Ўн ойда 568 нафар фуқаро жасади Ўзбекистонга олиб келинди

Ташқи меҳнат миграцияси агентлиги вакили Азим Ахматов хабар қилишича, жорий йилнинг январ-октябр ойлари оралиғида чет элда турли сабабларга кўра вафот этган 568 нафар ватандошларнинг жасадлари Ўзбекистонга олиб келинган.

"2020 йилнинг ўтган ўн ойи давомида Ўзбекистонга чет элдан 568та "Груз-200" олиб келинди. Шу жумладан, Россиядан — 546та, Туркиядан — тўққизта, Қозоғистондан — олтита, Ямандан — битта, Ливиядан — битта, Мисрдан — битта", - деди Ахматов. Ўтган йилда республикага олиб келинган "Груз-200"лар сони 308тани ташкил қилган деб хабар қилди Спутник сайти..

Шунингдек, Ахматовнинг айтишича, Россия Федерацияси Ички ишлар вазирлигининг вақтинчалик сақлаш марказларидан 625 киши қайтарилган. 2019 йилда бу миқдор 3323 кишини ташкил этган.

COVID-19 пандемияси туфайли йил бошидан чет давлатлардан Ўзбекистонга кириб келган фуқаролар сони 392 371 нафарни ташкил қилган. Пандемия туфайли хорижга ишлашга кета олмаган фуқаролар сони 483 121 нафарни ташкил қилган.

Ўзбекистон Ички ишлар вазирлиги ва Бандлик ва меҳнат муносабатлари вазирлиги ҳисоб-китобларига кўра узоқ муддатда хорижда юрган Ўзбекистон фуқаролари сони бугунги кунда 1 739 468 нафарни ташкил этмоқда.

• Россияда коронавирусга чалинган ўзбекистонлик вафот этди