Nəhcul-Bəlağə pand iyən hikməton-16

Nəhcul-Bəlağə pand iyən hikməton

Və ğalə(ə):mən cəra....əkəs ki,ıştə oruzon dumo bışo,çəy maq bome bərəse.

Nəhcul-Bəlağədə muhim iyən təkrorinə mevzuonku qıləyni oruzu mevzuye.oruzu insoni bə hərəkət vardə motore.ikəs ki,oruzuş nıbu bo jimoni dəvomi,səy və fəoliyyətiro hiç qıləy motivasiyə və ənqizəş nibəbe. çoko ki,votey be.inson de oruzu bəyjiye.ım sıxan çı Peyğombəre-Əkrəmi(s) hədisiku peqətey bıə ə həzrət hamyedə:”Ələməlu.....umu və oruzu boçımı umməti rəhməte və ehanə umu və oruzu nıbu,hiç qıləy moə bəştə fərzəndon şıt nibədoe və hiç qıləy boğbon qıləy toğə nibəkaşte”.

İnə çı atifə iyən mehribonəti məzhər iyən simvole.əmmo moə bə mehribonəti səmt vodor kardə iyən çəy atifə və hisson voşi nozil kardə çi,umuye.əgər iruj umu çəyku bıstənon həttto hozzı nibəbe bəştə nuyəzandi şıt bıdo və çı himmət,səy iyən fədokorəti dast nibəğande.qıləy hədisədə həzrəte İsa-Məsihiku(ə) omə:”qıləy vırədə nıştə be və qıləy piyəmerdış mışohidəş karde ki,de bor iyən kılənqi de zəmini pəley ko məşğule.həzrəte İsa-Məsih(ə) bə Xıdo dərqo ərzış karde:Xıdolim ha! çəy umu iyən oruzu çəyku bıstən.ğəflətən həmonə piyəmerdi borış şodoe və bəsə zəminisə olxarte,hıte.cınqıri bədiqə həzrəte İsa-Məsih(ə) bə Xıdo ərzış karde:bari İlahi! çəy umu iyən oruzu bəy oqordon.ğəflətən vindeşe ki, həmonə piyəmerd bəsə poysə əyşte və ijən sənibəton deştə rujmərrə ko iyən fəoliyyəti məşğul be. həzrəte İsa-Məsih(ə) çə həmonə piyəmerdi palu şe və çəyku sıvolış karde ki,az tıku dıqlə mıxtəlifə holətım vinde.qıləyni ım be ki,tı ikərə borı bə qıləy kıncı şodoe və bəsə zəminisə hıtiş.əmmo dıminə mərhələdə bəsə poysə əyştiş və deştə koy məşğul biş.həmonə piyəmerdi cəvobış doe:iminə mərhələdə fik kardeme ki,az piy və ociz bıəm.çıro de ziyodə səyon qırd bə ım saxtiyon tov vardedəm və bəştə zəhmət doydəm?.əve borım ğande bə qıləy kəno və olxartim,hıtim bəsə zəminisə.əmmo lıski nıdəvarde ki,ım fik bəçımı zehn dəşe ki,çı komco məlme ki,mı ziyodə omə soron bəyji bəmandem və bəştə həyoti dəvom bədom?.inson çanədə ki,bəyjiye,boştə iyən boştə xıyzoni səy və təloş kardedə.bə hisob az borım ijən bə dast qəte və de ko məşğul bim....

Im orozuye ki,bə insoni qıləy enerji və hərəkət doydə.əmmo iyo coqlə əsosinə nuktə mevcude və əv həm ıme ki,har qıləy çi ki,fırsəte,həmonə holədə təhdid həm bıey bəzıne.de qıləy co bəyoni har qıləy çokə ko, ehanə çəyku dısırst iyən səhihə şikiləd oko doey nıbu,bəd iyən təhlukənin bıey bəzıne.Əmirəl-Muminin Həzrət Əli(ə) Nəhcul-Bəlağədə de oruzu mevzu bəyon iyən təğdımi,bəmə omutedə ki,çokonə əmə ıştə oruzuon idorəkəmon və xoşbaxt iyən hərəbaxt bıbəmon.əmmo ehanə ğəflət bıkəmon çəmə dırıstə oruzon bə xəyoli oruzon təbdil bəbe ki,ğərəz ıştə umri zay kardey və zərəli co hiççi hosil nibəbe.

Əmirəl-Muminin Həzrət Əli(ə) Nəhcul-Bəlağə nonzəminə hikmətədə jıqo hamyedə:Və ğalə(ə):mən cəra....əkəs ki,ıştə oruzon dumo bışo,çəy maq bome bərəse.İmom(ə) bın hikmətədə bə yod dənoydə ki, ğeyri-həyği iyən duyə oruzuon insoni dumo ıştə bışıkırne ta çəy umri və cıvonəti sərmoyə çəy dastiky bıstəno.hətto qahi zəmon çəy abru bardedə və oxoyədə həm bə həmonə oruzu həm rəseydəni. həyğətədə xəyoli oruzuon ki,çəmə ğudrəti məhdudə və əhotədə nin,bənə qıləy miraj və səroviye ki, təşmə odəmon dumo ıştə bardedə.