Тошкентнинг Яшнобод туманидаги кўп қаватли уйда ёнғин содир бўлди /фуқаролар эвакуация қилинди/
Ўзбекистоннинг Фавқулодда вазиятлар вазирлиги Тошкентнинг Яшнобод туманидаги кўп қаватли уйда ёнғин содир бўлганини хабар қилди.
3 июнь куни соат 01:08 да Тошкент шаҳар ФВБ навбатчилик қисмига тумандаги “Тонг” маҳалласи, Тузел 2-даҳаси 22А-уйда (12 қаватли уйнинг 8- қаватида) ёнғин содир бўлаётганлиги тўғрисида хабар келиб тушган деб хабар берган Спутник сайти.
Воқеа жойига ёнғин ўчириш экипажлари соат 01.15 атрофида етиб бориб, соат 01-43 да ёнғин ўчирилган.
Ёнғин-қутқарувчилар томонидан ёнаётган хонадондан икки нафар, қўшни хонадондан бир нафар фуқаро қутқарилган.
Шунингдек, ёнғиннинг бинодаги бошқа хонадонларга ўтиб кетиши ҳамда ундан ажралиб чиқаётган заҳарли тутундан юқори қаватларда яшовчи аҳоли заҳарланишининг олдини олиш мақсадида, уйдан 30 дан ортиқ фуқаро хавфсиз ҳудудга эвакуация қилинди.
Тан жароҳати олганлар ва ҳалок бўлганлар қайд этилмаган.
