Kərbəlo de qıləy co rəvoyəti-6

Kərbəlo de qıləy co rəvoyəti-6

Aşurə ğəhrəmonəti şəhidə əshobon

Həbib çı Kərbəlo coqlə şəhidonkuye ki,ziyodə torıxəvonon əy çı Xıdo-Rəsuli(s) əshobonku qıləyni zınəşone.çı Həbib ibn Məzahiri əsl nom Həbib ibn Məzhəre.

Əv bənə Muslim ibn Ovsəcə çı Bəni-Əsədi ğəbiləku be və çı İslomi peyğombəri(s) besəti i sor bənav bə dınyo ome.çəy hırdənəti zəmon bə soronədə be ki,peyğombər(s) Məkkəye-Mukərrəmə şəhrədə milləti bə tohid iyən Xıdopərəstəti səmt dəvət kardedəbe,de İslomi peyğombəri(s) vindemon qıləy ovandəti boəy be ki,cıvonəti zəmonədə bəy nəsib bıəbe və ə həzrəti əvış de dini iyən İslomi maarif iyən təlimon oşnoş kardəbe.İslomi peyğombəri(s) rehləti bəpeştə Həbib de həzrət Əli(ə) beyəış karde və çı Əliiyibni Əbi Tolıbi(ə) viloyəti xəttədə ğərolış qəte.Həbib ibn Məzahir çandə kərə çı İslomi peyğombəriku(s) məsəşbe:”Ənə Mədinətul ilmi və Əliyyun babuha.fəmən əradəl ilmə fəlyətil-babə”.yəni mı çı elmi şəhrim və Əli çəy bə.hakəs ki,elmış bıpyo,həmonə bəyku daxil bıbu”. bəçəy xoto çı həzrəte Əli(ə) şoqirdon cərqədə ğərolış qəte və çə həzrəti məhzəriku ziyodə çiyonıış omute.

Həbib ibn Məzahir həzrət Əmirəl-Muminin Əliku(ə) məxsusə elmon bə dastış vardəşbe.joqo ki, votəşone ki,Həbib bə Mənya və Bəlaya elmon yəni bə ayəndə və omə rujonədə bə əməl omə çiyonku aqahbe.Sirə nıvıştə kəsonku idastə məlumotışon doə ki,Həbib çı Əliyyibni Əbi Tolıbi(ə) səhobəonku qıləyni bıə çı Yəhyo zoə Meysəm Təmmari şəhodəti forməku çı naviku xəbəş doəbe. İmom Huseyn(ə) həm qıləy nomədə çəy fəğohət və fəğihətiş elon kardə və bın nomədə Həbibi vucudədə bıə dıqlə pəsəndidə iyən bəxoşomə sıfətış jıqo bəyonış kardə:”tı qıləy ozod və ğıryətmandə insoniş”......

Əmirəl-Muminin Əli(ə) Kufə şəhri bənə ıştə hukuməti mərkəzi unvoni vıjniyə zəmonədə,Həbib ibn Məzahir bə Kufə şəhri ome ta ıştə mevla kəno bıbu.bəhisob əv çı Əmirəl-Muminin Əli(ə) məxsusə səhobəonku həm bə hisob omeydə və çə həzrəti hukuməti devroni qırd canqonədə yəni Siffeyn,Nəhrivon iyən Cəməli canqonədə iştirokış hestebe.

Çı mıoviyə maqi iyən yəzidi bə hukumət omey bədiqə,Həbib ibn Məzahir iminə kəs be ki,bo İmom Huseyni(ə) noməş nıvışte və çə həzrətiku piyeşe ki,ğıyomko.Muslim ibn Əğil bə Kufə omə zəmonədə Həbibi deəy beyətış karde və bəştə Kufədə bıə nufuzi xoto,ıştə qırd səyonku okoş doe ta ziyodə odəmon de İmom Huseyni(ə) nımoyəndə bıə Muslim ibn Əğili beyətkon.həlbəttə de ubeydullah ibn ziyodi bə Kufə şəhri daxil və cənab Muslimi şəhid beıy,əv məcbur be bəştə ğəbilə pənoh bıbu və i mıddət əyo məxfi be.

Həbib ibn Məzahiri sinnış bəpe be və bə İmom Huseyni(ə) “Həl min nasirin yənsurni” nido cəvobədə uzrxahəti kardey əzıni və votey əzıni ki,mıborizə kardey iyən şımşi jıey ğudrətım ni. Əmmo çı Səyyiduş-Şuhədo(ə) bə Kərbəlo omey xəbəş məse,de surəti ıştənış bə ə həzrəti rosneşe....

Həbib ibn Məzahir bə Kərbəlo kərvoni anqıl qıniyə zəmonədə,dışmeni bəy iyən bə İmom Huseyni(ə) coqlə əshobon voteşone ki,ehanə bın məsir iyən royədə bəyji mandeyon piyedə,şımə bəpe de İmom Huseyni(ə) bə ico bıeyku dast bıkəşiyon ta əmon nomə bıstəniyon.Həbib ibn Məzahir və çı İmomi(ə) coqlə duston əmon noməşon ğəbul nıkarde.Həbibi Kərbəloədə vindeşe ki,çı yəzidi dıjdə ləşkəri mığobilədə çı İmom Huseyni(ə) ləşkər vey kame,əve İmomi(ə) icozəş se ta bışo bəştə ğəbilə miyono və çəvonku koməq tələbko və əvon həm boon bə Səyyiduş-Şuhədo(ə) ləşkəri umuj bıqınon.çı Həbibi sehbəton təsirin be və təğribən hafto nəfər bə ğərol omin ki,de Həbibi bə ico bıbon.əmmo çı dışmeno casuson və çı ubeydullah ibn ziyodi ləşkəri odəmon çın fərdon bə İmom Huseyni(ə) ləşkəri umuj qıniyey mane bin və roşon bəçəvon dimi basteşone.əmmo Həbibi ijən ıştənış bə Kərbəlo səhro rosneyış zıne.

Aşurə ruji əv deştə həmmə şucoəti çı umər sə`di ləşkəri mığobilədə mande və əvonış moyizəş karde.çı Həbib ibn Məzahiri bə dışmenoi ləşkəri bıə pandonku iqlə baxş de ın şərhi be:maşkinə Ğıyoməti ruji Xıdovənde-Mutəoli palu həmməysə yavə ğovm əvonin ki,ıştə pəyğombəri fərzənd,çəy xanedani və əhli-beyti və çı şəhri abidon iyən bandəon ki,de şəvi bəyji mandə holədə bə sıbi zəmoni rəseydən və ziyodə de Xıdo zikri məşğul beydən-kıştəşone.....