Bə Ğədrə şəvi ayid məxsusə bərnomə-3

Bə Ğədrə şəvi ayid məxsusə bərnomə-3

Əzizə doston səlom, şımə ibodəton iyən nımoj-rujəon ğəbul bıbun, əzizon, Həzrəte İmom Əli(ə)-i şəhodətə rujon bə şımə təsliyət ərz kardəm, həmçınin ınşanqonə Rəməzanə manqi 23 minnə şəv iyən ğədrə şəvonku 3 minnə şəve ki dıvo kardəm ım əzizə şəvədə Xıdovənde Xalıği məğfirət iyən baxşış bə şımə ğesmət bıbu. Bə ım əzizə şəvi xoto, tojədən de məxsusə bərnomə şımə xıdmətədəmon. Dəvət kardəm de Tolışi Rədio bə ico bımandən və bə ım bərnomə diğğət kənən.

Mehribonə əməson, ın şanqo Rəməzanə manqi 23 minnə şəv ki bə Ğədrə şəv məşhure ğeyd bıə. həmonə şəv ki Kərimə Ğıroni nazil bıə şəve. In şanqo Xıdovənde Xalıği rəhməti bəon ojin. In şanqo mominon ıştə xalısinə dıvoonədə, bənə Coşəne kəbirədə, Xıdo vanq kardən. Mehribonə Xıdo həm çəvon vanqi cəvobi bədoy ki həmişə çəmə kənoədəy. jəqo ki Bəğərə surə 186 minnə ayədə hamiyəşe:

“Və havəxt çımı bandəon, çımı barədə xəbə sə vaxti(bıvot), həyğətən, az nezim, bəmı dıvo kardə şəxsi mıni vanq kardə vaxti cəvob doydəm, bəvədə bəpe çımı dəvəti ğəbul bıkənən iyən bəmı imon biyənən, ğasbu əvon perəsin.”

Əzizon, Xıdo rəsul(s) iyən Əeme Məsomin(ə)-i jimoni şivə diyə kardeyədə, ğədrə şəvon əhəmiyyəti dərk kardedəmon, Peyğəmbər ım şəvi barədə hamiyəşe: “har kəs ğədrə şəviku məhrum bıbu, həmmə xəyronku məhrum bıə.” Xıdo Rəsul(s) nə fəğət, ğədrə şəvədə bəlkəm Rəməzan mıborəkə manqi 3 minnə daonədə, hıteku diyəro mandedə be və məçitədə motəkif əbi. Ə Həzrət har şəv tosə sıbi əzon oğo be iyən Xıdo dərqohədə bə mınocot və dıvo məşğul be. Peyğəmbər ım şəvon barədə hamiyəşe: “har kəs ki ğədrə şəvi de əhyo iyən şəvi nıhete dəvardono, tosə vəoməy sori, əzob çəyku diyəro bəmande”.

Həmçınin Həzrəte Əli(ə) həminə barədə hamiyəşe: “ Xıdo Rəsul(s) jəqo be ki ıştə lef-oləti cəm əkardi iyən Rəməzanə manqi oxonə dahonro hozzo əbi, və həmişə jəqo be ki Rəməzanə manqi 23 minnə şəvədə ıştə ailə oğo əkardi iyən har kəs ki handədə be, bə çəy sə ov peşandi, ta ğədrə şəvi dərkiku məhrum nımando.”

İmom Əli(ə) həm sori mıddətədə, şəvədə Xıdo vey ibodət iyən dıvo kardedə be əmmo ğədrə şəvonədə məxsusə holış be.və vey bevəcə şəroyetədə, bə ibodət iyən nıhete məşğul be. Xususi ıştə umri oxonə ğədrə şəvədə ki vey əcibə hol-həvoş be.

Əmmo ğədrə şəvədə, Həzrəte Fateməye Zəhra(s) əhvolonədə həm omə ki ə Həzrət anədə ibodət əkardi ki İmom Həsən(ə) hamiyəşe: “dınyoədə hiç kəs Fatemə(s)-iku vey zohid nıbe, həmişə jəqo be ki anədə bə ibodət kardey məşğul bıdə be ki çəy lenqon dəjedə be.”

Həzrəte Zəhra(s) nom bə ım xoto Zəhra be ki şəvədə Ə Həzrəti oğo bey iyən ibodəti nur bə osmon səmti viriski dodə be. Im Həzrət(s) ğədrə şəvonədə, nə fəğət ıştən oğo be bəlkəm ıştə hırdənon həm icbor əkardi ki şəvədə oğo bıbun. Jəqo ki rəvoyətonədə handeydəmon: “ Həzrəte Zəhra(s) sirə ım be ki ıştə ailəku bə hiç kəs icozə dodə nıbe ki ım şəv yəni Rəməzoni 23 minnə şəvədə bıhıto, Həzrəte Zəhra(s) bazi vaxt bəştə hırdənon məsumə dimi ov peşandedə be ta oğo bıbun iyən ğədrə şəvədə ilahi rəhmət və mənəviyətiku istifodə kon, və hamiyəşe: “məhrume ə kəs ki ğədrə şəvi xeyr iyən bərəkətiku məhrum bıbu.”

Həminə barədə İmom Muhəmməd Bağır(ə) hamiyəşe: “ har kəs ğədrə şəvi əhyo bıqəto, mehribonə xıdo, çəy qınohon bəbaxşe”. Həmçınin Şeyx Əbbas Ğomi nəğl kardə ki “İmom Muhəmməd Bağır(ə) Rəməzanə manqi 21 iyən 23 minnə şəvədə, tosə şəvi nimə dıvo handeydə be iyən peşo bə nımoj vote məşğul əbi.”

Şiəyon 7 minnə İmom, İmom Musəbne Cəfər(ə)-i əhvolon barədə omə ki əv sori mıddətədə vey şəvonədə oğo be iyən ibodətə koon əncom ədi, ə Həzrəti ziyorətnomədə handeydəmon: “ Əv şəvon tosə çəsenə oğo be, və Xıdo dərqohku məğfirəti tələb əkardi dırozə sucdəon, arsə çəşon, vey mınocoton iyən təzərro, ım Əzizə İmomi hol-əhvol be”. İmom Musaye Kəzım(ə) ım şəvonədə nıfəğət ıştən oğo əmandi, bəlkəm ım ko bə co kəson həm tovsiyə əki iyən hamiyəşe: “ğədrə şəvədə har kəs ki ğusl bıko və tosə sıb nıheto, çəy qınohon pok bəbe”.

Əmmo xosə Tolışon, ım əzizə şəvonədə co qılə koon iyən əməlon ki Məsumin jimoni metodədə diyə bəbe, Kərimə Ğıroni bə sə qəte mərosime, de diğğət bə ım ki Ğıron çı həxi sıxəni təcəlliye, çən ım şəvonədə Ğıroni sə qətey bə ım məenoe ki aləmədə, ğərəz Ğıron bə ki Xıdovənde xalıği nımoyəndəy co çı vıcudış ni. Həmçınin Ğıron ki İlahi sıxəne, əy bə sə noəmone ta Xıdo rəhməti sayədə bımandom iyən Xıdo bə çəy yoləti ğəssəm bıdəmon iyən peyğəmbər və məsum(ə) imomon vasitə ğəror bıdəmon ki ım şəvonədə əməni bıbəxş.

mehribonon bə ım bərnomə quş doe xoto şıməku təşəkkur kardəm, tojədən dıvo kardəm ım əzizə şəvonədə, Xıdovənde Xalıği baxşış, lutf və inoyəti şomil bıbəmon.