Ўзбекистон Сенат раиси БМТ вакили билан учрашди

Танзила Нарбаева БМТнинг Наркотиклар ва жиноятчилик бўйича бошқармасининг Афғонистон, Марказий Осиё, Покистон ва Эрондаги минтақавий вакили Оливер Штолпе билан учрашув ўтказди

Спутник сайтининг Ўзбекистон сенати матбуо хизматига таяниб хабар қилишича, учрашувда Ўзбекистон ва БМТнинг Наркотик ва Жиноят масалалари бўйича идораси ўртасидаги ҳамкорлик, айниқса, ноқонуний наркотик айланмаси, уюшган трансмиллий жиноятчилик, одам савдоси ва терроризмга қарши кураш янги босқичга кўтарилгани айтиб ўтилди.

Хабарга кўра, минтақада инсон ҳуқуқлари устуворлигини ва гендер тенгликни таъминлаш, муносиб меҳнат шароитларини яратиш, коррупция ва одам савдосига қарши курашишда парламентнинг тутган ўрни атрофлича муҳокама қилинди.

Шу билан бирга мулоқотда Ўзбекистонда коррупцияга қарши кескин курашиш чораларининг қонуний асослари яратилгани, бу эса халқаро даражада эътироф этилаётгани алоҳида қайд этилди.

Одам савдоси, мажбурий меҳнат ва хорижда меҳнат қилаётган мигрантлар муаммоларини ҳал этишда мамлакат ижобий натижаларга эришгани алоҳида таъкидлаб ўтилди. Бу борада Ўзбекистоннинг халқаро рейтинг ва индекслардаги ўрни яхшилангани қайд этилди. Келгусида ҳам ана шундай ижобий натижаларга эришиш учун ташкилот билан ўзаро ҳамкорликни мустаҳкамлаш масалалари юзасидан фикр алмашилди.