İlahi əsma

İlahi əsma

Cəloliyyə nomon ə əsmas və nomonin ki,əzəmət,barzəti iyən bəpeəti məğami nışon doydə və bəvonədə ğəhr,ğələbə və seytərə mevcude.bənə Ğabiz,Mane,Ğəhhar,Muzill və sayirə.çımi mığobilədə Cəmoli əsma ğərolış qətə ki,bəvədə rəhmət,lutf və şoyvonəti ləpə jeydə,insoni bə bəştə tərəf cəlb kardedə və bə unsiyyət,eşğ iyən məhəbbəti boyis beydə.bənə Lətif,Nur,Hadi,rəzzağ,Rəhm və sayirə.de qıləy co iborəti Cəmoli əsma bə Xıdovəndi aşığ bıə bandə hozzı kardedə.joqo ki,Xıdo bəştə nez hiss kardedə və Əy ıştə dust zıneydə.bın holədə Cəmoli əsma bə bandə ıştə yol iyən barzə məğami soyb bıə pərvərdıqoriku bıə tars,xəşiyyət  iyən vəhşəti boyis beydə ki,bəçəy sıxan iyən rəftoron nəzorət kardedə.həyğətədə Xıdovənd deştə Cəmoli sıfəton ıştə bandəon bəştə səmt vanq jeydə və deştə Cəloli sıfəton əy de ziyodə səyon bə kəmoli barzə mərtəbəon rosneyro vodor kardedə.bəçəy xoto Xıdovəndi Cəlol iyən Cəmoli sıfəton Xıdovəndi cazibə iyən dafiyə ğıvvə hisob kardey bəbe və çı viro beməkəmon ki,ım dıqlə hejo de iyandeyn. yəni Cəmol be Cəlıol nin və Cəlol həm be Cəmol nin.Xıdovəndi vanq jıey və tojney və cəzb iyən dəf kardey iyande kənon.Ərrəhmoni mıborəkə surə 26-27-ə şərifə ayonədə omə%”Kullu....Harçi zəmini dimisəy foniye və fəğət çı pərvərdıqori zot mandənine ki,Əv çı Cəlol iyən İkromi(Cəmoli)soybe”..

Odəmi dığğəti cəlb kardə çi ıme ki,kali mıfəssır iyən təfsirəvonon bın bovədən və jıqo hisob kardedən ki, Xıdovəndi fəzli və İkrami de Cəloli iyən de Xıdovəndi yolyəti bə ico bıey,çəmə dığğəti bə ım koy səmt cəlb kardedə ki,pərvərdıqori bəştə bandəon nisbətədə bıə təfəzzul iyən buzurquvarəti bəçəy benəhoyətə əzəmət iyən cəloli xotoye.....

Cəlil Cəloli kəlməku peqətey bıə və Cəlol mənzilət,əzəmət və ğədri yolyəti və kibriya mənoədəy.Cəlil istiloh iyən terminoloji cəhəto bə ə kəsi votey beydə ki.bənə Ğina,Səltənət,ğudrət iyən izzəti bıə Kəmoli kulliyə sıfəton ıştədə ehtivo kardedə.de qıləy co sıxani Cəlil ikəse ki,qırd maddi iyən mənəvi ğudrəti soybon və yolon çı Cəlili mığobilədə hırd,fəğır və ehtiyocinin.