De Ğuds beynəlxalğə ruji mınosibəti bərnamə-2

De Ğuds beynəlxalğə ruji mınosibəti bərnamə-2

Xosə Tolışon səlom, rəməzonə manqədə dıvo kardəm şımə nımoj-rujəon iyən ibodəton ğəbul bıbun, mehribonon ımruj de şiəyon iminnə İmom, Həzrəte Əli(ə)-i zərbət hardey matəmə ruji sorəqardışi bərobəre ki ım ruji bə şımə xıdmət təsliyət ərz kardəm.Əzizon Rəməzanə manqi oxonə cımə ruj, Ğuds beynəl xalğə ruj nom noə bəy, çand qılə bərnomə ğolibədə, həminə ruji əhəmmiyəti barədə, de şımə əzizə həmzıvonon sıhbət bəkamon, dəvət kardəm dəmə bə ico bımandən.

Mehribonon, Rujəmo, ibodəti manq iyən de Xıdovənde Xalıği ıştə siri okardey ruje. Im əzizə manqədə rujə qətey fəğət nıhardey ni, bəlkəm ım manqədə, mısılmonon səyocəhd kardedən ki harcurnə qınoh, rəftor, votey iyən əməl ki insoni və əxloği erjon əks bıbu, çəyku diyəro bımandon.

De zılmi mubarizə bardey və məzlumiku mudafiə kardey, insoni və əxloği erjon vey yolə nışonəonku qıləyni bə hisob omeydə. Jəqo ki həmmə zıneydəmon, mıosirə torixədə Fələstini sərzəmini işğol iyən çəvon milləti avarə və nəslon məhv kardey, vey yolə zılmonku qıləyni bə hisob omeydə. Həminə cəhətədə və Fələstini məzlumə millətiku himoyədorətiədə, İroni inğilobi təsisəkə Həzrəte İmom Xomeyni(r) istikbori hukuməti vədə mubarizə bardeyədə bənə qıləy ruhaniyə alim və yolə hərəkəti rəhbər, Rəməzanə manqi oxonə cımə ruji Ğuds beynəl xalğə ruji nom noşe. Ta ım rujədə dınyo mısılmonon, ozodə xalğ və mıstəzəfon bə istikborəkəyon ələyh, Ğudsi ozodi vanq kon və de aksiya iyən har hərəkət, Fələstini məzlumə millətiku himoyədorəti kon.

İroni islamiyə inğilobi təsisəkə, İmom Xomeyni(r), de İroni podşohi istikborə rejim iyən çəy yolə himoyə əkə Amerkə, mubarizə bardey ğiyomi bino bey zəmoniku, Fələstini ozodiku himoyə əkardi. İmom Xomeyni(r)-i ım muhimm və torixiyə hərəkət ki rəyrə İroni islamiyə inğilobi səbarzəti bəpeşt əncom bıə, bo Fələstini məsələ bəji oqətey iyən mısılmonon iyən islami kişvəron diğğəti bə sionizm təhdili tərəf cəlb kardey xoto, əncom bıə be. Ə Həzrəti Co qılə hədəf ım be ki bə kali ərəbi kişvəron saziş xıyonəton reaksiya nışo bıdə, əcumlə Ənvər Sadat, de israili be ğanunə rejimi, Kəmp Deyvid nomo bıə sazışi təvafuği imzoədə ki ım rejimi ğanuni zıneydə.

Miladi 1979 minnə sori, Avqusti 8 minnə rujədə, İmom Xomeyni(r) Ğuds beynəl xalğə ruji elan beyro qıləy muhimmə mesajədə hamiyəşe: “az dəvardə soron, bə mısılmonon, israili təhdidi barədə oqohəti dodə bim, ki ısət ım rujon bə Fələstini bıvəon iyən hovəon ələyh bəştə dəhşətinə həmləon, şiddətin surəti idomə doydə. xususi Livani cənubədə, ki bo Fələstini mubarizə əkəyon məhv kardeyro, çəvon kə bombəran kardedən. Az dınyo mısılmonon iyən islami dıvlətonku pidəme ım cinoyətkorə rejim və çəy himoyə əkəyon dasti ğət kardeyro , de yande vahid bıbun və dınyo mısılmonon dəvət kardəm ki Rəməzanə mıburəkə manqi oxonə cımə ruji bənə “Ğuds ruj” intixob kon və qıləy mərosimədə, mısılmonə milləti ğanuni həx-huğuğon himoyədə, mısılmonon beynəl xalğə vəhdəti elan bıbu, Xıdovənde Xalığiku tələb kardəm ki mısılmonon kufri əholi vədə səbarz bıbun.”

İmom Xomeyni(r) co qılə mesajədə, Rəməzan mıborəkə manqi oxonə cımə ruji bə “Ğuds Ruj” nom noey əhəmmiyyəti barədə hamiyəşe: “Ğuds ruj qıləy beynəl xalğə ruje, ruji ni ki fəğət bə Ğuds məxsus bıbu, istikborəkəyon vədə muğabilə kardey ruje, həmonə milləton ki Amerkə və ğərəz Amerkə zılmi təziğon jintonədə bin. Həmonə ruje ki bəpe mıztəzəfon, istikboron mığubilədə hozzı bıbun və əvoni məğlub kon. Ğudsi ruj, islami ruje. Ğudsi ruj, qıləy ruje ki bəpe islami bəji bıkəmon və islami sərzəminonədə islami prinsipon və hıkmon icra bıbu.”

Həğiğətədə, Ğuds beynəl xalğə ruj, Fələstin, Ğəzzə və co islami kişvəronədə sionizm rejimi cinoyəton mığubilədə, islami umməti irodə və vəhdəti simvol iyən nışonəy.

İronədə iyən dınyo həmmə kişvəronədə, Rəməzanə manqi oxo cımə rujədə, mısılmonon iyən ozod fik kardə kəson, aksiya ğolibədə bə xiyabonon şeydən, iyən de israili be ğanunə rejimi mubarizədə Fələstini milləti hədəfonku iyən Fələstini ozodi və şərifə Ğudsiku, himoyədorəti kardedən.

İroni Yolə rəhbər Həzrəte Ayətullah Xamenei, Ğuds beynəl xalğə ruji barədə hamiyəşe: “ İronədə, islamiyə inğilob, mubarizədə bo Fələstinıjon, qıləy tojə fəsli bino kardə, iminnə ğədəmonku yəni İroniku sionist unsoron xarıc kardey ki Tağuti, bənə ıştə əmnə baza zıneydə bin, və sionizm rejimi ğəyre rəsmiyə səforəti vırə bə Fələstini nımoyəndəon aspardey, iyən nati cərəyoni ğət kardey tosə yolə koon və siyosi hevujə fəaliyəton ki həmmə bois bıə məntəğədə “muğaviməti cəhbə”  icod bıbu və muşkilaton həl beyro dılonədə umid rost bıbu. Ə Həzrət ijən əlovəş do: “ de muğaviməti cəhbə zuhur, sionist rejimi ko saxt və vey saxt bıə, və həlbətə inşaəllah vəoməyədə vey saxt həm bəbe, əmmo sionizm rejimiku mudafiədə, bə çəy himoyə əkəyon səyo cəhdi xususi Amerkə, vey əlovə bıə. Livanədə Hezbullah fidokor və cıvonə cəhbə iyən, Fələstini mərzon daxılədə islami cihod və Həmasi purənqizə qurupon icod bey, nı fəğət sionisti yolon bəlkəm Amerkə və ğərbi dışmənon həm niqəron iyən norohət kardə və əvon məntəğə iyən ərəbi kişvəronku komək tələb kardən və ım məsələ çəvon bərnoməonədə navəjən be. ımruj çəvon koon nəticə, ərəbi dıvləton yolon iyən Ərəbə mədəniyəti və siyosi xəyonətkorə şəxson rəftor və votemonədə, oşkoe və həmmə kəson çəşon mığubilədəy.”

Səmimi həmzıvonon bə ım bərnomə quş doe xoto şıməku təşəkkur kardəm, şımə nımoj-rujəon ğəbul bıbun.