Эрон Ислом Республикаси Президентининг БРИКС Плюс давлат раҳбарлари саммитидаги нутқи
Эрон Ислом Республикаси Президенти БРИКС бугунги кунда фақат бир нечта ривожланаётган иқтисодиёт ўртасидаги ҳамкорлик доираси эмаслигини таъкидлаб, шундай деди: БРИКС ҳеч бир куч маркази бошқаларнинг тақдирини белгилаш ҳуқуқига эга бўлмаган, янада мувозанатли ва ҳар томонлама қамровли дунёга бўлган ортиб бораётган талабнинг ифодасидир.
Парч Тудей хабарига кўра , Эрон Президенти Масъуд Пезешкиён БРИКС Плюс давлат раҳбарларининг «Барқарорлик, ҳамкорлик ва узвийлик: барча учун қамровли глобал ўсиш келажагини шакллантириш» мавзусидаги ўн саккизинчи саммитида шундай деди: Бугунги дунё муаммоларини ҳеч бир мамлакат якка ўзи ҳал қилишга қодир эмас. БРИКС Глобал Жануб мамлакатларининг тарқоқ имкониятларини умумий салоҳиятга айлантириши керак. Бу ўринда Эрон Ислом Республикасининг геосиёсий мавқеи ҳамда энергетика ва транзит салоҳияти аъзо давлатлар ўртасидаги савдо ва энергетика йўналишларини ривожлантиришда самарали роль ўйнаши мумкин.
У иқтисодий барқарорлик хавфсизликсиз узоқ муддатли бўла олмаслигини таъкидлаб, шундай деди: Минтақамиздаги воқеалар, айниқса АҚШ ва Сионистик режимнинг Эрон Ислом Республикасига қарши ҳарбий тажовузи, бир мамлакатнинг иқтисодий, энергетик ва тараққиёт инфратузилмаларини нишонга олиш оқибатлари қисқа муддат ичида ўша мамлакат чегараларидан ошиб, минтақавий ва глобал оқибатларга олиб келиши мумкинлигини кўрсатди.
Пезешкиён қўшимча қилди: Эрон халқи бу тажовузлар учун оғир бадал тўлади. Аёллар ва эркаклар, болалар ҳамда тинч аҳоли вакиллари ҳаётдан кўз юмди, мамлакат тараққиёти учун ўнлаб йиллар давомида барпо этилган инфратузилмаларга зарар етди. Бу воқеалар тинч аҳолини ҳимоя қилиш ва фуқаровий нишонларга қилинган ҳужумларни одатий ҳолга айлантиришнинг олдини олиш борасида халқаро ҳамжамият зиммасидаги оғир масъулиятни яна бир бор эслатади.
У сўзида давом этиб шундай деди: Ғазо ва Ливан халқлари ҳамон жиноятлар ва геноцид оқибатларига дуч келмоқда. Агар ҳарбий тажовуз, инсонларни оммавий ўлдириш ва уларнинг ҳаётини вайрон қилишга қарши самарали халқаро жавоб берилмаса, халқаро ҳуқуқ ҳақида гапириш мумкин эмас. Шу боис, БРИКС миллий суверенитет, ҳудудий яхлитлик ва куч ишлатишни тақиқлашни ҳимоя қилишда ҳам янада самарали роль ўйнаши керак.
Пезешкиён қўшимча қилди: БРИКС бугунги кунда фақат бир нечта ривожланаётган иқтисодиёт ўртасидаги ҳамкорлик доираси эмас, балки ҳеч бир куч маркази бошқаларнинг тақдирини белгилаш ҳуқуқига эга бўлмаган, янада мувозанатли ва ҳар томонлама қамровли дунёга бўлган ортиб бораётган талабнинг ифодасидир.
