İlahi rəhbəron-217

İlahi rəhbəron-217

Binobərin qırd əkəson ki,İslomi sədr və sıftənə soronədə İlahi mıstəğim iyən sərostə fərmon nəzədə qətey nıbe və çı İmom Əli(ə) rəhbərəti iyən çə həzrəti bəpeştə çı imoməti silsilə vəy qətey be,şəkk niki, əvon bə inhirofə roy səmt şıən və bə umumi təsəvvıri əks,nəyinki,ım inhirofə cərəyon de peyğombəri(s) iyən həzrət Əli(ə) mıxolifətışon nıkarde,bəlkəm mıstəğim iyən oşkoə formədə de İlahi fərmoni mıxolifətışon karde.Kərimə-Ğıron Ənami mıborəkə surə 33-ə şərifə ayədə de oşkoə surəti bə ım mevzu işorə kardedə və hamyedə:”yəğınən əmə zıneydəmon çəvon votə çiyon hukmən tıni ğəmqin kardedə. həyğətədə əvon tıni təkzib kardedənin,bəlkəm sıtəmkoron (çımı nozil bıə) ayəon inkor kardedən(və deçəy təkzibi koy məşğul beydən)….

Əzizə əməson,ısət həm de tosə qıləy həddi zınemone ki,həzrəte Məhdi(əc) nəsəbi silsilə nəzəku bə İslomi peyğombəri(s) iyən bəçəy pokə xanedani mənsube,bo ədoləti bəpro və zılmi rınə dəparçıneyro ğıyom bəkarde və ə həzrət çı qırd peyğombəron,vohidə Xıdopərəston, şəhidon,salehon iyən sıddığon hədəfon real bəkarde və bə həyğət bərosne,əmə həm bəpe fəğət zuhuri intizorədə məmandəmon və bəştə ehdədə bıə məsuliyyəton əməlkəmon.Haftminə İmom(ə) qıləy rəvoyətədə çə həzrəti devronədə bıə əsliyə xətton tərsim kardedə,kəşeydə və hamyedə:”xoş bəçəmə şiəyon holi ki,çəmə Ğayimi ğeybəti zəmonədə bəçəmə imomət və viloyəti ğoymə rıştə çanq bıjənon,çəmə dustiyətiyədə və çəmə deşmınonku bə diyəro mandeyədə sabit ğədəm bımandon”.əvon (nəzə)cəhəto bənə əmən və əmə həm deəvon qıləy mıştərəkə nəzəmon heste.əvon çəmə imomətiku və çəmə şiyə bıeyku rozin.bə Xıdo ğəssəm maşkinə ğıyoməti ruji deəmə iqlə dərəcədə iyən iqlə məğamədə bəbeyn…

Çoko ki,vəynə bərnomonədə həm votemone,həzrəte Məhdi(əc) ğeybəti devronədə bəpe əmə betafut iyən beməsuliyytət məmandəmon.bəlkəm bın zəmonədə har qıləy devronisə həm vey məsyuliyyət hiskəmon.məxsusən ısətnə əsrədə çandə da qılə bəlkəm çand sa qılə inhirofiyə fırğə har qıləyni inev de mıxtəlifə hiyləon dınyo iştimoyi fiki cəlb kardey fikədən.jıqo qıləy zəmonədə Haftminə İmom(ə) çı şiəyon şıəro xətti ruşin və məlum kardedən və çəvonku tələb kardedə ki,bə çımon hiç qıləyni pıxə rismonon çanq məjənən və bəçəmə viloyət iyən imoməti penıssiyə rismoni təməssıkko ta bə inhirofə roon səmt nışo və bə şəytoniyə cərəyonon tori nıeqıno.Haftminə İmom(ə) ıştə kəlməon dəvomədə hamyedə:”xoş bıbu bəçəmə şiəyon holi ...ki,ğeybəti devronədə bəçəmə dustiyətədə və çəmə deşmınonku bə diyəro mandyeədə sabit ğədəmin”….

İmom Rıza(ə)  de coqlə imomon(ə) bə ico çı həzrəte Məhdi(əc) həxədə çandə qılə nuktəonku bəhsış kardə.ə həzrət bə Əbu Əli Rəyan ibn Səlt ki,çə həzrəti devronədə Şiyə yolə alim be və dəparsəş be ki,şımə Sahibul-Əmriyon?-ə həzrəti hmayəşe:Sahibul-Əmr ki,və`də doey bıə mı nim.çun az həm siyosi mevğıyyətiku və həmən cismoni ğudrətikuqıləy kifoyət ğədərədə zum ni. çəmə Ğayim ikəse ki,cıvonon mənzərədə zuhur bəkarde və qıləy barzə mevğıyyətış bəbe və vey zumandə cismış bəbe.joqo ki,ehanə ıştə dasti bəsə həmməysə dıjdə doonsə dırozko,çı bıniku bebəşe və əgər çı bandı-ku bıniku fəryod bıkəşo,çəy səxrə və rıjon bərıjiye.çı Mosə(ə) əso və Suleymoni(ə) anqıştə çəy dastədə bəbe.Əv çımı çominə fərzənde.Xıdovəndi əvış boçəy xoto çı zərəlonku (məxfi iyən punhonədə)əmonədə obəqəte(ta zuhur iyən ğıyoməti şərayit hozzı bıbe).peşo əy (dınyo çəy intizorədə mandə zəmonədə)zohir bəkarde ta dınyo de ədoləti pur bəkarde.çoko ki,de zılmobidodi pur bıəbe”…