Pars Today

Kərbəlo de co qıləy rəvoyəti

Əmə həmmə aşığonə surətədə İmom Huseyn(ə) iyən çəy dustonımon pieydə və ıştə rozəonədə “Ləytəna kunna məəkum” votedəmon və qahi zəmon həm ıştəni çə həzrəti əshobi kəno ğərol doydəmon ki,əvon ıştəni bo İmom Huseyn(ə) fədo kardero hozzı bin və bənav dəşedəbin.çə şəxs və əshobonku qıləyni həm Hurr ibn yəzid Riyahi be.

Hurr ibn yəzid de tobə Aşurə ruji sıbi zəmoni çı umrə sə`di ləşkəri cərqə və dılədə be.Hurr Kufədə qıləy yol və məşhurə şəxs və çı həmmə kəsi palu etımod kardəninə inson be.çı İmom Huseyni(ə) bə Kufə şəhri nez bıey xəbə şəhri dılədə qardedəbe.çı ibn ziyodi iminə intixob iyən vıjnemon ım be ta çı İmomi(ə) vəy bıqəto.ibn ziyod i həzo bə asbi suvar və bo canqi hozzı bıə ləşkərış bə Hurri doşe və əvış bə İmom Huseyni(ə) səmt vığandeşe.çı Hurri ləşkər bo Məhərrəmə manqi çandə ruj mandey,bə İmom Huseyni(ə) omin rəsin.

Hurr şiyə nıbe,əmmo İmom Huseynış(ə) pieydəbe və əv bo Məhərrəmə manqi çandə ruj mandeyku de tobə Aşurə ruji çı qıləy saxtə səçıni mığobilədə sərqərdon mandəbe.bə hukuməti əmron tabe bıəy iyən itoət kardey ya de peyğombəri(s) fərzəndi bə cio bıbu.əmmo bın miyono hiçvaxti çı qıləy çiku dastış nıkəşe və əv həm bəştə zəmonə İmomi(ə) ehtırom iyən hurmət noey be.ıştə de İmom Huseyni(ə) iminə mıloğat və vindemonədə,qıləy zəmon ki,İmom(ə) dastnımoj qətedəbe və bo nımoji hozzı beydəbe,Hur çı İmom Huseyni(ə) xıymədə de ə həzrəti sehbət kardey koy məşğul be.İmomi(ə) bəy voteşe ki,əzoni vaxt nez bıə və bışi deştə ləşkəri bə ico nımoj bıvot ki,əmə həm iyo bə ico ıştə nımoji bərpo kardedəmon və peşo sehbət bəkardemon. Əmmo Hurri ğəbulış nıkarde,hejo əyo dastnımojış qəte və voteşe ki,az iyən çımı həmmə ləşkər bəşmə ixtido bəkardemon.İmom Huseyni(ə) “Allahu-Əkbər”-ış vote və çə həzrəti peştono mandə çandə sa nəfər həm ıştə dastonışon rost karde və “təkbirətul-ehramışon” vote.çandə sa nəfər nımojəvoton ki,çandə ruji bədiqə bəştə İmom iyən İmom cəmoəti ələyh şımşişon bəpe rost kardeşone....

İminə nımoji bəpeştə İmom Huseyn(ə) rost be və bo həmməkəson sehbətış karde.ıştəku,Kufə əhli dəvətiku,çəvon noməonkuş vote və peşo de noməon pur bıə xurcunış oj karde və əvonış bə həmmə kəson nışonış doe.dıminə nımoj ki,təmom be,Hur çı İmom Huseyni(ə) palu şe və voteşe ki,az məmurim və vığandə bıəm ta ıştə vəzifə bə oxo bırosnom.əv həm ıme ki,mı şıməni bəpe çı ibn ziyodi palu bıbom.Hurri çanədə həm isrorış karde,İmom Huseyni(ə) ımış ğəbul nıkarde və oxoyədə təklifış doe ki,İmom(ə) ıştə məsir və roy əvəzko və bə Kufə səmt nışon ta əv həm qıləy fırsətış bıbu ki,duborə və sənibəton çı ibn ziyodiku kəsbı-təklif və qıləy əmr ğəbulko.

Məhərrəmə manqi dıminə ruji İmom Huseyn(ə) iyən çə həzrəti ləşkər bə Kərbəlo rəsəbin ki,çı ibn ziyodiku qıləy peyk və ğasid ome rəse.Hurri noməş hande və şe çın nomə mətni bə İmomi(ə) nışon bıdo.ibn ziyodi nıvıştəşbe:Huseyn ibn Əli(ə) qıləy beov iyən bealəfə biyobonədə oqət və bəçəy ələyh ğəddor bıbi.həmçinin ım ğasid ıştı iyən ıştı ləşkəri xəbon bomı bəvarde.İmom Huseyni(ə) ləşkər itərəfədə və çı Hurri ləşkəri co tərəfədə xıyməşon je.çı Məhərrəmə manqi dıminə rujiku de tosə Aşurə ruji har ruj bə de İmomi(ə) orduqo dimbədim bıə ləşkəri sərbozon izofə və əlovə beydəbin və bın səmtədə hiçkəs əlovə beydənıbe ki,hiç,qahi zəmon çand nəfər həm çı İmom Huseyni(ə) ləşkəriku co beydəbin.umər səd ki,bə Kərbəlo rəse,Hurri ıştə vəzifəş bəçəy ehdəş noe və çı ləşkəri iqlə baxşi rəhbərətiş bəştə ehdəş peqəte.Hurr de tobə Aşurə ruji sıbi zəmoni hənuz və ijənən de İmom Huseyni(ə) canq kardey koy bovəş kardə nıbe.əmmo çoko ki,çı umər sə`di Aşurə ruji ləşkəri hərbi dəçınemonış mışohidəş karde və çı canqi zumzuməş məse, ıştənış bə umər sə`diş rosne və de şəkk iyən təhğıri dəparseşe:həyğətən de peyğombəri zoə canq kardey fikı heste?