ИШИД террорчилик гуруҳи Марселда ўткинчиларга уюштирилган ҳужум учун жавобгарликни зиммасига олди

Кеча якшанба куни Франциянинг Марсель шаҳридаги Сен-Шарль вокзалида ўрта ёшлардаги эркак совуқ қурол билан икки кишига ҳужум қилган

      ИШИД террорчилик гуруҳи Франциянинг Марселдаги Сен-Шарль вокзалида пичоқ билан қуролланган ҳолда ўткинчиларга уюштирилган ҳужум учун жавобгарликни зиммасига олди.

Кеча, 1 октябрь куни Франциянинг Марсель шаҳридаги Сен-Шарль вокзалида ўрта ёшлардаги эркак совуқ қурол билан икки кишига ҳужум қилган. Мазкур ҳужум оқибатида икки аёл ҳалок бўлган.

Ҳужум қилган шахс полициячилар томонидан яраланди ва ҳибсга олинганидан сўнг кўп ўтмай вафот этган. Полицияга кўра, гап Шимолий Африкада туғилиб-ўсганлиги тахмин қилинаётган 25-30 ёшлардаги шахс ҳақида кетмоқда.

Маҳаллий полиция вакиллари ушбу шахс диний руҳдаги ҳайқириқлар билан ҳужум қилгани учун, бу ҳужумни теракт сифатида баҳолаган. Айни пайтда воқеа тафсилотлари ўрганилмоқда.