Nəhcul-Bəlağə pand iyən hikməton-17

Nəhcul-Bəlağə pand iyən hikməton

İmom Əli(ə) hamyedə:Əğbilu dəvi....çı alicənob və cıvonmerdon fırsemoniku dəvardənən,çunki çəvonku hiçkəs ni ki,illa Xıdovəndi lutfi dast əy barz bəkarde.

Nəhcul-Bəlağə vistminə hikməti əxloği ğəşənqə pandonış heste.Əmirəl-Muminin Həzrət Əli(ə) Nəhcul-Bəlağə vistminə hikmətədə bə fırsemonon işorə kardedə ki,qahi zəmon çı şəxsiyyətinə odəmonku bə əməl omeydə və bə həmmə kəson tevsiyə kardedə ki,çəvon fırsemononku dəvardon və qızəştkon. İmom Əli(ə) hamyedə:Əğbilu dəvi....çı alicənob və cıvonmerdon fırsemoniku dəvar dənən,çunki çəvonku hiçkəs ni illa ki,Xıdovəndi lutfi dast əy barz bəkarde....

Alicənob və cıvonmerd bə ə kəsi votey beydə ki,harco dastış blırəso və kardey bızıno qıləy ko əncom bıdo,imtino nibəkarde və həmonə əməli bə vırə bərosne.əv har vırədə ki,abru noey lozım bıbu və qıləy muşkil hər kardey bıbu,ıştə dasto omə koon bəkarde.jəqo şəxs adətən qızəştış heste və fədokore.ısət qıləy zəmon ki,jıqo cıvonmerdə şəxs,jıqo pokdovnə fərd,jıqo pokəçəş,qızəştəkə şəxsiyyət,isor iyən confədo,əxloğin iyən milləti tərəfdorə şəxs ehanə bıfırso və xətoko,çəy ım koyku xəbədo bıə fərdon vəzifə və məsuliyyətışon heste ki,çəvon ım xəto iyən fırsemonon oşko nıkon və çəy həmonə piyo çəş vikon.

Əmirəl-Muminin Həzrət Əli(ə) bın hikmətədə  Xıdovəndi bə alicənob və cıvonmerdə şəxsi nisbətədə bıə inoyət və məhəbbəti dığğət kardedə.boçi ki,ehanə əvon harçənd bə qıləy xəto iyən fırsemonon həm dıço bıbon,əmmo bəştə rufi səlomətəti iyən de bə Xıdovəndi bıə çok iyən husni rabitə dəlili xoto,bilofosilə ıştə xətoon əvəzi beşeydə və əy cubron kardedən və de Xıdovəndi dərqoyku uzrxahəti və de tobə iyən inobə, ıştə qızəştə iyən dəvardə qıno iyən fırsemonon əvəzi bekardey dumoye.binobərin əgər jıqo şəxson bə qıləy səhf və fırsemonon dıço bıbon və mıvəğğətən bə şəytoni tor eqınon,çəvon ın ləyoğətışon heste ki, millət çəvon fırsemononku dəvardon vıə əvoni əfvkon.liza hədisədə omə ikəs ki,jıqo şəxson fırsemonon oşkoko,jıqo bızın ki,de Xıdovəndi mıhoribə və canqış kardə.....

Imrujnə rujonədə çəy bəy kam dığğət kardə və virtual aləmədə bə əməl omə çi,ıme ki,çı fərdon məxsusən metərbər iyən çokə ko soyb bıə şəxson səhf və fırsemonon fovrən və rəyrə sosyal şəbəkəonədə pevolo kardey beydə və çəvon abru və şəxsiyyət komilə formədə xərob kardey beydə.qıləy holədə ki,həmonə xəbə sosyal şəbəkəonədə pevolo bıə zəmonədə,sıftədə bəpe əmə çəy dırıstəti iyən səhihəti təhğığkəmon,çən peşo bəpe vindey bıbu ki,aya bın xəbədə mıboliğə heste ya ne? Qahi zəmon qıləy noçiz iyən hırdə xəto dıjd kardey beydə və çı fərdon abru iyən heysiyyət və çəvon ehtırom iyən şəxsiyyət darıştey və çı miyoniku bardey beydə.və holın ki,Xıdovənd Səttarəl-Uyub yəni xəto və fırsemonon puşniyə kəse və İmom Əli(ə) bın hikmətədə bəşəriyyəti bə ın İlahi ğəşənq iyən reçinə xısləti səmt dəvət kardedə....