Жанни Инфантино Ўзбекистонга келди

FIFA президенти Жанни Инфантино Ўзбекистонда футболни янада ривожлантиришга доир лойиҳаларни муҳокама қилиш, Миллий футбол маркази билан яқиндан танишиш учун мамлакатга келди

Ўзбекистон футбол ассоциациясига таяниб Спутник сайтининг хабар қилишича, Инфантино “CAFA Nations Cup 2025” мусобақасининг Тошкентдаги финал учрашувини ҳам стадиондан кузатади.

FIFA делегациясини Тошкент халқаро аэропортида Ўзбекистон спорт вазири Адҳам Икрамов, Осиё Олимпия кенгаши вице-президенти, Миллий олимпия қўмитаси раисининг биринчи ўринбосари Отабек Умаров, Ўзбекистон футбол ассоциацияси биринчи вице-президенти Равшан Ирматов ва расмийлар кутиб олишди.

Бугун соат 19:30 да Тошкентдаги янги “Олимпик” стадионида финал учрашуви бўлиб ўтади. Унда Ўзбекистон терма жамоаси “олтин” медал учун Эронга қарши майдонга тушади.