Nəhcul-Bəlağə pand iyən hikməton-23

Nəhcul-Bəlağə pand iyən hikməton

Və ğalə(ə):iza kuntu...qıləy zəmon ki,tı jimoni kardedəş və maq bəştı səmt dim qəteydə.çən,ıştı de maqi bıə vindemon çı rə bəbe.

İnson bə dınyo omə ləzəku har qıləy saat ki,çəy umriku dəvardedə,çəy sərmoyə ioyən hestemoniku i baxş bəkam beydə.har qılət nəfəs ki,əv kəşeydə,i qəm bəştə jimoni oxonə xətti nez beydə.çıro ki,çı insoni umr məhdude və nəhoyətən iruj bə oxo bərəsəe.dırıst bənə qıləy ço ki,çəy vəş qətey materyal de tədrici kam beydə və oxoyədə okuşeydə,hamuş beydə.

Im rəyrə hərəkət kardə rujon hiç qıləy ləzə nımandə holədə de tobə maqi omey rəsey dəvomış heste.co tərəfiku həm bənə təsodufon,otəş qətey və noxəşətiyon bıə mıxtlifə hodisəon ki,de umri dəvardey və bədəni zəyfəti ki,bıpyo-nıpyo çı insoni səlomətəti çı xətər və təhlukə mə`rəzədə ğərol doydə,çı insoni umri dırozi ziyodə təsironış heste.de qıləy co iborəti insoni bəştə umri oxoy səmt bıə hərəkət və çı hodisəon bə insoni səmt bıə seyr,de maqi bıə vindemoni bə nav dənoydə.dırıst bənə dıqlə mığobilə noxtəku bə iyande səmt hərəkət kardə dıqlə çiy hərəkəti ki,hukmən de ziyodə surəti bəiyande pebəkkuyen.

Əmirəl-Muminin Həzrət Əli(ə) Nəhcul-Bəlağə vistı nəvminə hikmətədə çın surəti və maqi ləzə rəsey barədə bə həmmə kəson çəşnavi doydə və hamyedə:”iza kuntu...qıləy zəmon ki,tı jimoni kardedəş və maq bəştı səmt dim qəteydə.çən,ıştı de maqi bıə vindemon çı rə bəbe”.

İslomi mığəddəsə ayini tərbiyəvi usul iyən prinsiponku məxsusən Nəhcul-Bəlağədə dayimi surətəsdə maqi bə yod dənoey iyən əy zikr kardeye.maq çı jimoni oxo mənoədə ni.maq bın dınyoədə çı insoni jimoni oxo bə hisob omeydə.ikəs ki,bəştə maqi nisbətədə ğafile,jıqo de dınyo jimoni çəy sə taspeydə ki, jıqo bızın dınyəvi jimon əbədiye.bə hisob əv,boştə axırəti qıləy azuğə və tuşə hozzı kardedəni.qıləy holədə ki,maq qıləy inkor nıbə həyğəte və ağılmandə inson hiçvaxti ımi çı viro bekardedəni və çı həlli roy dumo nəveydə.əve əv,ıştəni bo ın i nəfəriku iborət bıə səfə yəni bo Bərzəx iyən Ğıyoməti ruji səfə hozzı kardedə.

İmom Əli(ə) bo maqi hozzoəti həmməysə çokə amili həmonə maqi bə yod dənoey zıneydə.ə həzrət Nəhcul-Bəlağə vistı həştminə xutbədə  de qıləy kırtə təzəkkur iyən pandi dınyo iyən çəy de axırəti mığoyisədə bıə foniyəti həxədə hamyedə ki,əv qıləy kamə an və ləzəku iborəte.joqo ki, hamyedə: ”həyğətən dınyo peştış kardə və ıştə vidoş elon kardə və axırət bəçəmə səmt dimış qətə və ıştə ləşkəri nav şıəkəsonış oşko kardə.aqah bıbən ki,ımruj çı təmrin iyən hozzıəti ruje və maşki çı mısobiğə ruj.çı bardə kəson mıkofot vəhışt iyən bə dumo mandə kəson cəzo otəşe...aqah bıbən!ikəs ki,çəy maqi rəsey bənav əməl bıko,çəy əməl foydənine və çəy maq bəy qıləy zərəl nibərosne.və əkəs ki,əmələdə səhlənkoətiko,bə xusron iyən ziyoni giriftor bəbe və maq boəy vey ziyon bəvarde....