Ана холоос! Атамбаев Жээнбековни ҳокимиятга олиб келгани учун кечирим сўради
Қирғизистон Социал демократик партияси (ҚСДП) томонидан 17 март куни Бишкекдаги «Медиа форум» биносида уюштирилган хотира митингида чиқиш қилган собиқ президент Алмазбек Атамбаев, «Жээнбековни ҳокимиятга (давлат раҳбарлигига) олиб келганидан афсусда эканлиги» тўғрисида баёнот берди.
«Умр бўйи оилавий-авторитар режимга қарши курашиб келар эканман, мен бу каби инсонларнинг ички дунёсига эътибор қаратмаганим учун узр сўрайман, мен ташқи кўринишга қараб шу каби оилани ҳокимиятга олиб келибман», - деди Атамбаев.
У шунингдек қўшимча қилар экан, «йўл қўйган хатосини ўнглашга ва ҳақиқатни айтишга» ҳаракат қилаётганини таъкидлади. Атамбаев ҳозирги ҳукуматни оилавий бошқарув йўлига ўтганликда айблади ва президентга мурожаат қилар экан бу йўлдан қайтишга чақирди.
«Сооронбай Жээнбеков, сен нафақат партия ва «Айкол Ала-Тоо» сафларини, балки халқни пораканда қилишга ҳисса қўшаяпсан. Мен сени «халқ жануб ва шимолга бўлинмасин, ягона бўлсин» деган мақсадда Ўшдан, Қорағулжадан олиб келдим. Сен поракандага ҳисса қўшаяпсан ва ҳалқимизни бўлиб ташлай бошладинг. Ҳатто намоз ўқишгача аралаша бошладинг. Кеч бўлмасдан тўхта! Чунки халқ – бу тўлқиндир. Одамлар чидайди. Аммо токайгача чидайди, буни билмайман. Кунлардан бир кун халқ уйғонгудек бўлса, уни ҳеч ким тўхтатиб қололмайди. Буни биз кўрдик», -дея баёнот берди собиқ президент.
Унинг қўшимча қилиб айтишича, халққа мустақил Қирғизистон керак, давлат раҳбари эса тенглик сиёсатини олиб бориши керак. Унинг сўзларига қараганда, ҳозирги ҳукумат кун сайин Қурманбек Бакиев ҳукмронлигига яқинлашмоқда, ўтган йилдан бошлаб эса Атамбаевнинг оиласига босим кучайибди.
Шу билан бирга ҚР президенти Сооронбай Жээнбеков 17 март куни Жалолобод вилоятининг Оқсу туманидаги Боспиев қишлоғида бўлиб ўтган митинг-реквиемда чиқиш қилар экан, «оилавий клан бошқарувига қарши чиққанлар бошида турганлардан бири бўлганини», ҳеч қачон оилавий бошқарувга йўл қўймаслиги ҳақида баёнот берди. ҚР президенти аппаратининг ахборот сиёсати бўлимининг маълум қилишича, давлат раҳбари «халқимиз мустақиллик йилларида оилавий бошқарувнинг турли кўринишларини кўрганини» эслатиб ўтди:
«Шундай вақтлар бўлдики давлатни уюшган жиноий мафия бошқарди. Бунинг далиллари жамоатчиликка ошкор қилинган. Биз халқимизнинг интилишларини яхши биламиз. Аждодларимиз айтганидек: «Адолатли ҳукмдорнинг қариндошлари бўлмайди, кимда-ким қариндошларининг манфаатларини ўйласа унинг виждони бўлмайди». Ўзимдан бошлаб ҳокимиятнинг учта бўғини бу ўгитларни унутмаслигимиз керак. Оилавий клан бошқарувига қарши кураш бошида турганлардан бири сифатида оилавий бошқарувга асло йўл қўймайман!», - дея таъкидлади Сооронбай Жээнбеков.
