İlahi əsma

İlahi əsma

Və yəbğa....bardə votemone ki,”İkrami” de de Cəlali bə ico bıey ki,Xıdovəəndi fəzl iyən yolyəti nışon doydə,əmə dərəsimon ki,pərvərdıqori bəştə bandəon nisbətədə bıə təfəzzul iyən buzurquvarəti bəçəy benəhoyətə əzəmət iyən cəloli dəlili xotoye.Xıdovənd deştə İkromi bəştə bandəon ın həyğəti dərosneydə ki,Əv çı kərəm iyən baxşeşi soybe və çı Xıdovəndi həmməysə dıjdə kərəm ıme ki,insonış çı ədəm və hiççiku bə vucud vardəşe və qıləy Xıdo ki,jıqo qıləy ko əncom doydə,ğadire ki,qılıəy odəmi bəştə əzəmət və cəloli bırosno.ısət ımruj “Kərimi” nom ki,həmmə xeyrat,fəziləton və bə xoş omə koon ıştədə ehtivo kardedə və inev “Cəlili” ismi təkmiləkəy.ım şərifə ism və nom 26 kərə Kərimə-Ğıronədə oko doey bıə və mıxtəlifə funksiyəş heste və dı kərə həm de Xıdovəndi ism və nomi zikr kardey bıə.....

Kərim “kərm”-rişəku və luğətədə səxovətin iyən əbaxşəti mənoədəy ki,vey əto kardedə və çı cokəson kufr iyən nunkuəti bəçəy əto hiç qıləy təsirış ni.Kərim bə hakəsi bıpyişe hətto nıpiyə holədə həm bəvon əto kardedə və ıştə əto kardeyədə hiç qıləy mınnət həm noydəni.həmçinin Kərim ikəse ki,cokəson əfv iyən baxşeş boəy hostone.tosə əvrə ki,nəyinki,baxşeydə bəlkəm çı cokəson yavəti mığobilədə həm bəvon çokəti kardedə.rəvoyətədə omə ki,qıləy şəxs  peyğombəri(s) palu omne ərzış karde:ha Rəsuləllah ha! ğıyoməti ruji çı bandəon hisob-kitob de kom kəsiye? .peyğombəri(s) hamyeşe:hejo Xıdo ıştən.həmonə fərdi voteşe:həni çımı fik  rohət be.peşo bəsə poysə əyşte və beşe şe.həzrəti bəştə əshobi hamyeşe:ım şəxs həyğətən mətləbon dərəsə şəxse.peyğombəri(s) əshob çə həmonə merdi dumo şin və çəyku dəparseşone:boçi peyğombər(s) hamyeşe ki,çı bandəon hisob-kitob de Xıdovəndiye,tı vote ısət çımı fik rohət be?.həmonə merdi voteşe:”Əlkərimu iza ğədərə əfa”Kərimə şəxs intiğom sıey ğudrəti pəydu kardə zəmonədə baxşedə və əfv kardedə.

İmom Əli(ə) həm qınokoron əfv iyən quzəşti çı Xcıdovəndi Kərimə ismi xıslətonku zıneydə və ıştə de “İlahiyyati Munacat”-i nomo məşhurə dıvo və sıtoyişonədə bə Xıdovəndi xitob kardə holədə ərz kardedə:”İlahi ...vələov la ma ərəftu ....Xıdolim ha! ehanə ıştı kərəmım zınə nıəbe,bəştı mıkofoti umum bıənəbe və tı oruzoəkəyon oruzo ğəbul kardero ,çı həmməysə kərimon kərim bıə qıləyni  və qınokoron quzəştəkə,mehribon əkəse ki,çəyku rəhmət tələb kardey bıəə”....

Kərim Şərif iyən çokəti mənoədəy.Xıdovənde-Mutəal Muminoni mıborəkö surə116-ə şərifə ayədə boştə ərşi çı kərimi sıfətış zikr kardə və hamyedə:fətəaləllahu .....qıləy Xıdo ki,hestemoni aləmi hukmdore və hiç qıləy ko ğərəz həxı mıəğərrər kardedəni,çəysə bəpeye ki,şıməni bihudə ofəyo.ğərəz Əv hiç qıləy məbudi bo pərəstışi ləyoğətış ni.Əve çə həmonə kərimə ərşi  pərvərdıqor və çı həmmə koon hukmdorəti çəy dastədəy”.mıfəssıron bo “İlahi ərşi” ım ismi və nomi oko doey xısusədə bın bovədən ki,”Kərimi” kəlmə əslədə şərif,veyəfoydənin  iyən çoki mənoədəy və çun ki,pərvərdıqori ərş çı Xıdovəndi ğudrətiku hikoyət kardedə,ım ərş həm bəpe veyfoydənin iyən çoke.