Kərbəlo de co qıləy rəvoyəti-8

Kərbəlo de co qıləy rəvoyəti

Bəşəri dırozə torıxədə İmom Huseyn(ə) ə cumlə nadir şəxsonkuye ki,deştə jimon iyən şəhodəti qıləy dıjdə ləpə bə vucudış vardey zınə və çandə dəvominə əsron bəpeştə çand milyon insonon dıl,əndişə iyən bovəş bəştə səmt cəlbış kardə.İmom Huseyn(ə) Xıdo iyən çəy rəsuli(s) mahbubə şəxs və çı fədokor iyən ozodə aşığon məşuğe.qıləy mevla və əğə ki,deştə pokə xuni əslə islomış bəyji karde və Kərbolədə bə eşğ iyən imoni əhli çı izzəti dərsış doe.

Məhərrəmə manqi har qıləy aşığə dıl bə Kərbəlo səmt meylış heste.Kərbəlo çı şəhodəti mevla aşığon oruzu kardə bıə vırəy.əmmo çı həyğiyə təğrrub və nez bıey şərt,ğərəz eşği co çi ni.kafi və vəs kardedə bə eşği xoto bo Xıdo roziyəti xoto qıləy qəm peqətəmon ta qədə-qədə ıştəni bə şəhidon salar və əğə nezkəmon,bırosnəmon...

Torıx çı odəmon iyən roonku oqıniyə holədə bə Siybur rəse.hənuz kərvon mandə nıbe ki,çı şaturon kəno çı şəhri cıvononış vinde.şiin iyən de ziyodə cəmon oqardin.sıvolışon dəparse və bə iyande quş sıxanışon vote.torıxi vindəşe cıvonon har qıləyni bə qıləy səmt şin,vitin iyən tosə kərvoni bə kərvonsəro rəsey,oqardin.Şıə zəmonədə ziyodə mığdorışon hestebe,zirehışon bə tan kardəbe və şımşişon bə dast qətəbe.torıx çı diyəroə vırəku qıləy piyəmerdi sədoş məse ki,deştə nəsyəton cıvonon orom kardedəbe.əmmo cıvnon nımandin və çı kərvoni roşon baste və de kərvoni hıvoskəon çanqbəyəxə bin.torıxi vindəşe ki,xun bəsə zəminisə rube.vindəşe ki,Ummu Kulsum çoko nəzə kardedəbe və çəy zıvoniku məsəşe ki,bo şəhri əhli rəhməti oruzuş karde. oruzuş karde ki,çəvon əvon nuş bıənin iyən ruzişon vey bıbu və əvon çı sıtəmkoron dastiku bə diyəro bıbon.torıx bə kərvoni kəno şe və çı əhli hərəmi ruşinə nəzəş peştikuş vinde....

Torıxi bə Bə`ləbeyki dərvozə və bə rəsə zəmonədə saz və avazi sədoş məse.kərvon ki,çı dərvozəku dəvarde,kuçə və quzərqoonış vinde ki,de jenon,merdon iyən hırdənon purbe.torıxi şəhrış vinde ki,millət id kardedəbin,ıştə pərçəmışon rost kardəbe və saz və dımbıl jeydəbin.torıxi çı kərvoni jenon çəşonış vinde ki,çı milləti nəzəku dom qordınəşonbe.çı hırdənon nəzəşon vinde ki, ıştə inon daston peştono mandəbin.çı İmomi(ə) lıv-lıputonışon vinde ki,de zikri oj be.torıx çı sərbozon şoyvonətiş vinde ki,əvon bəştə bə dast vardə səbarzəti xoto sərxoş və məst bin.torıxi nıvinde,əmmo çı əsiron quşon pur bıəbe de şəhri əhali rəxas kardey sədo və çı hırdənon xəyolon pur bıəbe de milləti tanə və sıremonon təsviron.torıxi oqıniyə bədənə jenonış vinde və tanış noxəş və bimarə İmomış(ə) vinde ki,qırd şəvışde norohətəti dəvordınəşbe.sıbdəmi zəmonədə həşi ki,peme,rost be,torıxi vindeşe ki,kərvon çı şəhriku xaric be.torıx çı kuşon miyono Ummu Kulsumi sədoş məse ki,bo şəhri əhli oruzuş karde sıtəmkoron əyo hakim bımandon və əvon ıştə jimonədə ədolət nıvindon.torıx çı şəhri dərvozəonku dəvarde və ıştə peştono ıştə ayəndə və vəomə çəş kardə de odəmon iyən divon pur bıə qıləy şəhrış baği haşte....