə Muhəmməd(s) iyən Əli(ə) imonış vardə.bın surətədə vəhışt bəy vocib bəbe və hakəs bəy imon nıvo və bəy təslim nıbu,Xıdovənd vəhışti boəy hərom bəkarde və çəy vırə cəhəndımi otəşədəy və (ım)çı bevəcə vırəy”….

Şiyə etığodi fərhənqədə bəpe bə İmomon(ə) silsilə qıləy imon bıbu.bə həmonə dəlili xoto İmom Məhəmməd Bağıri(ə) hamyedə:”ikəs ki,həzrəte Məhdi(əc) zuhuru zəmonədə bəy imon biyo və bəy təslim bıbu,bənə əkəsiye ki,bə peyğombəri(s) risoləti iyən İmom Əli(ə) imoməti imonış bıə.İmom Məhəmməd Bağıri(ə) de ın tərtibi ım əsosin iyən kilidiyə nuktəku bəhs kardedə ki,çı imoməti sıftənə noxtə de İmom Əli(ə) imomətiye və çən imoməti silsilə oxo həm de həzrəte Məhdi(əc) imoməti bə oxo bərəse.

İmom Sadığ(ə) həm çı imomon silsilə piyo təkid kardedə və hamyedə:”hakəs bə imomon qırd silsilə iğrorko,əmmo Məhdi(əc) vucudi inkorko,bənə əkəsiye ki,bə həmmə peyğombəron etığodış bıbu,əmmo çı Muhəmmıədi(s) nıbuvvətış inkor kardə”.çın dıqlə rəvoyətonku ım nəzə bə dast omeydə ki,ım qıləy əsosə mevzuye ki,çı peyğombəri nıbuvvəti de imoməti məsələon miyono qıləy tanqə rabitə mevcude və imomət risoləti devroni tədavum iyən İslomə dini təkmiləkəy.çoko ki,Xıdovənd torıxi iyən Ğədiri tale həlləkə rujədə ki,İslomi azizə peyğombəri(s) həzrət Əli(ə) de İlahi fərmoni bə imoməti məğami mənsubış karde.Mayidə mıborəkə surə 3-ə şərifə ayədə hamyedə:”ımruj dinış boşımə komilim karde və ıştə nemətım boşımə təmomım karde və İslomım boşımə dinım ğərol doey xoto,çəyku rozi və xoşnudim”…

Binobərin qırd əkəson ki,İslomi sədr və sıftənə soronədə İlahi mıstəğim iyən sərostə fərmon nəzədə qətey nıbe və çı İmom Əli(ə) rəhbərəti iyən çə həzrəti bəpeştə çı imoməti silsilə vəy qətey be,şəkk niki, əvon bə inhirofə roy səmt şıən və bə umumi təsəvvıri əks,nəyinki,ım inhirofə cərəyon de peyğombəri(s) iyən həzrət Əli(ə) mıxolifətışon nıkarde,bəlkəm mıstəğim iyən oşkoə formədə de İlahi fərmoni mıxolifətışon karde.Kərimə-Ğıron Ənami mıborəkə surə 33-ə şərifə ayədə de oşkoə surəti bə ım mevzu işorə kardedə və hamyedə:”yəğınən əmə zıneydəmon çəvon votə çiyon hukmən tıni ğəmqin kardedə. həyğətədə əvon tıni təkzib kardedənin,bəlkəm sıtəmkoron (çımı nozil bıə) ayəon inkor kardedən(və deçəy təkzibi koy məşğul beydən)….