Остонада Сурия бўйича ўтказилган музокараларнинг саккизинчи раундининг якунида баёнот эълон қилинди

Қозоғистон пойтахти Остонада Сурия бўйича ўтказилган музокараларнинг саккизинчи раундининг якунида Россия, Туркия ва Эрон ислом жумҳуриятининг намояндалари қўшма баёнот қабул қилишди ва ушбу баёнотда Сурияда террорчиларни бутунлай йўқ қилиш учун ўзаро ҳамкорликларни давом эттиришни таъкидлашди. 

Эрон телерадиокомпаниясининг ахборот агентлиги томонидан жума куни тарқатилган хабарга кўра, Эрон ислом жумҳурияти, Туркия ва Россия вакиллари Остонада Сурия бўйича ўтказилган музокараларнинг саккизинчи раундининг якунида, Сурияда ИШИД террорчилик гуруҳининг илдизини батамом қуритиш ва террорчиларнинг Сурияга олиб ўтилишининг олдини олиш учун ўзларининг қатъий азму қарорларини таъкидлашди. 

Шунингдек ушбу баёнотда қайд этилишича, Эрон ислом жумҳурияти, Россия ва Туркия мамлакатлари Сурияда оташкесмни ўрнатишга ва риоя қилишга кафил давлатлар сифатида Суриянинг суверенитетини, ҳукуматини, истиқлолини ва яхлитлигини сақлаб қолишни таъкидлашди.  

Қозоғистон пойтахти Остонада Сурия бўйича ўтказилган музокараларнинг саккизинчи раунди пайшанба куни ўз ишини бошлади ва жума куни тугатди. 

Музокараларда Россия делегациясига Россия Федерацияси президентининг Сурия бўйича махсус вакили Александр Лаврентьев, Туркия делегациясига –  Туркия ташқи ишлар вазири ўринбосари Седат Онал, Эрон делегациясига эса, Эрон ташқи ишлар вазирининг ўринбосари Ҳусайн Жаборий Ансорий бошчилик қилди. Шунингдек учрашувда Сурия ҳукумати ва мухолифати, кузатувчи давлатларнинг делегациялари ҳам иштирок этди.