Nəhcul-Bəlağə pand iyən hikməton-26

Nəhcul-Bəlağə pand iyən hikməton

Nəhcul-Bəlağə 31-ə hikmətədə Əmirəl-Muminin Həzrət Əli(ə) çı imoni ərkon iyən sutunon izoh doydə. bə imoni məsələ iyən bə çın hikməti komiləti dığğət kardə holədə,bə ın fik dəşimon ki,ın hikməti şəş ğısmətədə bəşmə xıdmət bırosnəmon.bın bərnomədə əmə bə ədoləti rukn və sutuni işorə kardedəmon.

İmom Əli(ə) Nəhcul-Bəlağə 31-ə hikmətədə çı səbr iyən yəğıni bəyoni bəpeştə,çı imoni seminə sutun bıə ədoləti məsələ bəyon kardedə.

Ədolət yəni harçi ıştə mınosibə vırə və məğamədə ğərol bıqəto.joqo ki,hestemoni aləm iyən çəy kəmolatonku ıştə mınosibə səhm iyən ləyoğəti ğəbulko və bə cokəson həx iyən səhmon təcavuz nıko.

Həzrət Əli(ə) bın erjinə hikmətədə çı ədoləti şoxə və xıçon jıqo bəyon kardedə:”vələdlu ....ədoləti çoqlə şebəş heste.dəğiğə fam və dərk,nığılə elm iyən zıney,səhih iyən ruşinə ğəzovət və mıhokimə və hukmi bədiqə helm iyən tov vardey....

Həyğətədə ikəs ki,bə ədoləti əsos hukm kardeyış bıpyo,çəy iminə indikator və nışon doə çi,nığılə fam və dərke ta mevzu çok-çoki dərəso.çəy bəpeştə hartərəfin iyən kifoyət ğədərədə elm iyən məlumot kəsb kardeye ta ıştə hukmi vazeh,ruşin iyən harcurnə ibhomiku bə diyəro bəyon kardey bızıno və bın məsir iyən royədə bıə maneəon deştə helm iyən səbri bərtərəfko.

İmom Əli(ə) ıştə bə malik Əştəri bıə məşhurə nomədə(Nəhcul-Bəlağə 53-ə nomə) qıləy zəmon ki,əy bə Misri ostandorəti iyən vali vığandedəbe,bə hukumət iyən milləti həxon ayid bıə həmmə ğanunon bın nomədə bənə icro sərəncom və ğanuni bəy rosneydə ta əv ıştə hukuməti əhotə dayirə və əraziyədə əvoni icroko.çın nom iqlə bax və hissədəə həzrət çı ğəzovət və mıhokimə sıfət iyən xısləton aşmardedə və hamyedə:”peşo ıştə rəiyyəton miyono həmməysə barzə şəxsi ıştə nəzdədə bo milləti miyono hukm və ğəzovətiro bıvıjın.ikəs ki,çəvon mıxtəlifə koon saxti iyən tanqnoədə ğərol nıdo və deiyande dışmen iyən mıxolif bıə kəson rəftor,əy bə ğəzəb və inodkorəti nıvo və ıştə fırsemon iyən səhfonədə isror nıko və çəy xəto və səhf boəy ruşin bıə zəmonədə bo bə həxı səmt oqardemon boəy muşkil nıbu və ….və de bə dave ətrofi təkrorinə formədə ovard və mırociyət kardey oqıno və koon həyğəton kəşfi koyədə səbrko və həx oşko bıə zəmonədə hukmi inşo koyədə həmməysə ğətiyyətin bıbu”.

Həlbəttə bəpe bə ın nuktə dığğət kardey bıbu ki,çə həzrəti hamyə çiyon fəğət bə ğəzovət iyən mıhokimə koon ayid ni.bəlkəm bə həmmə iştimoyi hukmon iyən maddi və mənəvi jimoni mıhokiməon məxsuse.de qıləy co iborəti harco bo mevzu dırıstəti iyən səhihətiro bəpe dığğətkəmon və bə xoş nıomə hodisəon mığobilədə və bəzi vaxt kali fərdon norəvoə nisbəton vədə,ıştəku qıləy helm və tolerantəti nışon bıdəmon.

Əmirəl-Muminin Həzrət Əli(ə) çı ədoləti şebə və şoxəon təğdım kardey bəpeştə,iqlə həkimonə nəticə qəteyədə çəvon harqıləyni əsər və təsiron bəyon kardedə və hamyedə:”fəmən....ikəs ki,dırıst və səhih əndişə və fik-famko,bə elmi nığılətiyon aqahəti pəydu bəkarde və ikəs ki,bə elmi nığılətiyon bırəso,çı əhkam və hukmon sərçeşməku sirov bəbe və əkəs ki,helm iyən səbri roy bıqəto,ıştə koondə bə təfrit iyən səhlənkoəti dıço nibəbe və çı milləti miyono qıləy abrumandə jimonış bəbe”.....